Өрөспүүбүлүкэ саҥалыы сайдыытын түстээбитэ Биллиилээх бэлитиическэй уонна судаарыстыбаннай дьиэйэтэл Семен Захарович  Борисов олоҕун уонна үлэтин туһунан кэпсиир кинигэ «Өрөспүүбүлүкэ чулуу дьоно» сиэрийэнэн «Бичик» кинигэ кыһатыгар бэчээттэнэн, күн сирин көрдө. Балаҕан ыйын 21 күнүгэр 2№дээх бырабыытылыстыба дьиэтин саалатыгар кинигэ сүрэхтэниитэ буолла.Һөрүүлээх тэрээһиҥҥэ  Ил Түмэн спикерэ Александр Жирков, парламент бэрэссэдээтэлин бастакы солбуйааччы Анатолий Добрянцев, вице-спикер Виктор Губарев, норуот дьокутааттара Александр Уаров, Александр Романов, Юрий Баишев, Дмитрий Саввин, Петр Аммосов, бастакы вице-премьер э.т. –   өрөспүүбүлүкэ баһылыгын уонна бырабыыталыстыбатын дьаһалталарын салайааччыта Юрий Куприянов,  С.З. Борисов биир дойдулаахтара, алтыспыт дьоно,  Мэҥэ-Хаҥалас улууһу уонна  өрөспүүбүлүкэ уопсастыбаннаһын бэрэстэбиитэллэрэ кытыннылар.

Ыспыраапка: Семен Захарович Борисов 1991 сыл атырдьах ыйын 24 күнүгэр Мэҥэ-Хаҥалас улууһун Тыыллымы нэһилиэгэр төрөөбүтэ. 1926 сыллаахха Ороссолуода сэттэ кылаастаах, онтон Дьокуускай иккис сүһүөхтээх оскуолаларын бүтэрбитэ. Нөөрүктээйи сэбиэтин сэкирэтээринэн, МэӨэ-ХаӨалас оройуоннааҕы ситэриилээх кэмитиэтин салаатын сэбиэдиссэйинэн, Сунтаар оройуонун ситэриилээх  кэмитиэтин бэрэссэдээтэлинэн, сүөһү иитиитин миниистиринэн, Саха АССР Миниистирдэрин Сэбиэтин бэрэссэдээтэлинэн,   1951-1965 сс. ССКП Саха уобаластааҕы кэмитиэтин бастакы сэкирэтээринэн үлэлээбитэ.     Кинигэ киирии тылын спикер Александр Жирков суруйбут. Кини кинигэ тула кэпсэтиигэ, санаа атастаһыытыгар бэйэтин сыанабылын биэрдэ. «Бастакы бэрэсидьиэммит Михаил Николаев туруорсуутунан Максим Аммосов, Илья Винокуров, Василий Никифоров-Күлүмнүүр умнууга сылдьыбыт ааттара төннөрүллүбүттэрэ. Семен Борисов сырдык аата эмиэ дорҕоонноохтук ааттаммыта. 2011 сыллаахха 100 сыллаах үбүлүөйүн бэлиэтээбиппит. История сыыһа-халты тахсарыттан сайдыбат. Улуу дьоммутун умнууга ыыппыт сыыһабытын көннөрүүбүт, биһиги норуот быһыытынан мындырбытын, кэскиллээхпитин туоһулуур», — диэтэ. Ил Түмэн бэрэссэдээтэлэ Семен Борисов өрөспүүбүлүкэни салайбыт кэмэ бүтүн Арассыыйа историятыгар суолталааҕын бэлиэтээтэ. «Мин кинигэ ааптара Афанасий Павлович Кириллин оҥорбут сүдү үлэтин бэлиэтиэхпин баҕарабын. Кини сэрии кэннинээҕи кэми чинчийэн, үөрэтэн, оччотооҕу быһыыны-майгыны чахчы дьэӨкэтик ойуулаан көрдөрбүт. Сэриигэ Ис кыаҕын уонна киһи ресурсатын сэрии ыар сылларыгар бараабыт өрөспүүбүлүкэҕэ промышленность салаата диэн суоҕун кэриэтэ этэ. Семен Борисов улахан өйдөөх салайааччы быһыытынан кимиилээхтик туруорсан аҕыйах сыл иһигэр өрөспүүбүлүкэ экэниэмикэтэ охсон тахсарын ситиспитэ. Семен Захарович, туох-ханнык иннинэ,  өрөспүүбүлүкэ ис кыаҕар тирэҕирэр наадатын өйдөөн, алмаас, гаас, ньиэп, чох  бырамыысыланнастара тэриллэллэрин утумнаахтык туруорсубута.  Саха сирэ уунан уонна салгынынан сылдьыһар бигэ тирэхтээх суолламмыта, Баартыйа обкомун 1-кы сэкирэтээрэ киэҥ өйдөөх-санаалаах, үрдүкү салалтатыгар тылын тиэрдэр уонна ылыннарар дьоҕурдаах, дьулуурдаах, таһымнаах, билиилээх салайааччы, эрэнэр дьонноох буолан, өрөспүүбүлүкэ кылгас кэм иһигэр баараҕай сайдыы суолугар үктэммитэ. Семен Борисов өрөспүүбүлүкэни салайар кэмигэр каадырдары иитиигэ уонна үүннэриигэ улахан үлэ ыытыллыбыта», — диэтэ.