Көрсүһүүнэн, бырааһынньыгынан эрэ муҥурдаммакка…

Кэлиҥҥи кэмҥэ өрөспүүбүлүкэбитигэр биирдиилээн уонна бөлөҕүнэн араас хабааннаах үтүө дьыаланы оҥорууга хамсааһыннар үксээн эрэллэрэ санааны көтөҕөр. Олор тустарынан хаһыаппар «Норуот хамсааһына: бастыҥнары батыс» диэн анал рубрика аһаммын төһө кыайарбынан сырдата сатыыбын.

Бүгүн күндү ааҕааччыларбар Уус-Алдан улууһун Лөгөй орто оскуолатын 1979 уонна Дүпсүн орто оскуолатын 1984 сыллардаахха бүтэрбит выпусниктарын оҥорбут үтүө дьыалаларын тустарынан сырдатыахпын баҕарабын.

Өрөспүүбүлүкэ выпускниктарын ыҥыраллар

Биллэрин курдук, урут уруккуттан оскуоланы бүтэрбиттэр биэс, уон, уон биэс, сүүрбэ, ити курдук, төгүрүк бэлиэ дааталарга мустан көрсүһэн, уруккуну-хойуккуну санаһар, ахтыһар үтүө үгэстэрэ баар.

Балаҕан ыйын 1 күнүгэр 1969 сыллаахха, 50 сыл аннараа өттүгэр Лөгөй орто оскуолатыгар үөрэнэ киирбит оҕолор  үөрэнэн-такаллан, кынат анньынан тахсыбыт оскуолаларыгар өр сылларга кэпсэлгэ сылдьар үтүө дьыалалары (дьыаланы буолбакка) оҥороннор, биир дойдулаахтарын үөртүлэр-көтүттүлэр.

Сахаларга 40 сааһы, сылы өс­төөх саас диэн бэлиэтиниллибэт үгэс баар. Ол иһин Лөгөй выпускниктара оскуола боруогун аан бастаан атыллаабыттара, үйэ аҥаара буолбутун бэлиэтииргэ быһаарыммыттара. Кинилэр көрсүһүүнэн, бырааһынньыгынан эрэ муҥурдамматылар. Тэрээ­һиннэрин быйыл маҥнайгы кылааска киирэр кырачааннары кытта ситимнээбиттэрэ.

Ааҕааччыларым ол туох үтүө дьыалаларын оҥордулар диэн интэриэһиргээтэххит буолуо. Кинилэр көрсө түстэллэр эрэ, төрөөбүт-үөскээбит дойдуларыгар туох эмэ үйэлээҕи оҥорбут киһи диэн мэлдьи кэпсэтэллэрэ. Ол өр сыллар усталара иитиэхтээн илдьэ сылдьыбыт ыра санааларын быйыл олоххо киллэрдилэр.

Выпускниктар Дьокуускай куорат ботаническай саадыттан яблоня, акация, боярышник, облепиха, сирень уонна охта атыылаһаннар, массыынанан тиэйэн таһаараннар, үөрэммит оскуолаларын таһыгар олортулар.

Үүнээйи да кыһыл оҕону курдук көрдөххө-иһиттэххэ, бүөбэйдээтэххэ эрэ силигилии үүнэр. Хомойуох иһин, дууһаны уурбакка, этэргэ дылы, илии таһынан олордуллубут уонна хаппыт мас элбэх. Онон выпускниктар олордуохха эрэ диэн буолбакка, барытын эргитэ толкуйдаабыттара.  Манна кинилэр эрдэттэн бэлэмнэммиттэрэ. Ол курдук,  уоҕурдуу атыылаһаспыттара, Кэптэни бөһүөлэргэр олорор бииргэ үөрэммит оҕолоро хара буор таспыттара. Олодубут мастарын быйыл маҥнайгы кылааска үөрэнэ киирбит үөрэнээччилэр төрөппүттэригэр көрө-истэ сылдьалларыгар сүбэ-ама биэрдилэр, ыйыы-кэрдии оҥордулар.

Маны таһынан Лөгөй орто оскуолатын 1979 сыллааҕы выпускниктара өрөспүүбүлүкэ оскуолаларын выпускниктарыгар төрөөбүт-үөскээбит бөһүөлэктэрин, сэлиэнньэлэрин, куораттарын көҕөр­дөллөрүгэр ыҥырыы оҥор­дулар.

Ити отонноох мастар силигилии үүннэхтэринэ, ситтэхтэринэ, төһөлөөх киһи санаатын манньытар, өрө көтөҕөр кэрэ көстүүтэ буолуой. Төрөөбүт-үөскээбит дойдуларыгар — чахчы үйэлээх бэлэх.

–––––––––––––––––––––
Лөгөй орто оскуолатын 1979 сыллааҕы выпускниктара өрөспүүбүлүкэ оскуолаларын выпускниктарыгар төрөөбүт-үөскээбит бөһүөлэктэрин, сэлиэнньэлэрин, куораттарын көҕөрдөллөрүгэр ыҥырдылар.

–––––––––––––––––––––

Үтүө   дьыала итинэн   эрэ   бүппэт

Выпускниктар оҥорбут үтүө дьыалалара итинэн эрэ бүппэт. Отонноох мастары таһынан үөрэммит оскуолаларыгар кыһыҥҥы сибэккилэри бэлэх ууннулар. Сэттэ оҕолоох эдэр дьиэ кэргэн маҥнайгы кылааска үөрэнэ киирбит оҕолоругар Антон Сокорутовка 10 тыһ. солк. сертификат туттардылар.

Бу элбэх оҕолоох дьиэ кэргэн олус талааннаахтарынан биллэллэр. Нэһилиэк уопсастыбаннай олоҕор өрүү актыыбынайдык кытталлар. Ыал аҕата уонна оҕолор, бары ырыаһыттар, үҥкүүһүттэр. Улахан уоллара Владик быйыл Кытайга циркэ оскуолатын үөрэнэн бүтэрбитэ. Быйыл бөһүөлэктэригэр дьиэ кэргэнинэн кэнсиэртээн, биир дойдулаахтарын сэргэхсэппиттэрэ.

Выпускниктар өссө маҥнайгы кылааска киирбит хас биирдии үөрэнээччигэ ааттара-суоллара суруллубут анал дневник уонна букубаар ойуулаах минньигэс торт бэлэхтээтилэр. Үтүө дьыалалара итинэн эрэ бүппэт, ыарытыйбыт учууталларыгар материальнай көмө оҥордулар. Кинилэр быйылгы көрсүһүүгэ хаһааҥҥытааҕар да элбэх выпускник (39) мустубутун туһунан этэллэр.

2017 сыллаахха Уус-Алдан улууһун Кэптэни бөһүөлэгэр саҥа таас оскуола тутуллан, үлэҕэ киирбитэ. Ол иннинэ 1972 сыллаахха үлэҕэ киирбит мас оскуола иннигэр эмиэ үөрэнээччилэр уонна устудьуоннар хатыҥнары олордубуттара. Сааһын көҕөрөн, силигилээн, дьон санаатын көтөҕөрө. Оттон таас оскуола иннигэр отонноох, сибэккилээх мастар үүннэхтэринэ, көлүөнэттэн көлүөнэҕэ кэпсэниллэр кэпсээн буолара саарбахтаныллыбат. Киһи эрэ киэн туттуон курдук.

–––––––––––––––––––––
Бу сайын Уус-Алдан улууһун Дүпсүн орто оскуолатын 1984 сыллааҕы выпускниктара төрөөбүт-үөскээбит дойдуларын биир кэрэ көстүүлээх алаастара бөҕүнэн-сыыһынан туолбутун, ардаҕы аннынан ыраастаан, тыраахтарынан таһан кэбиспиттэрэ.

–––––––––––––––––––––

Айылҕаҕа  амарах   сыһыан

Оттон быйыл 2019 сылга 1984 сыллаахха оскуоланы бүтэрбит выпускниктар 35 сылларын бэлиэтээтилэр. Бу выпусктар хара маҥнайгыттан сири-уоту, айылҕаны бөхтөн-сыыстан ыраастааһыҥҥа болҕомтолорун уурбуттара.

Ааҕааччым икки атахтаах тулалыыр эйгэбитин төһөлөөх киртиппиппитин, харыстаабаппытын бэйэҥ бэркэ диэн билэн олороҕун.

Быйыл саас Дьокуускайга олорор 1984 сыллаахха оскуоланы бүтэрбит выпускниктар (оскуолатыттан тутулуга суох) олорор-үлэлиир киин куораттарын бөҕүн-сыыһын ыраастаабыттара.

Бу сайын Уус-Алдан улууһун Дүпсүн орто оскуолатын ити сыллааҕы выпускниктара төрөөбүт-үөскээбит дойдуларын биир кэрэ көстүүлээх алаастара бөҕүнэн-сыыһынан туолбутун, ардаҕы аннынан ыраастаан, тыраахтарынан таһан кэбиспиттэрэ.

Ити атын киһи бырахпыт, ыспыт бөҕө диэбэккэ, бары хомуйа-имийэ сылдьарбыт буоллар, тулалыыр эйгэбит, айгыр-силик айылҕабыт төһөлөөх чэбдигириэх, этэргэ дылы, өрө тыыныах этэй? Айдарыылаах дьоммут этэллэринэн, киһи оҥорбут аньыыта-харата, сыыһа-халты туттуммута, сир-дойду, ойуур бөҕүн-сыыһын хомуйдаҕына, ордук ыраастаныллар.

Лөгөй уонна Дүпсүн оскуолаларын выпускниктарын үтүө холобурдара киэҥ-куоҥ Сахабыт сирин тилийэ көтүөҕэр, дьону-сэргэни биир өйгө-санааҕа сомоҕолуоҕар, маннык кэрэ сонуннар дэлэйэн иһиэхтэригэр эрэнэбин.

Людмила НОГОВИЦЫНА

Читайте свежий номер газеты по указанной ссылке.

Уважаемые читатели!

1. Покупая электронную версию Издания, вы осознаете, что покупаете ее исключительно для личного (семейного) пользования. Перепродажа или любая другая передача купленного вами номера газеты третьим лицам запрещается и может преследоваться по закону.
2. Обязанности продавца, в качестве которого выступает Издание, считаются выполненными с момента отправки Покупателю ссылка на скачивание купленного и оплаченного им номера газеты.
3. Стоимость газеты в розницу 30 руб.

ВАЖНО! Иногда, по независящим от Издания причинам, спам-фильтры Покупателя перебрасывают письмо с заказанной вами ссылкой в папку «Спам». Поэтому если вы не получили от нас автоматически сгенерированного письма со ссылкой, для начала проверьте папку «Спам». Если его нет и там — обращайтесь в нашу редакцию.