Александр Жирков Кыргызстан делегациятын кытта көрүстэ

Өрөспүүбүлүкэ парламенын дьиэтигэр буолбут тэрээһиҥҥэ официальнай делегация салайааччыта, Кыргызстан Өрөспүүбүлүкэтин Президенин сүбэһитэ Мира Карыбаева, суруйааччы Чингиз Айтматов уола, “Чингиз Айтматов аатынан Иссык-Куллааҕы форум” норуоттар икки ардыларынааҕы уопсастыбаннай тэрилтэ президенэ Аскар Айтматов, Кыргызстан парламенын — Жогорку Кенеш отделын сэбиэдиссэйэ Сатина Бакешева сырыттылар.
Көрсүһүү саҕаланыытыгар кыргыз делегациятын салайааччыта Мира Карыбаева Кыргызстан Президенин Алмазбек Атамбаев эҕэрдэтин Ил Түмэн спикерэ Александр Жирковка тиэртэ.
Аскар Айтматов бэлиэтээбитинэн, Саха сиригэр Кыргызстан литературатын уонна искусствотын Күннэрэ историяҕа киирэр түгэнинэн итиэннэ култуура десана – бастакы хардыы буолаллар, ити кэнниттэн атын да көрүҥүнэн алтыһыы салҕаныаҕа.
Аскар Айтматов Ил Түмэн спикеригэр махталын биллэрдэ: “Эһиги икки норуоту чугаһатар туһугар оҥороргут – бу улуу хамсатар күүс. Эһиги Кыргызстаҥҥа суолу астыгыт. Бу түгэн – Саха сиригэр Кыргызстан Өрөспүүбүлүкэтин литературатын уонна искусствотын Күннэрин ыытыы, бастатан туран – эһиги үтүөҕүт-өҥөҕүт”.
Александр Жирков литература уонна искусство Күннэрин көрсө хардарыта тылбаас хомуурунньуктара күнү көрбүттэригэр ыалдьыттар болҕомтолорун тарта: Саха сирин уонна Кыргызстан литератордарын айар бииргэ үлэлээһиннэрин историятыгар иккис таһаарыы – “Күн кууһар хайатыттан” диэн саха тылынан кыргыз 40 суруйааччытын айымньыларын хомуурунньуга, ону сэргэ кыргыз литературатын классига Чингиз Айтматов тылбаастаммыт айымньыларын 1966 с. бэчээттэммит хомуурунньугун хаттаан таһаарыы.
Спикер санаппытынан, 2014 сылга Кыргызстан Өрөспүүбүлүкэтин кытта сөбүлэһии чэрчитинэн, Кыргызстан народнай суруйааччыта, профессор Бексултан Жакиев өйөбүлүнэн кыргызтар эпостара «Манас» Саха сиригэр саха тылынан саҥарбыта, оттон «Дьулуруйар Ньургун Боотур» олоҥхону Кыргызстаҥҥа бэйэлэрин тылларыгар тылбаастаабыттара.
“ЮНЕСКО өйөбүлүнэн тэриллибит “Аан дойду норуоттарын эпостара” кинигэ сериятын бастакы таһаарыытынан «Манас» буолбута. Соторутааҕыта алтайдар «Маадай хара» эпостара таһаарылынна. Билигин тувалар эпостарын бэлэмниибит, салгыы татардар-башкирдар уонна да атын аан дойду норуоттарын эпостара кэлиэхтэрэ», – диэн былааннарын үллэһиннэ Аан дойду норуоттарын эпостарын норуоттар икки ардыларынааҕы ассоциациятын хос бэрэссэдээтэлэ Александр Жирков.
Мира Карыбаева кыттыгас тэ­рээһиннэри чаастатык ыытар наа­далааҕын бэлиэтээтэ итиэннэ Кыргызстан Президенэ Алмазбек Атамбаев аатыттан быйыл от ыйыгар Бишкеккэ “Алтай цивилизациятын фо­рума: алтай тылын бөлөҕүн уруулуу норуоттара” диэн тэрээһин ыытылларын туһунан ыҥырыылаах иһитиннэриини аҕал­бытын эттэ.
Президент сүбэһитэ аан дойдуттан барытыттан тыл үөрэхтээхтэрин, археологтары, историктары, этнографтары түмэр баҕалаахтарын, номнуо бүгүн форумҥа кыттар баҕалааҕын 70 киһи биллэрбитин иһитиннэрдэ. Салгыы сылтан сыл аайы ити форуму араас дойдуларга ыытарга былаанныыллар.
Мира Карыбаева ити бырайыагы РФ Президенэ Владимир Путин Евразия түмсүүтүн сайдыытыгар саҥа түһүмэх быһыытынан өйүүрүн бэлиэтээтэ.
Александр Жирков Иссык-Куллааҕы форуму ыытыы былаанын сураста. Мира Карыбаева форум кэлэр сылга буолуохтаах диэн хоруйдаата.
Кэпсэтии түмүгэр Ил Түмэн спикерэ Александр Жирков ыалдьыттарга туһаайан, форумҥа ыҥырбыттарын иһин махтанна итиэннэ билиҥҥи кэмҥэ биһиги норуоттарбыт Бишкектээҕи форум курдук тэрээһиннэри ыытар таһымҥа тахсыбыттарын бэлиэтээтэ.