832
18 мая 2015 в 12:03
Агрооскуола үөрэнээччилэрэ килиэп үтэллэр
Агротехнологическай хайысхалаах оскуолалар сүрүн сыалларынан үлэ киһитин иитэн таһаарыы буолар. Абый улууһун Аркадий Егорович Слепцов аатын сүгэр Абый агрооскуолатыгар оҕолор үлэни баһылыырга үөрэнэллэр. Ол курдук, кинилэр нэһилиэнньэни килиэбинэн хааччыйаллар.
Бэйэтин суолун-ииһин булунан, атаҕар туран үлэлии олорор Абыйдааҕы агрооскуола үөрэнээччилэрэ нэһилиэктэрин уонна Оттоох Атах учаастагын килиэбинэн хааччыйаллар. 8-9 кылааска үөрэнэр кыргыттар килиэп астааһын технологиятын баһылаан повардары кытта тэҥҥэ үлэлииллэр. Быйылгыттан үлэ киниискэтэ арыллан, кинилэр номнуо хамнастаах үлэһиттэр! Бу республикаҕа ыытыллар Предпринимательство сылыгар сөп түбэспитэ бэлиэ, үөрүүлээх түгэн. Оҕолору предпринимательство, бизнес хайысхатынан бэлэмнээһин кинилэр олоххо үөрүйэхтээх, толкуйдаах, сатабыллаах буолан тахсалларыгар бигэ олук буолара саарбаҕа суох.
Быйылгы үөрэх дьылыгар “Лучшие товары Якутии” республикатааҕы улахан күрэскэ кыттан бастаабыттара. Ол ситиһиилэринэн муус устар ыйга Владимир куоракка Макаренко ааҕыыларыгар кыттар чиэскэ тиксибиттэрэ уонна иккис бочуоттаах миэстэни ылан үөрүү көтөллөөх эргиллибиттэрэ.
Кыргыттар билигин бурдук ас арааһын астыыллар. Астаммыт ас удамыр сыанаҕа оскуолаҕа, дьаарбаҥкаларга атыыланар, оскуолаҕа эбии дохуот буолар.
Өссө биир улахан бырайыагынан астаммыт килиэби дьиэҕэ аҕалан биэрии буолар. Оҕолор кыаммат, кырдьаҕас дьонтон сакаас ылан, дьиэлэригэр аҕалан биэрэллэр.
Оҕолор бу үтүө дьарыктара инники олохторугар туһалыаҕа турдаҕа.
Екатерина Соломова.
