Ким түмсүүлээх — ол күүстээх

Бу күн өрөспүүбүлүкэ үрдүнэн үөрүүлээх миитиннэр, үгэс буолбут уруоктар, фестиваллар уонна куонкурустар ыытылыннылар.
Саха сирин парламенын бэрэссэдээтэлин бастакы солбуйааччы Анатолий Добрянцев, депутаттар куорпустара уонна аппараат үлэһиттэрэ Норуот сомоҕолоһуутун күнүгэр аналлаах «Мы едины!» уопсастыбаннас үөрүүлээх миитинигэр кытыннылар.
Быйыл бу тэрээһин Норуоттар доҕордоһууларын болуоссатыгар тэриллибитэ бэлиэ. Саха Өрөспүүбүлүкэтигэр 139 омук бэрэстэбиитэлэ олорор.
Миитин Египеккэ «Airbus А321» сөмөлүөт саахалланыытыгар өлбүт Россия 224 гражданнарын кэриэһигэр биир мүнүүтэлээх тохтобултан саҕаланна.
Саха сирин Ил Дарханын уонна Бырабыыталыстыбатын Администрациятын салайааччыта Юрий Куприянов тыл эттэ.
Ил Түмэн бастакы вице-спикерэ Анатолий Добрянцев парламент уонна СӨ норуоттарын Ассамблеятын аатыттан эҕэрдэлээтэ. Кини бу Норуот сомоҕолоһуутун күнэ дойдуга биир саамай суолталаах бырааһынньыгынан буоларын бэлиэтээтэ. «Дойдубут историятыгар саамай уустук уонна дьылҕа быһаарыллар түгэннэригэр бары норуоттар сомоҕолоһуулара уонна түмсүүлээхтэрэ Аҕа дойдубут көҥүлүн уонна тутулуга суох буолуутун туруулаһарга көмөлөспүттэрэ», – диэтэ кини уонна Россия элбэх национальностаах ураты дойду буоларын, манна 190-ну аһарар омук 250-тан тахса тылынан саҥарарын эбэн эттэ.
Парламентарий: «Биһиги, араас национальностаах, араас итэҕэллээх, политическай уонна да атын көрүүлэрдээх Россия олохтоохторо уопсай силистээх-мутуктаах уонна уопсай кэскиллээх биир норуотунан буоларбытын бу күн өйдөтөр аналлаах. Сомоҕолоһон уонна гражданскай түмсүүлээх буолан, бэйэбит үгэстэрбитин уонна духуобунай сыаннастарбытын, баай историябытын уонна ураты культурабытын харыстаан эрэ биһиги туруоруллубут сыалбытын-сорукпутун ситиһиэхпитин сөп», – диэтэ Анатолий Добрянцев. Кини Россияҕа уопсастыба сомоҕолоһуутун бөҕөргөтүүгэ, судаарыстыба чэчирии сайдарыгар Саха сирэ дьоһун кылаатын киллэрэрин, конфессиялар уонна нациялар икки ардыларыгар тулуурдаах буолуу, сөбүлэһии уонна ытыктабыл холобурун көрдөрөрүн бэлиэтээн эттэ. Ил Түмэн бэрэссэдээтэлин солбуйааччы норуоттар түмсүүлээх буолуулара туруктаах уонна күүстээх судаарыстыба мэктиэтэ буоларын этэн туран, Саха сиригэр 70-тан тахса национальнай-культурнай уопсастыбаннай холбоһук үлэлиирин бэлиэтээтэ. «Биһиги түмсүүлээх буоллахпытына күүстээхпит! Бары бииргэ сомоҕолоһуоҕуҥ! Ким доҕордоох – ол дьоллоох! Уруй-айхал!» – диэн тылларынан этиитин түмүктээтэ Анатолий Добрянцев.
Салгыы Дьокуускай баһылыгын бастакы солбуйааччыта Сергей Игнатенко, элбэх оҕолоох ийэ, Дьокуускай куорат Киин уокуругун дьахталларын сэбиэтин бэрэссэдээтэлэ Мария Амыдаева, 2012 с. Паралимпийскай оонньуулар боруонса призердара, маастара Степанида Артахинова, ХИФУ профессора Карл Башарин, о.д.а. тыл эттилэр, миитин кыттыылаахтарыгар эҕэрдэлэрин тиэртилэр.
Бу тэрээһин саха оһуохайынан, сээдьэнэн, нуучча хоробуотунан түмүктэннэ.
Күн иккис аҥаарыгар Саха сирин норуотун депутаттара А.Е.Кулаковскай аатынан норуоттар доҕордоһууларын дьиэтигэр «Россия – бу биһиги!» патриотическай акцияҕа кытыннылар.