Үҥкүү, спорт уонна доҕордоһуу өрөгөйө!

Саха сиригэр оҕолору кэрэ эйгэтигэр уһуйар, кинилэр айар талааннарын сайыннарар араас ансаамбыллар, кэлэктииптэр үлэлииллэр. Олортон биирдэстэрэ, өрөс­пүүбүлүкэҕэ эрэ буолбакка, дойду таһымыгар тиийэ биллэр «Надежда» оҕо спортивнай-бальнай үҥкүү кулууба буолар. Бу күннэргэ кулууп 10 сыллаах үбүлүөйүн бэлиэтээри түбүгүрэ сылдьаллар. Уон сыл устата «Надежда» иитиллээччилэрэ тиһигин быспакка араас таһымнаах күрэхтэһиилэргэ кыттан, өрөспүүбүлүкэ чиэһин дьоһуннаахтык көмүскээн кэллилэр.

Спортивнай бальнай үҥкүү – аныгы кэмҥэ биир саамай кыраһыабай уонна киэҥник биллэр спорт көрүҥэ буолар. Бу көрүҥ искусствоны уонна спорду, күүстээх санааны уонна киһи этэ-хаана сайдыытын дьүөрэлиир. Кэнники кэмҥэ өрөспүүбүлүкэҕэ бальнай үҥкүү көрүҥэ киэҥник биллэр буолла.

2006 сыллаахха Дьокуускай куораттааҕы национальнай гимназия иһинэн гимназия дьаһалтатын уонна дириэктэр К.Н.Чиряев быһаччы өйөбүллэринэн «Надежда» спортивнай үҥкүү кулууба тэриллибитэ. Талааннаах оҕолору бэлиэтии көрөн, түмэн тардан кулуубу тэрийбит киһинэн гимназия ритмикаҕа үрдүкү категориялаах учуутала, СӨ култууратын үтүөлээх үлэһитэ, СӨ култууратын туйгуна Надежда Николаевна Константинова буолар. Спортивнай-бальнай үҥкүүгэ Россия 3-с категориялаах судьуйата, СӨ үҥкүү спордун Сойууһун президиумун чилиэнэ Надежда Николаевна күннээҕи түбүгүттэн сылайбакка, хас биирдии оҕону өрүү мичээр аргыстаах көрсөр солбуллубат салайааччы. Кулууп сүрүн сүбэһитинэн-амаһытынан, педагогунан Наталья Николаевна Попова үлэлии-хамсыы сылдьар. Кини тэрээһин боппуруостарынан дьарыктанар. «НАДЕЖДА» кулуупка 4-17 саастаах араас омук оҕолоро улаханнык баҕаран туран, сөбүлээн бальнай үҥкүүнэн дьарыктаналлар. Кинилэр саастарынан уонна спортивнай категорияларынан сэттэ бөлөххө арахсаллар.

Оҕо эт-хаан, тэтимнээх хамсаныы, музыкальнай, эстетическэй, уйулҕа өттүнэн сайдыыта үҥкүүттэн бэриллэр дииллэр. Оҕолор дьарык кэмигэр үҥкүү сүрүн хамсаныыларын баһылыыллар, турнирга уонна паркетка хайдах сөпкө тутта-хапта сылдьарга, бэрээдэккэ үөрэнэллэр. Үҥкүүһүт оҕолору кэрэ эйгэтигэр уһуйууга улахан болҕомто тиэхиньикэҕэ, истиилгэ, хореографияҕа уонна муусуканы сатаан истэр буолууга туһаайыллар. Итиэннэ үҥкүүнэн дьарыктанар оҕо бэйэтигэр эрэллээх буола улаатарыгар олук ууруллар.

«Надежда» иитиллээччилэрин сыралаах үлэлэрэ бэйэтин түмүктэрин көрдөрөр. Манна дьарыктанар оҕолор ситиһиилэрин киһи ааҕан сиппэт. Кулууп, төһө кыалларынан, бастыҥ иитиллээччилэрин Бүтүн Россиятааҕы уонна норуоттар икки ардыларынааҕы турнирдарга кытыннарар. Ол курдук, ааспыт сыллар уста­ларыгар оҕолор «Жемчужины России», «Московские звезды», «Российские звезды», «Классика», «Кубок Олимпа», «Майский Кубок», «Кубок Блэк», «Большой Кубок Эльфа» курдук үрдүк таһмынаах күрэхтэргэ ситиһиилээхтик кыттыбыттара. Надежда Николаевна этэринэн, оҕолор сылтан сыл аайы үҥкүүнү толорор таһымнара биллэ үрдээн иһэр. Кулууп иитиллээччилэрэ өрөспүүбүлүкэтээҕи уонна Россиятааҕы спортивнай күрэхтэргэ ситиһиилээхтик кыттан үҥкүү чыпчаалларыгар эрэллээхтик хардыылаан иһэллэр. Биллэн туран, ити барыта кинилэр салайааччыларын үлэтин түмүгэ буолар.

— Биһиги Москва куорат кулууптарын кытта доҕордуу сыһыаны олохтоон ыкса ситимнээхтик үлэлиибит. 2013 сылтан ыла үрдүк кылаастаах тренердэри ыҥыран спортивнай үҥкүүгэ аналлаах семинардары ыытабыт. Онно, холобура, оҕолор «Латиноамериканскай бальнай үҥкүүлэр», «Европа бальнай үҥкүүлэрэ» хайысхаларга А.Я.Гомельскай аатынан 4№-дээх Олимпйискай эрэл училищетын үҥкүү спордун салаатын старшай тренерэ, I категориялаах судьуйа Д.О. Чернышев ыытар практикумнарыгар сылдьан сатабылларын, маастарыстыбаларын үрдэти­нэллэр, – диэн кэпсиир Надежда Николаевна.

Кулууп оҕолорго иккис дьиэлэрин кэриэтэ буоларын быһыытынан үтүө үгэстэрдээх. Ол курдук, кинилэр сыл аайы Үҥкүү норуоттар икки ардыларынааҕы Күнүн бэлиэтииллэр. Бу күн сыл түмүктэрин таһааран сыл лидердэрин быһаараллар эбит. Ити түгэни оҕолор эрдэттэн олус долгуйа күүтэллэр. Бастыҥ актыбыыстарынан уонна лидердэринэн Кычкин Артемий, Панишев Никита уонна Цыганова Нина, Заостровскай Роман уонна Петрова Саина, Тихонов Никита уонна Заровняева Амелия, Петров Арылхан уонна Заостровская Ксения, Петров Максим уонна Гаврильева Люба, Слепцов Григорий уонна Торохова Ираника, Местников Сандал уонна Павлова Алина, Кириллин Денис уонна Сивцева Ньургуhун, Федоров Эрлик уонна Эверстова Таня, Васильев Валентин уонна Илларионова Марита уо.д.а. буолаллар.

«Надеждаҕа» дьарыктаммыт оҕолор оскуоланы бүтэрэн да баран үҥкүүнү, спорду кытта сибээстэрин быспаттар. Холобур, Саха сирин спортивнай үҥкүүгэ хас да төгүллээх чемпионнара Дмитрий Аммосов уонна Марина Кырджагасова оскуоланы бүтэрэн баран спортивнай карьераларын салҕаабыттар. Марина, тренерин туйаҕын хатарар баҕаттан, Санкт-Петербурдааҕы идэлээх сойуустар гуманитарнай университеттарыгар искусство факультетын бальнай хорео­графия салаатыгар туттарсан киирбит. Дмитрий – Дьокуус­кайдааҕы педагогическай колледж физкультурнай салаа­тын 2 кууруһун устудьуона.

«Надежда» иитиллээччилэрэ Дьокуускай куоракка ыытыллар араас тэрээһиннэргэ, аһымал кэнсиэрдэргэ көхтөөхтүк кытталлар. Сырыы аайы көрөөччүлэр сөҕүүлэрин, сэҥээриилэрин уонна биһирэбиллэрин ылыахтарын ылаллар. Итиэннэ кулууп сыл аайы «Первые шаги», «Юные Надежды» диэн бальнай үҥкүүүгэ өрөспүүбүлүкэтээҕи куонкурустары тэрийэн ыытар.

Үҥкүүгэ тас кэрэ көстүү ис эйгэ кэрэтин кытта быстыспат. Бу икки кэрэ алтыһыыта, сөпсөһүүтэ оҕо сиэр-майгы өттүнэн сайдарыгар уонна кэрэҕэ тардыһыыта күүһүрэригэр төрүөт буолар. Оҕолор бэйэ икки ардыларыгар сыһыаннарыгар эйэҕэс буолалларыгар, үрдүк култуураҕа, кэрэҕэ тардыһыыларыгар үҥкүү кэрэ эйгэтэ туһалыырын туһунан элбэхтик суруйаллар. Үҥкүү нөҥүө иитиллэн тахсыбыт, олоххо үгүс ситиһиилэммит үгүс киһини билэбин. Кырдьык, олоххо көстөрүнэн, кыра саастарыттан үтүөҕэ, кэрэҕэ уһуйуллубут оҕолор куһаҕан дьаллыкка ылларбаттар, сыстыбаттар.

Кулууп бастакы үктэлиттэн үҥкүү абылаҥар оҕолору үөрэтэн, салайан кэлбит Надежда Николаевнаҕа уонна кини иитиллээччилэригэр үрдүктэн-үрдүк ситиһиилэри баҕарабыт! «Надежда» кулууп суон сураҕа киэҥник иһиллэ, биллэ турдун диэн баҕа санаабытын тиэрдэбит! «НАДЕЖДА» – үҥкүү, спорт уонна доҕордоһуу өрөгөйө!