Ойуунускайы ааҕабыт

«Ойуунускайы ааҕабыт» бырайыак — бу өрөспүүбүлүкэ үрдүнэн ыытыллар акция. Ити Былатыан Ойуунускайга бүгүҥҥү көлүөнэ ураты өйдөбүнньүгүн уонна махталын кэрэһилиир тэрээһин буолуоҕа. «Дьулуруйар Ньургун Боотур» олоҥхону ааҕыахпыт. Бу акциянан биһиги олоҥхону ааҕыы култууратын дьоҥҥо иӨэриэхпитин баҕарабыт: олоҥхону истэ үөрэннэхпитинэ уонна улуу эпоһы өйдөөтөхпүтүнэ, нация быһыытынан хаһан да сүтэн хаалыахпыт суоҕа. ТЫЛ тыыннааҕын тухары, кинини баһылаабыт норуот өлбөт үөстээх», – диэн кэпсээтилэр тэрийээччилэр.
Акцияҕа анаан кыра киинэҕэ устуу бэлэмнэммит, онно олоҥхоттон быһа тардыылары өрөспүүбүлүкэ биллэр дьоно ааҕаллар – кинилэр холобурдара олоҥхону ааҕыыга интэриэһи көбүтүөҕэ. «Хас биирдии саха олоҕун тухары саатар биир эмэ олоҥхону ааҕан өйдөөтөҕүнэ, саха нацията аан дойдуга саамай үөрэхтээх уонна култууралаах омуктартан биирдэстэрэ буолуоҕа», – диэн ааҕар Олоҥхо театрын уус-уран салайааччыта Андрей Борисов.
Акцияны тэрийээччилэр «Дьулуруйар Ньургун Боотуру» тус-туспа кинигэлэринэн таһаарыы боппуруоһун көтөҕөр санаалаахтар. Оттон бүгүҥҥү күҥҥэ бу улахан кээмэйдээх кинигэни илиигэ тутар ыарахан. Олоҥхо бэйэтэ 9 ырыаттан турар, онон кинини тус-туһунан 9 томунан хаачыстыбалаахтык ойуулаан-киэргэтэн таһаарар табыгастаах буолуох этэ. Оччоҕуна кинигэни ыраах айаҥҥа илдьэ сылдьыахха, доҕотторго бэлэхтиэххэ сөп, уонна, саамай сүрүнэ, олоҥхо ааҕыллар буолуоҕа, диэн акцияны тэрийээччилэр эрэнэллэр.
Ити туһунан сэтинньи 11 к., Былатыан Ойуунускай төрөөбүт күнүгэр, Национальнай библиотека Историческай саалатыгар кэпсэтии ыытыллыаҕа. Манна олоҥхону үөрэтээччилэр, учуонайдар, кинигэ таһаарааччылар уонна саха интеллигенциятын бэрэстэбиитэллэрэ кыттыахтара.