Аатын кылгатыахха

Арассыыйаҕа, биһиги өрөспүү­бү­лүкэбитигэр даҕаны норуот хаһаа­йыстыбатын бары салааларын тус­таах министиэристибэлэр салайаллара биллэр суол. Биһиэхэ, арааһа, 10-тан тахса буолуохтара. Холобур, доруобуйа, айылҕа харыстабылын, үп, үөрэхтээһин, спорт, ОДьКХ, култуура уонна духуобунай сайдыы, тутуу уонна архитектура уо.д.а. Итилэр ааттара өйдөнөр.
Арай биһиги эти-үүтү оҥорор, сиринэн дьарыктанар, тыа дьонун салайар үрдүкү тэрилтэбит нууччалыы “Министерство сельского хозяйства и продовольственной политики Республики Саха (Якутия)” диэн бэрт уһун, эриэхэбэй ааттаах. Ону киһи син өйдүүр. Оттон, дьэ, итини сахалыытыгар ким талбытынан ааттыыр, суруйар.
Холобур, “СӨ тыа (тыатын) хаһаайыстыбатын (хаһаайыстыбатыгар) уонна ас-үөл (аска-үөлгэ, аһын-үөлүн, аһыгар-үөлүгэр) бэлиитикэтин министиэристибэтэ” диэн араастаан саҥараллар, суруйаллар. Хайата сөбүй? Көннөрү кэпсэтиигэ ити иккис аҥаарын ким да туттубат, көннөрү сурукка да киллэрбэт буолан иһэллэр. Оччоҕо ити иккис аҥаара кимҥэ, туохха нааданый? Киэҥник туттуллубат буоллаҕына. Туохпут эмиэ “бэлиитикэтэ”? Аны сахалыы саҥаҕа сорохтор “бэлиитикэ” , сорохтор нууччалыы “политика” диэн этэллэр. Биир тылынан “хааһы да саламаат”, ким талбытынан саҥарар, суруйар. Тыа дьоно, көннөрү үлэһиттэр ити “…ас-үөл политикатыгар” диэн тыллары хаһан да туттубаттар, сорохтор билбэттэрэ да буолуо.
Арассыыйаҕа нууччалыы бу салаа “Министерство сельского хозяйства РФ” диэн судургутук, чуолкайдык ааттанар. Бары регионнарга да оннук дииллэр. Аан дойду да үрдүнэн тыа хаһаайыстыбатын салайар тэрилтэлэрин ааттара “бэлиитикэ” диэн эбиилигэ суох буолуохтара диибин.
Арай ала-чуо биһиэхэ, сахаларга эрэ, тыабыт хаһаайыстыбатын министиэристибэтэ оҥорон таһаарыыны (производствоны) таһынан өссө “ас-үөл политикатынан” дьарыктанар аатырар. Ол аата туохпутуй? Мин саныахпар, политиканан сүрүннээн салайар партиялар дьарыктаналлар. ТХМ көннөрү хаһаайыстыбаннай тэрилтэ курдук, оҥорон таһаарыынан эрэ дьарыктанар буолбатах дуо?
Итилэртэн сиэттэрэн этиим биир. Министиэристибэбит аатыттан иккис аҥаарын — “ас-үөл бэлиитикэтин” диэн тыллары быраҕан, көннөрү “СӨ тыатын хаһаайыстыбатын министиэристибэтэ” диэн ааттыаҕыҥ. Ону уларытыыга улахан ороскуот тахсыбат, бириэмэ барбат. Бары туһааннаах тэрилтэлэр бэчээттэрин эрэ уларыттахтарына бүтэр. Бу Москвата да суох, бэйэ иһинэн быһаарыллар кыахтаах боппуруос. Ону туһааннаах сис кэмитиэт (Саввин Д.В.) уонна дьокутааттар туох дииллэр?
Иван ПОНОМАРЕВ.
Чурапчы.