Ыччакка үтүө холобур буолуохтара

«Олоҕум суола» кинигэҕэ ааптар бэйэтин олоҕун, өрөс­пүүбүлүкэ араас улуустарыгар, тэрилтэлэригэр, өрөспүүбүлүкэ салалтатыгар өр сыллаах үлэтин кэпсиир, дьонугар-сэргэтигэр, ыччакка, өрөспүүбүлүкэ бүгүҥҥү салайааччыларыгар баҕа санаатын тиэрдэр.

Оттон «Олоҕум аргыстара» кинигэҕэ Семён Захарович Борисов, Гавриил Иосифович Чиряев, Александра Яков­левна Овчинникова, Михаил Ефимович Николаев, Егор Афанасьевич Борисов, Дмит­рий Николаевич Миронов, Александр Константинович Акимов, Евгения Исаевна Михайлова, Матвей Ни­колаевич Евсеев, Филипп Гаврильевич Охлопков, Петр Константинович Ефимов, Иван Егорович Соломов уо.д.а. бииргэ үөрэммит, үлэлээбит, алтыспыт үөлээннээхтэрин тустарынан суруйар. Кинигэлэр ааҕааччы киэҥ араҥатыгар туһуланаллар.
«Хас биирдии киһи бэйэтэ олорон ааспыт историческай кэмин туоһутунан эрэ буолбакка, ол кэмҥэ буолар араас ула­рыйыыларга актыыбынай кыттааччынан буоллаҕына, кини олоҕун ис хоһооно баай буолар. Өссө онно эбии дойдутун, бар дьонун инники сайдыыларыгар кыттыспыт, бэйэтин кылаатын киллэрсибит буоллаҕына, кэнэ­ҕэски ыччакка ааспыт олох кэрдииһин туһунан кэпсиир-ипсиир кыахтанар», – диэн ааптар кинигэтигэр суруйбут.
«Мин бочуоттаах сын­ньалаҥҥа быйыл ыам ыйыттан барбытым, онон үлэм ыстааһа лоп курдук 60 сыл буолла. Дьоҥҥо-сэргэҕэ, чуолаан, ыччакка туһаайан, баҕар, бу кинигэлэри ааҕан, олохторугар тугу эмэ туһаныахтара дуу диэн санааттан суруйдум. Киһиэхэ олох биирдэ бэриллэр уонна олус түргэнник ааһар. Олоҕуҥ тухары астына олорбут, дьоҥҥо туһалаабыт буоллаххына, үлэҥ уопутунан ыччаты кытта үллэстэр наадалаах дии саныыбын», – диир ааптар К.Е. Иванов.
Климент Егорович кинигэ­лэри таһаарыыга редактор Эдуард Пономарёв улахан көмөтүн бэлиэтээн эттэ. Итиэннэ спонсордаабыт тэрилтэлэргэ – норуот депутата Сергей Ларионов салайааччылаах Өлүөнэтээҕи холбоһуктаах өрүс пароходствотыгар, норуот депутата Семен Березин салайар «Стерх» страховой хам­паанньатыгар, норуот депутата Игорь Никитин салайар «Саха­нефтегазсбыт» тэрилтэ±э мах­талын биллэрдэ.
Климент Егорович бэйэтин көлүөнэтин дьонугар махтал тылларын этэригэр манныгы бэлиэтээтэ: «Биһиги, ХХ үйэ 30-40-сс. үөскээбит дьон, чэпчэкитэ суох олоҕу олордубут. XX уонна XXI үйэлэргэ, икки общественнай тутулга – социализм уонна ырыынак сыһыаннаһыытыгар олордубут. Биһиги сэрии кэмин оҕолоро буолабыт, аччыктыыры, тоҥору-хатары эппитинэн-хааммытынан билбиппит. Олох кыра сааспытыттан холкуоска улахан дьону кытта тэҥҥэ үлэлиир этибит».

СӨ салалтатын уонна Ил Түмэн аатыттан Климент Его­ро­виһы парламент вице-спикерэ Анатолий Добрянцев эҕэрдэлээтэ. «Климент Его­рович сэрии иннинээҕи кэм­ҥэ үөскээн, сэрии содулун бил­битэ. Кини оччотооҕу кө­лүөнэ ыччатын лидерэ буол­бута, партийнай үөрэҕи бүтэ­рэн, саамай уустук кэмҥэ, социаль­най-экономическай ту­тул уларыйар кэмигэр, рес­публика салалтатыгар Михаил Ефимович Николаевы кытта үрдүк таһаарыылаахтык үлэлээбитэ. Саха норуотун иккис улахан, бас-көс киһитэ буола биллибитэ», – диэтэ парламентарий. Итиэннэ Климент Егорович киһи быһыытынан амарах, аһаҕас дууһалааҕын бэлиэтээтэ. Вице-спикер бу кинигэлэр үүнэр көлүөнэҕэ үтүө холобур буолуохтарыгар эрэнэрин эттэ. Итини таһынан Ил Түмэн вице-спикерэ Климент Иванов федеральнай уонна өрөспүүбүлүкэтээҕи сокуоннары оҥорууга кылаатын киллэрбитин аҕынна.
Анатолий Добрянцев К.Е.Иванов үбүлүөйүн тэрийэр кэмитиэт бэрэссэдээтэлин солбуйааччы буоларын быһыы­тынан, кинигэ сүрэхтэниитигэр мустубут дьон бука бары сэтинньи 10 күнүгэр буолуохтаах чиэстээһиҥҥэ актыыбынай кыттыыны ылалларыгар эттэ.
Салгыы мустубут дьон «Оло­­ҕум суола» уонна «Олоҕум аргыстара» кинигэлэр тустарынан бэйэлэрин санааларын эттилэр, ааптарга алгыстарын анаатылар.