21 октября 2016 в 09:09

«Созвездие Марии» пьесанан уһуллубут киинэни норуоттар икки ардыларынааҕы V-с фестивалга көрдөрүөхтэрэ

«Созвездие Марии» пьесанан уһуллар киинэҕэ анаан Карелияҕа тутуллубут аатырбыт «Якутск» дубель-шлюпка куоппуйатын Ладожскай күөлгэ устуохтара. Оттон киинэни бэйэтин 2017 сылга ыытыллар норуоттар икки ардыларынааҕы V-c киинэ фестивалыгар көрдөрүөхтэрэ.

«Якутск» Дубель-шлюпка Владимир Федоров пьесатынан уһуллар «Созвездие Марии» киинэҕэ биир сүрүн миэстэни ылар. Киинэ сүрүн түгэннэрин бу шлюпкаҕа устуохтара. Судуна XVIII-с үйэтээҕи чэрчинэн үтүгүннэрэн Карелияҕа оҥоһулунна.

«Бастаан утаа дубель-шлюпканы Дьокуускайга дьиҥнээх история буолбут сиригэр устар санаалаах этибит. Ол эрээри шлюпканы тутар кыахпыт суоҕа. Оттон бэлэм тутуллубуту Дьокуускайга аҕалыы кэмин куоттарбыппыт: Өлүөнэ өрүһүнэн судно устуута атырдьах ыйыгар түмүктэнэр. Онон киинэбит дьоруойдарын курдук мууска хаайтарыахпытын сөп балаһыанньата тыҥаабыта. Саха сирин айылҕатыгар, сиригэр-уотугар майгынныыр сири Карелияҕа Ладожскай күөлгэ булбуппут», — диэн «Каро-Продакшн» киинэ компаниятын салайааччыта Юрий Обухов эттэ.

Эдэр режиссер Дмитрий Суворов үлүһүйэн туран киинэни устар: «Биһиги санаабытыгар кини киинэ матырыйаалын сиһилии үөрэппит. Көрөргө үчүгэй, иэйиилээх киинэни уста сатыыра харахха быраҕыллар. Итини кыайыаҕа дии саныыбыт», — диир кини.

Режиссер уонна артыыстар билигин Карелияҕа үлэлииллэр. Альынньы 23-24 күннэригэр Булуҥ улууһугар киинэни устуохтара. Онно олохтоохтор кыттыыны ылыахтара. Ол кэнниттэн устар бөлөх Москваҕа тиийиэҕэ. Бүтэһик эпизодтары ыам ыйыгар Санкт-Петербург куоракка устуохтара.

Витус Беринг оруолун Арассыыйа норуотун артыыһа Валерий Баринов оонньуур. Семен Челюскины Евгений Ткачук.

Киинэҕэ Витус Беринг экспедициятыгар киирэр хоту сир чинчийээччилэрэ кэргэннии Василий уонна Татьяна Прончищевтар, Семен Челюскин Лаптев муоратынан, Өлүөнэ өрүһүнэн айаннара ойууланар.