1208
23 октября 2015 в 16:21
«Сааскы кэм» романынан уус-уран киинэ уһуллуоҕа
2016 сыл Россияҕа киинэ сылынан биллэриллэн турар. Быйылгы литература сылын түмүктүү, кэлэр сыл киинэ сылын көрсө соторутааҕыта Таатта улууһа муниципальнай оройуон баһылыга Михаил Соров уонна “Сахафильм” государственнай национальнай кинокомпания салайааччыта Дмитрий Шадрин бииргэ үлэлиир туһунан сөбүлэһиигэ илии баттаатылар.
2016 сылга Амма Аччыгыйа 110 сыллаах үбүлүөйүн көрсө “Сахафильм” икки улахан бырайыагы олоххо киллэриигэ ылыста. Ол курдук “Сааскы кэм” романынан уус-уран киинэ уонна Амма Аччыгыйа олорон ааспыт олоҕун баар чахчыларыгар олоҕуран документальнай киинэ уһуллаллара былааннанар. Маныаха “Таатта улууһа” муниципальнай оройуон дьаһалтата, улуус нэһилиэктэрэ, “Амма кырдаллара” ыччат общественнай хамсааһына бу бырайыактар олоххо киириилэригэр үлэлииргэ бэлэмнэрин биллэрдилэр.
“Сааскы кэм” уус-уран киинэ бастакы уһуллуута “Сахафильм” уонна “Таатта улууһа” муниципальнай оройуон дьаһалтатын кыттыгас үбүлээһиннэринэн кулун тутар ыйтан саҕаланара былааннанар. Дмитрий Шадрин иһитиннэрбитинэн, киинэҕэ уһуллуохтаах артыыстар 85%-нара олохтоох дьонтон талыллыахтара.
СИА.
