Бастакы спикер үбүлүөйүн көрсө

Ааспыт нэдиэлэҕэ парла­меҥҥа үбүлүөйд­ээх даатаҕа тэрээһиннэри ыытар уонна бэлэмниир кэмитиэт мунньаҕа буолан ааста. Мунньаҕы Ил Түмэн бэрэссэдээтэлэ Александр Жирков салайан ыытта. Тэрээһиҥҥэ дьиэ-уот, коммунальнай хаһаа­йыстыба уонна энергетика министрин солбуйааччы Наталья Чукавина, айылҕа харыстабылын министрин бастакы солбуйааччы Семен Яковлев, ытык киһибит төрөөбүт-үөскээбит Хайахсыт нэһилиэгин баһылыга Василий Прудецкай, олоҕун аргыһа Венера Илларионова, Чурапчы улууһун Мунньаҕын бэрэссэдээтэлэ Яков Оконешников, парламент аппараатын үлэһиттэрэ, уо.д.а. кыттыыны ыллылар.
Спикер Александр Жирков мунньаҕы аһарыгар, быйыл саас, кулун тутар 10 күнүгэр Чурапчы улууһун Туора Күөл бөһүөлэгэр көһө сылдьар мунньах түмүгүнэн ылыллыбыт боротокуол туолуутугар тохтоото. Кини итиннэ ылыллыбыт быһаарыылар үгүс өттө туолбуттарын бэлиэтээтэ.
Ол курдук, Хайахсыт нэһи­лиэгэ нэһилиэнньэлээх пууннары тупсарыыга көрүллэр субсидия куонкуруһугар кыттан, 4 мөл. 500 тыһ. солк. ылары ситиспит. Ити көрүллүбүт үп-харчы А.П. Илларионов скверин, пааматынньыгын уонна Туора Күөл бөһүөлэгин тупсаран оҥорууга ороскуоттанарын туһунан баһылык Василий Прудецкай бэлиэтээтэ.
Үбүлүөйдээх дата чэрчитинэн ыытыллар тэрээһиннэр былааннара түөрт түһүмэхтэн турар. Ол курдук, «Көрдөрөр-иһитиннэрэр средстволарга сырдатыы, үйэтитии» түһүмэх чэрчитинэн ытык киһибит чугас дьонун ахтыыларынан уонна поэт айымньыларынан кинигэ бэчээттэнэрэ былааннанар. Маныаха Национальнай библиотека үлэһиттэрэ библиографическай ыйынньык оҥорбуттарын туһунан Саргылаана Максимова бэлиэтээтэ.
Баһылык Василий Прудецкай «Якутагропромпроект» тэрилтэ оскуола-сад бырайыактыыр-смета докумуоннарын үлэтин түмүктээбитин туһунан иһитиннэрдэ. Ыам ыйын бүтэһигэр ыһыах ыһар сиргэ ураһалары, балаҕаннары, трибунаны, сэргэлэри тутууга, оҥорууга бэдэрээтчиттэри быһаарыыга куонкурус ыытыллыбыт. Манна кыайыылааҕынан Константин Лебедев салайааччылаах «Нэлэгэр» ХЭТ тахсыбыт. Баһылык бэдэрээтчиттэр үлэлэрин саҕалаабыттарын туһунан иһитиннэрдэ.
Итилэри таһынан өрөспүү­бүлүкэ үөрэҕин кыһаларыгар ытык салайааччыга анаммыт кылаас чаастара, библиотека уруоктара ыытыллыахтара. Өрөспүүбүлүкэ хаһыаттарыгар, сурунаалларыгар Афанасий Илларионов туһунан ыстатыйалар бэчээттэниэхтэрэ, телевидениеҕэ уонна араадьыйаҕа анал биэриилэр, киинэлэр оҥоһулланнар көрдөрүллүөхтэрэ. Оттон былаан «Семинардары, научнай-практическай конференциялары, куонкурустары ыытыы уонна тэрийии» түһүмэҕин чэрчитинэн Чурапчы сэлиэнньэтигэр өрөспүүбүлүкэтээҕи «Илларионов ааҕыылара» научнай-практическай конференция, Туора Күөл бөһүөлэккэ тустаах улууска үтүө үгэскэ кубулуйбут «Сааскы кылыһахтар» фестиваль Афанасий Илларионов хоһооннорунан ырыаларга ананыаҕа. Маны таһынан өрөс­пүүбүлүкэтээҕи «Эдэр юрист» уонна «Эдэр суруналыыс» куонкурустар ыытыллыахтара. Ааҕааччым, «Эдэр суруналыыс» куонкурус тоҕо киниэхэ ананарыттан мунаарбыт буолуохтааххын сэрэйэбин. Ити — түбэһиэх буолбатах. Ол курдук, Афанасий Илларионов оскуоланы бүтэрэн, олох киэҥ аартыгар үктэнэн баран, суруналыыстыкаҕа туттарсан көрбүтэ. Хомойуох иһин, бэчээккэ тахсыбыт ыстатыйалара суох буолан, кинини үөрэххэ ылбатахтара. Оттон кини хайдах курдук хомоҕой тыллаах-өстөөх суруксутун туһунан этэ да барыллыбат.
Хаҥалас улууһугар «Өлүөнэ кыраайа» форумҥа хас сылын ахсын ыытыллара былааннаныллар «Эдэр депутаттар оскуолалара» үлэтин саҕалыаҕа.
Хайахсыт нэһилиэгин баһы­лыга Василий Прудецкай этэринэн, Афанасий Илларионов үбүлүөйүгэр анаммыт ыһыахха тэрээһин уонна бэлэмнэнии үлэлэрэ күүскэ барар эбиттэр. Ол курдук, сибэкки олордуутугар, көҕөрдөр үлэни ыытыыга, ыраастаныыга субуотунньуктар тэриллибиттэр. Ыһыах ыһар сири тупсаран оҥорууга 2,5 мөл. солк. тыырыллыбыт. Культурнай тэрээһиннэргэ барыта 150 киһи кыттыыны ылара былааннанар. Ыһыахха дьон-сэргэ болҕомтотун тардар биир тэрээһининэн Афанасий Илларионов ырыа буолбут хоһоонноругар «Уунабын сибэкки дьөрбөтүн» диэн куонкурус буолуоҕа.
Мунньах түмүгэр спикер Александр Жирков ытык киһибит үбүлүөйүгэр анаммыт тэрээһиннэр бу сылы бүтүннүү хабан ыытыллыахтарын бэлиэтээтэ. Кини эппиэттээх министерстволарга Туора Күөл бөһүөлэгэр оскуола-сад тутуутун боппуруоһун ураты болҕомтоҕо, хонтуруолга туталларыгар сорудахтаата.
Судаарыстыбаннай деятель, Ил Түмэн Бэрэстэбиитэллэрин Палаататын бастакы спикерэ Афанасий Илларионов сырдык кэриэһигэр ананар ыһыах бэс ыйын 15 күнүгэр, Дьокуускайга Хайахсыт күннэрэ ахсынньы 6 күнүгэр ыытыллыахтара.
Тоҕо ааспыты хасыһабыт, үйэтитэбит? Бу ыйытыыга «норуот буолаары» диэн быһа-бааччы хоруйдуохпун баҕарабын.