Бастакынан — Максим Аммосовка сүгүрүйэн

Тэрээһиҥҥэ Ил Түмэн бэрэссэдээтэлэ Александр Жирков, СӨ Бырабыыталыстыбатын бэрэссэдээтэлин солбуйааччы Алексей Дьячковскай, Кыргыз Өрөспүүбүлүкэтин президенин сүбэһитэ Мира Карыбаева салайааччылаах Кыргызстан делегацията, Чингиз Айтматов аатынан Норуоттар икки ардыларынааҕы Иссык-Куллааҕы форум президенэ Аскар Айтматов, Саха сирин народнай депутаттара, Нам улууһун бэрэстэбиитэллэрэ уо.д.а. кыттыыны ыллылар.
Спикер Александр Жирков бүгүн Кыргыз Өрөспүүбүлүкэтин култууратын уонна искусствотын күннэрэ дойду икки регионугар — Москваҕа уонна Саха сиригэр тэҥинэн саҕаламмыттарын бэлиэтээтэ.
«Кыргызстан официальнай делегацията биһиги өрөспүүбүлүкэбитигэр литература уонна искусство күннэрин Максим Кирович Аммосов пааматынньыгар сибэкки уурууттан саҕалыыра үөрүүлээх. Бу бырааттыы норуоттар судаарыстыбаннастарын олохтоспут саха норуотун чулуу уолугар кыргыз норуотун дириҥ ытыктабылын, билиниитин бэлиэтэ. Максим Кирович кыргыз сиригэр төһө да кылгас кэмҥэ үлэлээтэр, бу дойдуну ис сүрэҕиттэн ылыммыта, сөбүлээбитэ, ол туһунан кини хас да төгүл бэлиэтээн турардаах. Максим Кирович бу дойду чэчирии сайдарын туһугар бары кыаҕын, күүһүн ууран үлэлээбитэ. Кыргыз Өрөспүүбүлүкэтин уопсастыбаннаһа М.К. Аммосов өрөспүүбүлүкэ бастакы салайааччыларыттан биирдэстэрин, үгүс салайар уонна хаһаайыстыбаннай үлэлэргэ олохтоох дьону үүннэрбит, таһаарбыт, өрөспүүбүлүкэҕэ үрдүк идэлээх каадырдары үөрэтиигэ, бэлэмнээһиҥҥэ быһаарыылаах улахан хам­сааһыны оҥорбут киһи быһыытынан өйдүүр уонна ытыктыыр», — диэтэ Александр Жирков.

Спикер ытыктабыллаах ыалдьыттары, өрөспүүбүлүкэ олохтоохторун Кыргыз Өрөс­пүүбүлүкэтин литературатын уонна искусствотын Күннэрэ саҕаламмыттарынан эҕэрдэлээтэ.
Кыргызстан президенин сүбэһитэ Мира Карыбаева тыл этиитигэр Максим Кирович Аммосов Киргизияҕа төһө да кылгас кэмҥэ үлэлээбитин үрдүнэн, кыргыз норуота кинини умнубатын бэлиэтээтэ. «1936 сыллаахха Максим Кирович салалтатынан Киргизия Өрөспүүбүлүкэтэ союзнай статустаммыта. Үлэтин маҥнайгы күннэриттэн саҕалаан Максим Кирович национальнай каадырдары үүннэриигэ улахан болҕомтотун уурбута. Кини биһиги дойдубутугар тиийиитигэр Кыргыз судаарыстыбаннаһын төрүттээччилэр үксүлэрэ репрсессияламмыт этилэр. Ол ыарахан кэмнэргэ Максим Аммосов судаарыстыбаннас олоҕун төрүттүүргэ үгүс үлэни ыыппыта. Биһигини тыһыынчанан килэмиэтир араарар, ол да буоллар, биһиги норуоттарбыт хардарыта көдьүүстээх сибээстэрэ салҕанар. Саха Өрөспүүбүлүкэтигэр ыытыллар Кыргыз литературатын уонна искусствотын Күннэрэ инникитин бииргэ үлэлэһиигэ өссө биир далаһанан буолуохтара. Инникитин Саха сирин делегацията Кыргызстаҥҥа тии­йэн, СӨ култууратын Күннэрин ыытыахтара диэн эрэнэбин. Маннык ис хоһоонноох тэрээһиннэр үгэс буолалларыгар баҕарабын», — диэн түмүктээтэ Мира Карыбаева.
Чингиз Айтматов төрөппүт уола Аскар Айтматов тыл этиитин Саха сирин парламенын спикерэ Александр Жирковка сылаастык көрсүбүттэрин иһин махтал тылларыттан саҕалаата. «Биһиги Максим Аммосов икки бырааттыы өрөспүүбүлүкэлэр судаарыстыбаннастарын сайдыытыгар сүҥкэн оруолу ылбытын өйдүү-саныы сылдьабыт. Биһиги Саха сиригэр улахан интэриэстээхпит — сибээстэри дириҥэтиэхпитин баҕарабыт. Чуолаан Саха сирин олохтоохторугар бэйэбит култуурабытын, искус­ствобытын, айар кыахпытын салгыы бииргэ үлэлэһии төрүтүн уурар туһуттан көрдөрөбүт», — диэтэ улуу суруйааччы уола Аскар Айтматов.
Салгыы тэрээһин кыттыылаахтара М.К.Аммосов аатынан ХИФУ иннигэр турар Максим Аммосов пааматынньыгар сибэкки дьөрбөтүн уурдулар.