Олохтоохтор спорт саалатын, үүт харчытын туоһуластылар

Тохсунньу 25 күнүгэр Хара нэһилиэгэр кэпсэтии бэрт сэргэхтик уонна аһаҕастык барбыта бэлиэтэннэ. Олохтоохтору долгутар боппуруоһунан, ханна баҕарар буоларын курдук, бастатан туран, Уһук Илиҥҥэ биирдии гектардаах сири түҥэтии тиэмэтэ таарылынна. Онон Ил Түмэн депутаттара ити боппуруоска бэйэлэрин санааларын үллэһиннилэр, дьоҥҥо-сэргэҕэ бэйэлэрин сирдэрин бас билэллэрин туһунан туоһулуур докумуоннары түргэнник оҥоттороллоругар сүбэлээтилэр.
Отчуоттааччылар Ил Тү­мэҥҥэ үлэ-хамнас хайдах баран иһэрин, Саха сирэ кэнники сыллар көрдөрүүлэринэн, дойду үрдүнэн 10 бастыҥ регион ахсааныгар киирсибитин эттилэр. Юрий Баишев элбэх оҕолоохторго сокуоннары тобуларга туох-ханнык уустуктар баалларын ыйда. « эйгэтигэр Уһук Илин регионнарын ортолоругар Саха сирэ биир бастыҥнара буолар итиэннэ саха төрүт оонньууларын тарҕатыыга сүрүн тосхоллор, былааннар ылылыннылар», – диэн эттэ. Кини өрөспүүбүлүкэ таһымыгар мэҥэлэр үгүс ситиһиилэрдээх спортивнай улуус аатын сүкпүттэрэ түбэһиэхчэ буолбатаҕын – улуус баһылыга Николай Старостин, Ходоро нэһилиэгин баһылыга Алексей Васильев спорду бастыҥ тарҕатааччылар буолалларын, Василий Егоров улахан дьоҥҥо, Алексей Копылов оҕолорго бастыҥ спортсмен ааттарын ылбыттара элбэҕи этэрин тоһоҕолоон бэлиэтээтэ.
Бочуоттаах сынньалаҥҥа олорор Николай Дмитриев Хараҕа спортивнай саала тутуллуутун 40-тан тахса сыл кэриҥэ кэтэспиттэрин кэпсээтэ. Депутаттар спортивнай сааланы туттарыы ханнык бырагыраамаҕа киирсиэн сөптөөҕүн үөрэтэр үлэлэр бара туралларын билиһиннэрдилэр. Билиҥҥи туругунан, саала көҥдөйө бүтэригэр үп-харчы баар эбит уонна элбэх спортсмены иитэн таһаарбыт, Саха сиригэр үчүгэй көрдөрүүлээх нэһилиэк спортивнай саалаланарыгар үлэлэһэбит диэн эттилэр. Биллэрин курдук, кэнники сылларга улууспутугар олорор дьиэлэр, оскуолалар тутуллууларыгар депутаттарбыт таһаарыылаах үлэлэрэ-хамнастара улахан оруолу ылар.
Хара нэһилиэгин олохтооҕо Владимир Аргунов үүт харчыта үрдээһинин, оскуола дириэктэрэ Николай Бугаев үлэһиттэргэ сайыҥҥы сынньалаҥнарыгар барар-кэлэр ороскуоттарын, ойуур хаһаайыстыбатын үлэһитэ Дмитрий Дмитриев олорор дьиэлэри киин ситимҥэ холбооһуну, «Мыла» бааһынай хаһаайыстыба салайааччыта Дмитрий Назаров сэлии муоһун (мамонт) хостооһунун уонна көмүһү лотуогунан суурайан ылыы курдук бүтүн сахалары долгутар боппуруостары туоһуластылар.
Хара нэһилиэгин баһылыга Дария Назарова уонна оройуоннааҕы депутаттар Сэбиэттэрин бэрэссэдээтэлэ Андрей Находкин Ил Түмэн сис кэмитиэттэрин бэрэссэдээтэллэрин, улуус олохтоохторун ааттарыттан турбут депутаттары кытта ыкса ситимнээхтик үлэлииллэрин эттилэр. Кинилэр норуокка чугас, дойдуларыгар бэриниилээх буоланнар кыһалҕалаах боппуруостары тэҥҥэ быһаарса олороллоруттан үөрэллэрин уонна махтаналларын биллэрдилэр.

Виктория БЕЛОЛЮБСКАЯ
«Эркээйи» хаһыат корреспондена,
Мэҥэ-Хаҥалас улууһа.

Ааптар хаартыскаларга түһэриитэ.