842
29 мая 2015 в 16:46
Ил Түмэн Бэрэссэдээтэлин бириэмийэтэ — Чурапчы библиотекаларын тиһигэр
Ыам ыйын 27 к. библиотекалар Бүтүн Россиятааҕы күннэригэр СӨ Национальнай библиотекатын Историческай саалатыгар СӨ Ил Түмэнин Бэрэссэдээтэлин бириэмийэтин, СӨ Ил Дарханын библиотека дьыалатыгар И.И.Крафт аатынан бириэмийэтин, СӨ культуратын үтүөлээх үлэһитэ Т.А.Жараева аатынан бириэмийэни туттарыыга, ону сэргэ бастыҥ библиотекалары, үлэһиттэри наҕараадалааһыҥҥа аналлаах үөрүүлээх мунньах ыытылынна.
Ил Түмэн Секретариатын салайааччыта Александр Дегтярев Ил Түмэн Бэрэссэдээтэлин бириэмийэтин «Чурапчытааҕы нэһилиэктэр икки ардыларынааҕы кииннэммит библиотека тиһигэ» (МЦБС) культура муниципальнай казеннай тэрилтэтигэр туттарда. Саха сирин Судаарыстыбаннай Мунньаҕын Бэрэссэдээтэлэ Александр Жирков киирбит матырыйааллары көрүү түмүгэр Чурапчытааҕы библиотека тиһигэ официальнай правовой иһитиннэриини тиэрдиигэ уонна өрөспүүбүлүкэ нэһилиэнньэтин правовой сырдатыыга ситиһиилэрин, библиотекалар нэһилиэнньэни правовой сырдатыыга улахан кылааттарын, гражданнар официальнай, правовой иһитиннэриигэ суһаллык тииһиниилэрин хааччыйыыларын, ону сэргэ үлэ саҥа көрүҥнэрин уонна ньымаларын олохтообуттарын иһин бириэмийэни аныырга быһаарбыта.
Онон 50000 солк. кээмэйдээх бириэмийэни Чурапчытааҕы кииннэммит библиотека правовой иһитиннэриигэ Киинин кылаабынай библиотекара Надежда Аммосова ылла.
Чурапчы улууһугар билигин бу наҕараадаламмыт нэһилиэктэр икки ардыларынааҕы библиотека салалтатынан 17 тыа сирин библиотеката, улуустааҕы уонна оҕо библиотекалара үлэлииллэр. Библиотека фондатын уопсай кээмэйэ 265 605 экземплярга тэҥ. Библиотекалар улуус нэһилиэнньэтин 70,5% хабан үлэлииллэр. Ааҕааччылар ахсааннара – 14 998 киһи, киһи сылдьыыта – 143 844, кинигэни биэрии ахсаана – 366 078 экземпляр.
