Сиэн Мунду этиитигэр сөпсөһөбүн

Сиэн Мунду олоҕун аргыһынаан «Култуура» ханаалынан суруйааччы Лев Толстой аатырбыт «Война и мир» романын дойду араас муннугуттан артыыстар, музей үлэһиттэрэ, араадьыйа ыытааччылара, стилистэр, ырыаһыттар, о.д.а. идэлээх дьон ааҕалларын көрөн баран, биһиги, сахалар, күөх экранынан олоҥхобутугар маннык бүттүүн норуот ааҕыытын тэрийдэхпитинэ диэн бэртээхэй санаа көтөн түспүт.
Классиканы ааҕыы умнуллубута баар суол. Бу бырайыак ааптардара дьону-сэргэни уус-уран айымньыга, ааҕар үөрүйэххэ тарда сатаабыттара көстөр. Кинилэр улахан тэрээһин үлэтин ыыппыттар.
Мин саныахпар, норуоппут эпоһыгар маннык бырайыагы толкуйдаан тэрийдэхпитинэ, олоҥхобутун сырдатыыга, киэҥ эйгэҕэ таһаарыыга элбэх киһини хабыах, тардыах этибит. Быйыл өрөспүүбүлүкэҕэ биллэриллибит Олоҥхобут 10 сыла түмүктэнэр. Ити бэлиэ түгэҥҥэ үгүс ахсааннаах киһини хабар бырайыагы олоххо киллэрдэхпитинэ, улахан кыайыы буолуох этэ. Бырайыагы Олоҥхо ыһыахтарын ыыппыт улуустарыттан саҕалыахха баара. Олохтоох телестудиялары кыттыһыннаран, дьиэ эрэ иһигэр буолбакка, айылҕаҕа эмиэ уһуллахпытына, кырдьык, дьон-сэргэ интэриэһин тардыа этибит.

Людмила НОГОВИЦЫНА.