918
15 мая 2015 в 17:57
Албын эмтэри оҥоруу иһин Кытайга киһи олоҕун тухары хаайыллар
Билиҥҥи кэмҥэ Россияҕа албын медицинскэй бородууксуйаны оҥорон атыылааһыны кытта сибээстээх буруйдартан сүүс гыммыттан биирэ эрэ арыллар. Балаһыанньа от ыйыгар уларыйыаҕа – албын эмтэри атыылааһыҥҥа уорбаланар тэрилтэлэри былааны таһынан бэрэбиэркэлээһини көҥүллүүр көннөрүүлэр сокуон күүһүн ыллахтарына. Ити туһунан «Парламентская газета» корреспонденыгар Госдума доруобуйа харыстабылыгар кэмитиэтин бэрэссэдээтэлин солбуйааччы Олег Куликов кэпсээтэ.
«Билиҥҥи кэмҥэ аптекалары былааны таһынан бэрэбиэркэлээһин бобуллар. Оттон былааннаммыт бэрэбиэркэ туһунан этэр эбит буоллахха, саарбах эмтэри атыылыыр дьон итиннэ бэлэмнэнэн, долбуурдартан наадалааҕы хомуйа охсоллоро өйдөнөр. Онон маннык буруйу бэрт сэдэхтик булан ылыахха сөп», – диэн бэлиэтээтэ депутат.
Олег Куликов этэринэн, от ыйыгар Холуобунай кодекска көннөрүүлэр күүстэригэр киириэхтэрэ, оччоҕуна хараҕы баайар эмтэри оҥорооччулар уонна атыылааччылар 8 сыл болдьоххо диэри көҥүллэрэ быһыллыан сөп. «Оттон бакаа кинилэр харчынан ыстараабы эрэ төлүүллэр – ону ыарырҕаппакка уйуналлар», — диэн эттэ Куликов. Кини эбии эппитинэн, маннык буруй иһин үгүс дойдуларга хаайыыга угаллар: «Германияҕа ити иһин 10 сылга диэри көҥүлү быһаллар, Индияҕа — 30 сылга диэри, Кытайга — киһи олоҕун тухары хаайыллар. Ити сөптөөх. Маннык буруй көрүҥнэрэ экономиканы эрэ таарыйбаттар, кинилэр дьон доруобуйатыгар уонна олоҕор кутталы аҕалаллар».
