853
29 мая 2015 в 12:32
«Кыайбыттар көлүөнэлэрэ» бырайыакка ситиһии
Саҥардан оҥоһуллубут Өрөспүүбүлүкэтээҕи медиа-кииҥҥэ 1941-1945 сс. Аҕа дойду Улуу сэриитигэр Кыайыы 70 сылыгар анаммыт «Ким да умнуллубат, туох да умнуллубат» суруналыыстар куонкурустарын кыайыылаахтарыгар наҕараадалары үөрүүлээх быһыыга-майгыга туттарыы буолан ааста. Бу куонкуруһу СӨ бэчээт дьыалаларыгар уонна телевидениенэн, араадьыйанан биэриигэ Департамена биллэрбитэ.
Куонкуруска кыттыыга хаһыаттар, сурунааллар редакцияларын, айар түмсүүлэр, телевидение программаларын 36 коллективтарыттан уонна биирдиилээн суруналыыстартан, общественнай корреспонденнартан матырыйааллар киирбиттэрэ. Барыта 1000-ҕа чугаһыыр үлэлэртэн бастыҥнар талыллыбыттара. Номинациялар ааттара – «Үйэлээх өйдөбүл», «Кыайыыны тыылга уһансыбыттара», «Хайдах олороҕун, бэтэрээн?», «Сиргэ туох да суола-ииһэ суох ааспат».
Биһиги хаһыаппыт нууччалыы таһаарыытын корреспондена Ирина Романова, «Кыайыылаахтар көлүөнэлэрэ» бырайыагы көҕүлээччи уонна автор быһыытынан кытынна. Хаһыат бу бырайыагы Саха сиринээҕи Ем.Ярославскай аатынан Хоту сир норуоттарын историятын уонна культуратын судаарыстыбаннай холбоһуктаах музейын кытта ыытта. Ирина Романова «Хайдах олороҕун, бэтэрээн?» номинацияҕа кыайыылааҕынан таҕыста. Кини Аҕа дойду Улуу сэриитин туһунан ханна да урут тахсыбатах докумуоннары, хаартыскалары, матырыйааллары булан, туһанан, нүөмэртэн нүөмэргэ салҕаан суруйбута, ол Саха сирин дьонун кылаатын саҥалыы өттүттэн көрдөрөр. Коллегабытын дьоһун ситиһиитинэн эҕэрдэлиибит, өссө да айымньылаахтык үлэлииригэр баҕарабыт!
