Оҕолор куукула нөҥүө Олоҥхоҕо сыстыахтара

Тэрээһини “Саха сирэ” хаһыат кылаабынай эрэдээктэрэ Чокуур Гаврильев салайан ыытта. Манна СӨ үөрэххэ миниистирин солбуйааччыта Василий Гуляев, СӨ үөрэх министиэристибэтин сүрүннүүр специалиһа Туйаара Абрамова, филологическай наука дуоктара, фольклору чинчийээччи Василий Илларионов, Национальнай оскуолалары чинчийэр научнай институт старшай үлэһитэ Диана Ефимова уонна Дьокуускай куорат оҕо садтарын иитээччилэрэ кытыннылар. “Төгүрүк остуол” кыттыылаахтара олоҥхо эйгэтин хайдах кэҥэтэр туһунан уопут атастаһыы бэрээдэгинэн дьүүллэстилэр. Кинилэр оҕо олоҥхоҕо уһуйаантан саҕалаан сыстан улаатыахтаах диэн бэлиэтээтилэр. Былырыын Олоҥхо Уон сылын бэлэмнээн ыытыыга Саха Республикатын Национальнай тэрийэр кэмитиэтин бэрэссэдээтэлэ Александр Жирков оҕолору үөрэтиигэ-иитиигэ туттуллар саха норуотун фольклорун, эпоһын темаларыгар национальнай куукулалар, оонньуурдар бэйэ оҥоруута буолбакка, оҕо кэрэхсиир гына фабрикаҕа оҥоһуллубут үчүгэй хаачыстыбалаах буолуохтаахтарын, ону оҥорторуу үбүлээһинин министерство былааныгар киллэрэн, 2015 сылга оҕо садтарыгар дэлэйдик тарҕатар наадатын эппитэ. Бу боппуруос олоххо киириитигэр ылсан үлэлэһэр, оҕолору олоҥхоҕо уһуйарга, кинилэр болҕомтолорун тардар олоҥхо персонажтарынан куукулалары Кытай собуотун кытта дуогабардаһан оҥотторо сылдьар Софья Попова куукулалар матырыйаалларын, тас көстүүлэрин туһунан сиһилии кэпсээтэ. Кини этэринэн, маннык куукулалары аан дойдуга Индонезияҕа уонна Кытайга эрэ үчүгэйдик оҥороллор эбит. Оонньуурдары оҥорууга олоҥхо геройун майгыта-сигилитэ, дьүһүнэ-бодото, быһыыта-таһаата, туттар сэбэ-сэбиргэлэ барыта учуоттаныллыахтаах. Сотору кэминэн оҕо садтарын иитиллээччилэрэ олоҥхо персонажтарынан оҥоһуллубут куукулаларынан оонньоон саха норуотун тылынан уус-уран чыпчаалын – Олоҥхо эйгэтигэр сыстыахтара.

Мария ПАВЛОВА.