18 сентября 2015 в 12:03

Польшаттан: сахалар бастыҥ охсооччулар

Польша Белосток куоратын таһыгар баар Бебжанскай диэн дойду бөдөҥ национальнай пааркатын сиригэр-уотугар илиинэн от охсуутугар норуоттар икки ардыларынааҕы күрэхтэһии буолан ааста. Онно биһиги биир дойдулаахтарбыт сахалар өбүгэ саҕаттан илдьэ кэлбит дьарыкпытыгар атын омуктартан хаалсыбаппытын ааһан, баһыйар кыахтаахпытын көрдөрдүлэр.

Мооруктан төрүттээх Мэлдьэхси олохтооҕо, Аллараа Бэстээххэ биир кэлим диспетчерскэй сулууспа оперативнай дьуһуурунайа Вячеслав Окороков уонна Алтантан төрүттээх Майа олохтооҕо,Муниципальнай баайы-дуолу бас билиигэ агентство салайааччыта Дмитрий Тихонов Саха сирин эрэ буолбакка, Россия чиэһин ситиһиилээхтик көмүскээбиттэринэн астынабыт, киэн туттабыт. Кинилэр былырыын Россияҕа илиинэн от охсуутугар ыытыллыбыт күрэхтэһиигэ кыайыылааҕынан ааттаммыттара. Республикаҕа от охсуутугар сыллата ыытыллар «Күүлэй» күрэхтэһиилэрин сэҥээрэр, кэтээн көрөр дьон Саха сиригэр бастыҥ охсооччулар баалларын бэркэ билэллэр.

Польшаҕа ыытыллыбыт күрэхтэһиигэ Россия аатыттан соҕотох хамаанда туруоран, биһиги биир дойдулаахтарбыт 32 хамаанда күрэхтэспититтэн бириистээх иккис миэстэни ылары ситистилэр. Манна Канада, Чехия, Германия, Словакия, Венгрия, Беларусь уонна Польша дойдуларыттан хамаандалар күрэхтэстилэр. Бэрт эрийсиилээх күрэхтэһии түмүгүнэн хаһаайыттар – поляктар бастаатылар. Спорка сыһыаннаан этэллэригэр дылы, кинилэргэ «төрөөбүт истиэнэлэрэ» да көмөлөстөҕө. Биһиги уолаттарбыт үс хамаанданы туруорбут күүстээх белорустары баһыйбыттара кинилэр чахчы да кыахтаахтык киирсибиттэрин туоһулуур.

Кыттааччы хамаандалар бэрэстэбиитэллэригэр зачету таһынан 25 миэтэрэҕэ туспа күрэхтэһии ыыппыттара сэҥээриини ылла. Барыта 30 киһи илин-кэлин түһүстүлэр. Онно биһиги хамаандабыт бэрэстэбиитэлэ, биир дойдулаахпыт, Ил Түмэн депутата Александр Романов кыайыылаах тахсан, уолаттарбыт ситиһиилэрин өссө чиҥэтэн биэрэн, сахалар илиинэн оту охсууга лаппа кыахтаахпытын итэҕэттэ.

Ил Түмэн пресс-сулууспата «Эркээйи»
хаһыат матырыйаалынан.