Норуот култуурата – дойдубут сайдыытын бигэ тирэҕэ

Соторутааҕыта Пермь куоракка ыытыллыбыт форум кыттыылаахтарын кытта көрсүһүү Өрөс­пүүбүлүкэтээҕи мөл­төхтүк көрөр оҕолор коррекционнай оскуолаларыгар буолла. Көрсүһүүнү саха тылын уонна култууратын учуутала Мария Ушницкая-Алехина тэрийэн ыытта.
Тэрээһиҥҥэ форум кыттыылаахтара эбэҥки таҥаһын-сабын, араас олоххо-дьаһахха туттуллар малын-салын, тээбириннэрин аҕалан кырачаан көрөөччүлэри олус сэргэхситтилэр. Ол курдук, Эдьигээн оройуонун култууратын управлениетын салайааччыта Ирина Бурцева Эдьигээн туһунан сиһилии кэпсээтэ, эбэҥки тылынан тахсыбыт кинигэлэри, буклеттары билиһиннэрдэ, оскуолаҕа бэлэх гынан хаалларда. «Синилгэчээн» оҕо ансаамбыла уонна эбэҥки ырыатын толорооччу, норуот маастара Тамара Винокурова оҥоһуктара дьону олус сэргэхситтэ. Оскуола оҕолоро бэйэлэринэн эбэҥки таҥаһын тутан-хабан, оннооҕор кэтэн хааман көрдөрдүлэр. Тамара Васильевна национальнай таҥаһын хайдах тигэрин, тириини имитэрин ымпыгар-чымпыгар тиийэ кэпсээтэ. Балык тириититтэн кытта тигиллибит таҥас оҕо аймах болҕомтотун тарта. Онон үөрүүлэрэ үксээтэ, эбэҥки норуотун култууратын олус сэргээтилэр.

Оскуола иһинэн үлэлиир “Алаас” уонна “Тигинэт” куруһуок иитиллээччилэрин музыкальнай толоруулара тэрээһини киэргэттэ.
Бу Бүтүн Арассыыйатааҕы форум Пермь куоракка төрдүс төгүлүн ыытыллар. Тэрээһин сүрүн сыала – Арассыыйа норуоттарын ураты култууратын, олоҕун-дьаһаҕын кытта билсии, доҕордоһуу былаһааккатын тэрийии. Манна Саха сириттэн Эдьигээн улууһун делегацията кытынна. Маастар-кылаастарга саха уонна эбэҥки норуотун ураты оҥоһуктарыттан чороону, кытыйаны, туос иһиттэн оҥоһуллар иһит араас көрүҥүн, саха таҥаһын билиһиннэрэр кинигэлэри, альбомнары көрдөрдүлэр. Тириини таҥастааһын, иискэ туттуллар ньымалары, олоххо-дьаһахха хото туттуллар малы-салы оҥоруу туһунан кэпсээтилэр. Маны таһынан саха, эбэҥки норуоттарын национальнай оонньууларын билиһиннэрдилэр.
Форум ыалдьыттара, көрөөччүлэр норуот бэйэтин култууратын, сэргэх оонньууларын умнууга хаалларбакка илдьэ сылдьара олус кэрэхсэбиллээх диэн бэлиэтээтилэр. Былыр-былыргыттан илдьэ кэлбит туттар сэп-сэбиргэл билигин да суолтата сүппэтин, норуот муудараһа ити оҥоһуктарга көстөрүн тоһоҕолоон бэлиэтээтилэр.

Ирина ХАНДЫ.