849
07 мая 2015 в 12:14
19 бэтэрээн бары дьиэнэн хааччылыннылар
Кыайыы 70 сылын көрсө олорор дьиэҕэ наадыйар 1941-1945 сс. Аҕа дойду Улуу сэриитин 19 кыттыылааҕа дьиэни атыылаһалларыгар социальнай төлөбүрдэри ыллылар. Ити туһунан СИА-ҕа СӨ үлэҕэ уонна социальнай сайдыыга миниистирэ Александр Дружинин иһитиннэрдэ.
Олорор усулуобуйаларын тупсарыыга наадыйааччылар өрөспүүбүлүкэтээҕи реестрдэригэр турар фронтовиктар уонна кинилэр огдооболоро социальнай төлөбүрдэри 2015 с. ыам ыйын 1 күнүгэр диэри ыллылар.
«Үлэ хаамыытыгар биһиги федеральнай бюджеттан үбүлээһин ситэтэ суоҕун кытта көрүстүбүт, ити сыалга 21,6 мөлүйүөн солкуобай анаммыта, суума чэрчитинэн биһиги олорор дьиэнэн 13 бэтэрээни эрэ хааччыйар кыахтаах этибит. Ыам ыйын 9 к. диэри наадыйааччылар бары харчыны ылалларын туһугар өрөспүүбүлүкэтээҕи резервэ фондатыттан үп көрүллүбүтэ», – диэн быһаарда Александр Дружинин.
Миниистир этэринэн, 2015 сылга кыттыгас үбүлээһини учуоттаан 1 бэтэрээҥҥэ социальнай төлөбүр муҥутуур кээмэйэ 2,5 мөлүйүөн солк. тэҥнэстэ.
Бүгүҥҥү күҥҥэ 19 бэтэрээн бары олорор дьиэ атыыласпыттар, судаарыстыбаннай регистрация, кадастр уонна картография Федеральнай сулууспатын Саха Өрөспүүбүлүкэтинээҕи управлениетыгар бас билиигэ бырааптарын регистрациялаппыттар.
СИА.
