Елена Голомарёва: «Ырыа олоххо уонна айарга көмөлөһөр»

Үбүлүөйдээх тэрээһиннэр чэрчилэринэн Өлөөҥҥө алтынньы 17 күнүгэр СӨ народнай депутата, Ил Түмэн Хоту сир аҕыйах ахсааннаах төрүт норуоттарын боппуруостарыгар уонна Арктика дьыалаларыгар сис кэмитиэтин бэрэссэдээтэлэ, РФ үтүөлээх учуутала, СӨ үөрэҕин үтүөлээх үлэһитэ, өрөспүүбүлүкэ уонна оройуон уус-уран самодеятельноһын көрүүлэрин лауреаттара Елена Голомарева айар биэчэрэ буолан ааста.

Үбүлүөй тэрээһиннэригэр бу кэнсиэр биир чаҕылхай түгэнинэн буолла. Кэнсиэр кэмигэр дьон олохтоох уонна саха мелодистарын ырыаларын, ону сэргэ Елена Голомарева бэйэтэ айбыт хоһооннорун кэрэхсии иһиттилэр. Кини оҕо сааһын, комсомол күүрээннээх күннэрин ырыаларын, төрөөбүт кыраайын туһунан ырыалары толорбутугар саала бүтүннүүтэ кинини кытта ылласта.

«Ырыа олоххо уонна айарга көмөлөһөр» диэн мээнэҕэ этиллибэт. Бу сырыыга биир дойдулаахтарбын кытта ырыа тылынан кэпсэттим. Төрөөбүт Сахабыт сиригэр, Өлөөн дьонугар-сэргэтигэр таптал туһунан ырыалары бары бииргэ ыллаатыбыт. Улаханнык үөрбүт, дьону кытта истиҥник көрсүбүт, үгүһү толкуйдуур кэмнэрбэр үөскүүр хоһооннорум аан бастаан сыанаттан иһилиннилэр. Бу манна мин дууһам ураты туруктанар, ол да иһин үбүлүөй күнүгэр Ийэ сирим, учууталлар, ииппит-үөрэппит оскуолам, төрөөбүт түөлбэм олохтоохторун туһунан строкаларынан биир дойдулаахтарбын үөрдүөхпүн баҕарбытым. Дууһам ураты туруктанар түгэнигэр хоһооннорум тахсаллар, итиэннэ кинилэр олус элбэҕэ суохтар», – диэн санаатын үллэһиннэ Елена Голомарёва.

Кини хоһооннорун 2000 сылтан суруйар. «Бу тыһыынча сыл түмүктэниитин, 90-с дьалхааннаах сыллар кэннилэриттэн ыарахан сыллар этилэр. Бастакы хоһооннорум ортотугар Өлөөн улууһун киин балыыһатын акушерката Ульяна Максимовна Васильева туһунан хоһоон баара. Кини «Далбар Хотун» өрөспүүбүлүкэтээҕи куонкуруска кыттыбыта уонна бэйэтин туһунан хоһоонунан кэпсээни суруйарбар көрдөспүтэ. Суруйан саҕалыырбар Красноярскай туундаратын киэҥ дуолугар көс олохтоох эһэтин уонна эбэтин уобарастара үөскээбиттэрэ. Буурҕа ортотугар кийиит кыыс тохтобулун көрдөөн, мунан атын тохтобулга кэлбиттэрин, Ульяна аҕата кэргэн буолуохтаах кыыһын көрөөт да сөбүлээбитин туһунан суруллубута, – диэн Елена Голомарёва кэпсиир, – хоһоон суруйарбар тыллар хантан эрэ кутуллан кэлэллэр». Ол курдук Чорду уонна Бэлгяр биис уустарын дьикти дьылҕатын туһунан хоһоонунан кэпсээн баар буолбута».

Кэнсиэргэ ырыанан, хоһоонунан эрэ муҥурдамматылар. Табаны иитии суолтатын, Арктика хоту сирин, Хоту дойду аҕыйах ахсааннаах төрүт норуоттарын көмүскээһин эйгэтин сокуоннарынан хааччыйыы туһунан истиҥ-иһирэх кэпсэтии таҕыста.

«Биир дойдулаахтарбар айымньылаах уонна уопсастыбаҕа туһалаах буолалларыгар баҕарыам этэ, оччоҕо үлэ да тахсыылаах, толкуйдаммыты олоххо түргэнник киллэрэҕин, кылаабынайа, дьону кытта алтыһартан астынаҕын. Итиннэ мин айар биэчэрим ананна», – диэн түмүктээтэ Елена Голомарева.

Гаврил Атаков.