Евгений Евтушенко кэлэр

Нуучча поэта Евгений Александрович Евтушенко Сибииргэ Иркутскай уобалас Зима станциятыгар 1933 сыллаахха төрөөбүтэ.

Кини айар үлэтэ аан дойдуга барытыгар биллэр, Россия дьонун тапталлаах поэта. Евгений Александрович аан дойдуну бүтүннүүтүн кэрийэ айаннаабыт киһи буолар. Ол иһигэр кини Саха сирин бөдөҥ өрүстэригэр болуотунан устубута, нэһилиэнньэни кытта көрсүбүтэ. Евтушенко Саха сирин курдук кэрэ айылҕалаах уонна үтүө норуоттаах сир атын биир да континеҥҥа суох диэн ааҕар.

Кини билигин да аан дойду литературатын лидердэриттэн биирдэстэринэн буолар. Евтушенко хоһоонноругар үгүс сэбиэскэй композитордар – Арно Бабаджанян, Эдуард Колмановскай, Микаэл Таривердиев уо.д.а. ырыалара суруллубуттара. Олору аатырбыт ырыаһыттар Муслим Магомаев, Георг Отс, Юрий Гуляев, Людмила Зыкина, о.д.а. толороллоро.

Бүгүҥҥү күҥҥэ Евгений Александрович хоһооннору, прозаны суруйуутун салгыыр, ааҕааччылары кытта көрсөр. Поэт Е.А.Евтушенко «Жизнь, как приключение…» диэн айар киэһэтэ Саха академическай театр сыанатыгар ыам ыйын 2 күнүгэр 17:00 чаастан буолуоҕа. Биэчэр кэмигэр поэт сахалыы тылбаастаммыт хоһоонноро ааҕыллыахтара. Ааптар кинигэлэрэ атыыланыахтара уонна автограф-сессия тэриллиэҕэ. Киирии – босхо.