781
02 июня 2017 в 11:08
Кыргызстан сурунаалыгар — саха бэйээттэрэ
Саха сирин уһулуччулаах судаарыстыбаннай деятелэ Максим Аммосов төрөөбүтэ 120 сылын көрсө Саха сиригэр Кыргызстан литературатын күннэрэ ыытыллыахтара. Бу Күннэргэ бэлэмнэнии былырыыҥҥыттан саҕаламмыта. Саха суруйааччыларыттан оробуочай бөлөх тэриллэн, Максим Аммосов үбүлүөйүгэр кыргыз суруйааччыларын айымньыларын тылбаастаммыт кинигэтэ тахсыаҕа. Ону сэргэ саха суруйааччыларын айымньылара кыргыз тылынан кинигэ буолан тахсыа.
Үбүлүөй тэрээһиннэрин чэрчилэринэн Саха сирин уонна Кыргызстан өрөспүүбүлүкэтин суруйааччылара биир ситимнээхтик үлэлииллэр. Бу күннэргэ Кыргызстан сурунаалыгар саха бэйээттэрин Наталья Михалева-Сайа, Мария Алексеева уонна Афанасий Гуринов хоһооннорун тылбаастаан бэчээттээбиттэр.
“Афанасий Гуринов салайааччылаах Кыргызстан биллэр суруйааччыларын айымньыларын тылбааһын оҥоробут. Былырыын онно бара сылдьан, Бактыгүл Чотуураба диэн суруйааччыны кытта билсибиппит. Кини уонна өссө атын кыргыз бэйээттэрин хоһооннорун тылбаастаан “Күрүлгэн” сурунаалга таһаарбыппыт. Өссө да салгыы таһаараары бэлэмниибит. Оттон соторутааҕыта Бактыгүл Чотуураба саха бэйээттэрин хоһооннорун тылбаастаан олохтоох сурунаалларыгар таһаарбыт. Биһиги хоһооннорбут кыргызтыы дорҕооннонон бу аймахтыы омукпутугар иһиллибититтэн үөрэбит эрэ”, — диэн бэйээт Наталья Михалева-Сайа “Ил Түмэн” хаһыакка сонунун үллэстэр.
