Курбуһах интернат-дьиэтигэр Николай Винокуров аатын иҥэрдилэр

Интернат-дьиэ олохтоохторо уонна үлэһиттэрэ, Курбуһах нэһилиэгин дьоно-сэргэтэ бэс ыйын 14 күнүгэр, ыһыах ыһар ытык-мааны күннэригэр, дьоһун-дьоро түгэни бэлиэтээтилэр. Бу күн интернат-дьиэҕэ курбуһахтар киэн туттар бас-көс киһилэрин, өрөспүүбүлүкэҕэ бөдөҥ общественнай, советскай-партийнай деятель быһыытынан биллибит, Саха АССР Үрдүкү Сэбиэтин депутата, Саха Өрөспүүбүлүкэтин Ил Түмэнин народнай депутата, Саха Республикатын Үрдүкү Сэбиэтин Президиумун чилиэнэ, өрөспүүбүлүкэ үлэҕэ, социальнай политикаҕа, атыыга-эргиэҥҥэ, экономическай салааҕа бастайааннай комиссиятын председателэ, 1984-1990 сылларга СӨ социальнай сайдыытын миниистирин I солбуйааччыта, республика Пенсионнай сулууспатын Департаменын директорын I солбуйааччы, CӨ Көҥүл тустууга федерациятын бастакы президенэ, СӨ норуотун хаһаайыстыбатын үтүөлээх үлэһитэ, Уус-Алдан, Дьааҥы, Эдьигээн улуустарын бочуоттаах олохтооҕо Николай Михайлович Винокуров (25.04.1935-18.12.2005 сс.) үтүө аатын иҥэрии Курбуһахха Кыайыы ыһыаҕын биир бэлиэ тэрээһининэн буолла.

Н.М.Винокуров аатын иҥэрии сиэригэр-туомугар өрөспүүбүлүкэ Ил Түмэнин Председателэ Александр Жирков, Уус-Алдан улууһун баһылыга Алексей Федотов, парламент доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин  председателэ Александр Корякин,  CӨ үлэҕэ уонна социальнай сайдыыга миниистирин I солбуйааччы Татьяна Степанова, Дьааҥы улууһун баһылыгын I солбуйааччы Николай Корнилов, республика Национальнай архыыбын директора Николай Константинов, Курбуһах нэһилиэгин баһылыга Гаврил Бурнашев, интернат-дьиэ директора Василий Аммосов, Николай Михайлович кэргэнэ Мария Иннокентьевна Винокурова, кыыһа «Сахамедстрах» АО эксперт-бырааһа Яна Винокурова, күтүөтэ “СӨ государственнай сакааска сулууспатын” генеральнай директорын солбуйааччы Федор Босиков уонна сиэннэрэ, аймахтара, интернат-дьиэ олохтоохторо, үлэһиттэрэ кытыннылар.
Мемориальнай дуоска арыллыытын сиэрин-туомун ыытааччы мустубут дьон истиитигэр биир дойдулаахтара Николай Винокуров өрөспүүбүлүкэ таһымыгар үлэлиир сылларыгар күүскэ туруорсубутун түмүгэр  2007 сылы көрсө өрөспүүбүлүкэ салалтата бу кыраһыабай, толору хааччыллыылаах дьиэни туттаран, нэһилиэк дьоно үөрүүлэрэ үрдээбитин, салгыы нэһилиэк, улуус общественноһын көрдөһүүтүнэн Ил Түмэн спикерэ, Курбуһах нэһилиэгин бочуоттаах гражданина Александр Жирков туруорсуутунан 2015 сыл муус устар 30 күнүгэр Саха Өрөспүүбүлүкэтин Ил Дарханын 473 №-дээх ыйааҕа тахсыбытын нэһилиэнньэ биһирии көрсүбүтүн иһитиннэрдэ.

Александр Жирков интернат-дьиэҕэ Николай Михайлович Винокуров аата иҥэриллиитинэн олохтоохтору, сиэр-туом кыттыылаахтарын эҕэрдэлээн туран, спикер  Николай Михайлович 55 саастааҕар республика Үрдүкү Сэбиэтин XII ыҥырыытын, салгыы Ил Түмэн I ыҥырыытын депутатынан үлэлээбитин, өр сылларга республика Пенсионнай сулууспатын департаменын солбуйар директорынан, социальнай харалтатын миниистирин бастакы солбуйааччынан, ол иннигэр Усуйаана, Эдьигээн, Дьааҥы улуустарыгар оскуола учууталыттан, директорыттан саҕалаан, районо сэбиэдиссэйигэр, партия райкомун II секретарыгар, райсовет председателигэр тиийэ үүммүтүн, кэскиллээх улахан үлэни хоту ыыппытын туһунан бэлиэтээн эттэ. “Ол гынан баран кини “эдэр сааспар үлэлиир кыахтаах кэммэр дойдубар Уус-Алдаҥҥа, үлэлиэх-хамсыах баҕалааҕым, сааһыран баран, кэлин 50 сааспар бу Дьокуускай куораты булбутум, ол да кэннэ депутат эрэ буолан бараммын дойдубар тугу эмэни көмөлөһөн үлэлэһэ сатаатым” диэн миэхэ этэр этэ. Кини ити депутаттаабыт кылгас кэмигэр төрөөбүт улууһугар кадры үүннэриигэ, улахан тутуулар ыытыллыыларыгар, улуус кэскиллээх боппуруостарыгар дьоҥҥо ыллыктаах тылын тиэрдэн  кэпсэтэн, олохтоохтук ылсыһан үлэлээбитэ. Республика үрдүкү салалтатыгар өр сылларга кэскиллээхтик үлэлээбитин аахсан, республика Ил Дархана кини аатын Курбуһах нэһилиэгин бу бөдөҥ тутуутугар иҥэрэр туһунан дьаһалы ылыммыта саамай сөптөөх, Николай Михайлович үтүө аатын үйэтитиигэ өссө биир түһүмэҕинэн буолуоҕа дии саныыбын”, — диэн бэлиэтээн эттэ уонна Н.М.Винокуров огдооботугар Мария Иннокентьевнаҕа сибэкки дьөрбөтүн туттарда.

Тыыл уонна үлэ ветерана, “Бочуот Знага” уордьан кавалера, доруобуйа харыстабылын, социальнай эйгэ туйгуна, Усуйаана улууһун бочуоттаах гражданина Мария Иннокентьевна кэргэнин биир дойдулаахтарыгар Николай Михайлович аатын умнубакка, үйэтитэ, кэриэстии сылдьалларыгар дьиэ кэргэнин аатыттан улахан махталын тиэртэ.
Бары тыл эппит дьон Николай Михайлович Винокуров республика социальнай сайдыыга министерствотыгар, Пенсионнай сулууспаҕа үлэлиир сылларыгар нэһилиэнньэ пенсиянан хааччыллыыта уонна социальнай өттүнэн көмүскэллээх буолуута үчүгэйдик тэриллибитин, пенсия уонна пособиелар кээмэйдэрэ улаатыытын көрөр сокуоннарга үлэлээһин күүскэ барбытын бэлиэтээтилэр. Ити сылларга нэһилиэнньэ сорох араҥатыгар: элбэх оҕолоох ыалларга, соҕотох ийэлэргэ, инбэлииттэргэ, сэрии, тыыл ветераннарыгар, кырдьаҕас дьоҥҥо уо.д.а. чэпчэтиилэр олохтонууларыгар Н.М.Винокуров үтүөтэ эмиэ баара этилиннэ. Тыл этээччилэр Н.М.Винокуров депутаттыыр сылларыгар үрдүк таһымнаах политик уонна парламентарий быһыытынан Саха сирин дьонун-сэргэтин тустарын Россия таһымыгар тиийэ туруорсары сатыыр дьоҕурдааҕын бэлиэтээтилэр. Кини депутат быһыытынан үлэтэ государственнай суверенитет туһунан Декларация, СӨ Конституцията ылыллыыларын кытта ыкса сибээстээх.

Николай Винокуров аата Саха сирин спордун эйгэтигэр киэҥник биллэр. Ол да иһин тыл этээччилэр көҥүл тустуу федерациятын бастакы президенин быһыытынан спорт бу көрүҥүн сайдыытыгар үтүөтэ улаханын бэлиэтээтилэр.

Интернат-дьиэ коллективыгар умнуллубат бэлиэ түгэн үйэлэр тухары өйдөбүлгэ хааллын диэн сиэр-туом уопсай хаартыскаҕа түһүүнэн түмүктэннэ.

Ил Түмэн пресс-сулууспата.