Герой-куораты кытта сибээс быстыбат

Мемориальнай дуоскаҕа сибэкки ууруу сиэригэр-туомугар Ил Түмэн бэрэссэдээтэлин солбуйааччы Виктор Губарев, норуот депутаттара Антонина Григорьева, Александр Корякин, СӨ үлэҕэ уонна социальнай сайдыыга миниистирэ Александр Дружинин, Дьокуускай куорат баһылыгын солбуйааччы Евдокия Евсикова, CӨ бэтэрээннэрин сэбиэтин бэрэссэдээтэлэ Вильям Иванов, Аҕа дойду Улуу сэриитин кыттыылааҕа Михаил Попов, СӨ бырабыыталыстыбатын чилиэннэрэ, уопсастыбаннас уо.д.а. муһуннулар.

Быйыл алтынньы ыйга Россия кутурҕаннаах күнү – Севастополь обороната саҕаламмыта 75 сылын бэлиэтиир. Севастополь куорат обороната – Аҕа дойду Улуу сэриитин сылларыгар ССРС сэбилэниилээх күүстэрин бөдөҥ көмүскэнэр операцията. Севастополь куорат обороната 250 күн устата барбыта уонна сэбиэскэй буойуннар маассабай хорсун быһыыларын көстүүтүнэн историяҕа киирбитэ.

«Севастополь – Аҕа дойду Улуу сэриитин историятын биир дьоруойдуу быһыылаах түгэнэ. Бу күн биһиги герой-куорат босхолонуутугар хорсуннук киирсибит саллааттары санаан төбөбүтүн хоҥкутабыт», – диэтэ Ил Түмэн бэрэссэдээтэлин солбуйааччы Виктор Губарев. Кини Севастополь оборонатыгар үгүс саха саллаата кыргыспытын, ол иһигэр 1945 сыллаахха буолбут Кыайыы Параадын кыттыылааҕа, Севастополь куораты ылыыга бааһырбыт Мохначевскай Илья Аполлонович аатын санатта.

Виктор Губарев Дьокуускай уонна Севастополь куораттар икки ардыларыгар бигэ сибээс урут-уруккуттан олохтоммутун, өссө 1854-1855 сс. Крым сэриитигэр Саха сиринээҕи сатыы сэрии пуолкатын хаһаактара кыттыбыттарын санатта. «Севастопольга Якутская диэн уулусса 100 сыл анараа өттүгэр баар буолбута, икки сыллааҕыта Дьокуускай куоракка Севастопольскай диэн уулусса олохтоммута», – диэтэ уонна бүгүн Крым уонна Севастополь Россия олохтоохторун улахан болҕомтолорун ылыахтаахтарын эбэн эттэ. Санатар эбит буоллахха, 2014 сыллаахха бэс ыйын 12 күнүгэр – Россия күнүгэр М.К.Аммосов аатынан Хотугулуу-Илиҥҥи федеральнай университет устудьуоннара Дьокуускай куорат биир уулуссатыгар Севастополь куорат аатын иҥэрэргэ этии киллэрбиттэрэ. Эдэр көлүөнэ бу кэскиллээх көҕүлээһинэ аҥаардас уулуссаны ааттааһынынан муҥурдаммакка, Севастополь куораты, 2014 сылга Россия Федерациятын састаабыгар киирбит Крымы кытары бииргэ үлэлэһиигэ олук уурбута.

Ил Түмэн вице-спикерэ Аҕа дойду Улуу сэриитин уонна тыыл бэтэрээннэригэр туһаайан, кинилэр дьоруойдуу быһыыларын, өрөспүүбүлүкэ уонна дойду социальнай-экономическай сайдыытыгар тугунан да сыаналаммат сүҥкэн кылааттарын иһин махтанна. «Герой-куорат Севастополь көмүскээччилэригэр, Аҕа дойду Улуу сэриитин кыайыылаахтарыгар албан аат! Россия Федерациятын планета үрдүнэн эйэ мэктиэтин быһыытынан бөҕөргөтүөхпүт!» – диэн түмүктээтэ Виктор Губарев.

СӨ үлэҕэ уонна социальнай сайдыыга миниистирэ Александр Дружинин иһитиннэрбитинэн, РФ оборонаҕа министиэристибэтин дааннайдарынан, Севастополь оборонатыгар 2000 кэриҥэ саха саллаата кыттыыны ылбыт, онтон 23 эрэ киһи дойдутугар төннүбүт. Бүгүҥҥү күҥҥэ 189 саха саллаата Севастопольга көмүллэ сытарын бигэргэтэллэр.

Дьокуускай куорат баһылыгын солбуйааччы Евдокия Евсикова байыаннай-патриотическай иитиигэ күрэх ыытылларын иһитиннэрдэ. Ити чэрчитинэн, 2 сыл устата 500-тэн тахса оҕо Севастополь куоракка Хара муораҕа баран сынньанан кэлбиттэр. Ааспыт сылга Дьокуускай 26 №-дээх оскуолатын үөрэнээччилэрэ кыайбыттар.

Итиэннэ миитин кыттыылаахтарыгар эҕэрдэ тылы Аҕа дойду Улуу сэриитин кыттыылаҕа Михаил Попов эттэ. Дьокуускай куорат 26 №-дээх оскуолатын 10 «з» кылааһын үөрэнээччилэрэ, Александр Рыжиков аатынан байыаннай-патриотическай кулууп курсаннара Екатерина Подлужная уонна Владимир Маччасынов Аҕа дойду Улуу сэриитин уонна тыыл бэтэрээннэригэр эдэр ыччат аатыттан махтал тыллары эттилэр.

Миитин кыттыылаахтара, Севастополь оборонатын көмүскээччилэри кэриэстээн, кутурҕан мүнүүтэтигэр саҥата суох турдулар.

Ити курдук, болуоссакка мустубут дьон Аҕа дойду Улуу сэриитин кэмигэр кыайыыны уһансыбыт саллааттарга болҕомто уҕараабатын биллэрдилэр.