Учууталы уруйдаабыттар

«Үйэни көрсө – баҕа санаа туолуута» диэн 402 страницалаах кинигэ киэҥ сэҥээриини тарта. Манна чулуу педагог, общественнай деятель, Саха сирин суруйааччыларын I Съеһин делегата, Өймөкөөн оройуонун үөрэҕириитигэр улахан кылаатын киллэрбит Иван Иванович Готовцев ыарахан дьылҕатын туһунан кэпсэнэр, кини айымньылаах үлэтэ, олоҕо-дьаһаҕа биллэр-көстөр өйөбүлэ суох ааспытын үрдүнэн, үйэлээх өйдөбүл көрүҥүнэн кинигэ буолан, үйэтийэр суолга киирдэ.
Кинигэ бастакы аҥаарыгар ахтыылар уонна педагог И.И.Готовцев бэйэтин суруйуулара киирбиттэр. Олору чиҥэтэн 23 устуука хаартыска хомуллан киириитэ бу кинигэни киэргэппит.
Кинигэ иккис аҥаарыгар И.И.Готовцев «Кыыс дьылҕата» сэһэнэ уонна кэпсээннэрэ, оччотооҕу кэм туоһуларынан буолар дневнигиттэн быһа тардыылар ааҕааччы болҕомтотун тардыахтара. Ити сонун ис хоһоонноох, тутуллаах айымньыларга И.И.Готовцев айар талаанын суола-ииһэ дьэҥкэтик көстөрүн сөҕө-махтайа аахтым.
И.И.Готовцев поэзия эйгэтигэр холонуутун «Эбэ хайата» хоһоонтон билиэххэ сөп. Сөбүлээбиччэ, ону бу сурук ааптара нууччалыы тылбаастаат, электронканан Васильева Т.Е. төрөппүт кыыһыгар ыыппытым.
Аҕа дойдуну фашистскай Германия халабырдьыттарыттан көмүскүүр, кинилэри утары сэриилэһэр кэмҥэ И.И.Готовцев үс саҥа оскуоланы туттаран олоххо киллэриитин оччотооҕу кэмнэргэ Саха АССР Үрдүкү Сэбиэтин Президиумун бэрэссэдээтэлэ үрдүктүк сыаналаабатах, бэркэ диэн бэлиэтээбэтэх, барҕарыы хамсааһыныгар махтал суругу суруйбатах! Оннук сүөргү көстүүнү ааҕааччылар да, киһи да быһыытынан харааста ааҕаргытыгар саарбахтааһын суох. Кэм да биһиги киһи үтүөтүн-өҥөтүн кэмигэр бэлиэтии көрбөт-истибэт итэҕэстээхпит.
И.И.Готовцев эккирэтиигэ сылдьыбытын, оччотооҕу салайааччылартан киһи кэлэйэр түгэннэрэ кинигэҕэ элбэхтэр. И.И.Готовцев төрөөбүтэ 100 сылыгар аналлаах кинигэ кини сырдык аатын норуокка төнүннэрдэ.

Николай КОРНИЛОВ – Сардаҥа.