Алдан оройуонугар үлэһиттэри үөрэтэр кыах баар

Манна Ил Түмэн өттүттэн Судаа­рыстыбаннай Мунньах бэрэс­сэдээтэлин солбуйааччы Ольга Балабкина, норуот депутата Егор Жирков кыттыыны ыллылар.
Мунньах саҕаланыытыгар өрөс­пүүбүлүкэ үөрэҕин уонна наукатын миниистирэ Владимир Егоров «Профессиональнай үөрэхтээһин сай­дыытын ресурсаларын кии­нэ» автономнай тэрилтэ 13 быра­гырааманан дьону идэҕэ бэлэмниирин, өрөспүүбүлүкэҕэ ордук ирдэнэр идэлэргэ үөрэтиини кэҥэтии былааҥҥа баарын иһитиннэрдэ.

Норуот депутата Егор Жирков Ресурса киинин салаатын Алдан оройуонун Томмот куоратыгар арыйарга этии оҥордо. Кини этэринэн, онно 3-4 эбэтэр 6 ыйдаах куурустарга каменщиктары, бетонщиктары, штукатурдары үөрэтиэхтэрин сөп. Томмот куорат ааспыт үйэ 1946-1996 сылларыгар Сойууска сүлүүдэ бырамыысыланнаһын киининэн буоларын, Саха сирин эрэ буолбакка, бүтүн Уһук Илин наадыйыыларын хааччыйыан сөптөөх тутуу матырыйаалларын биир киинин быһыытынан сайдарыгар 90-с сылларга бырагыраама барыла оҥоһуллубутун санатта. Бу сиргэ-уокка диопсид, туой, аламит курдук сиртэн хостонор баайдаах.
Депутат Егор Жирков Томмокко бүгүҥҥү күҥҥэ 249 саахалланар уонна хаарбах туруктаах олорор дьиэҕэ өрөмүөн ирдэнэригэр болҕомтону туһаайда Кини олохтоох сырьеттан – диопсидтан бетон бөҕө буолара чинчийиллибитин, ону оҥорууга үөрэтии барыаҕын, идэҕэ уһуйуу оҥорон таһаарыыны кытта ыкса сибээстээх буолуоҕун бэлиэтээтэ.

Ил Түмэн Бэрэссэдээтэлин сол­буйааччы Ольга Балабкина Томмоттооҕу быыбардыыр уокуруктан норуот депутата буоларынан, Егор Жирков көҕүлээһинин өйүүрүн биллэрдэ. Кини билигин Алдан политехническай техникумугар араас идэлээхтэри бэлэмнииллэрин эттэ. Соторутааҥҥа диэри үлэһиттэри Алданнааҕы профтехучилище эмиэ бэлэмниирэ.
Томмот куорат баһылыга Алек­сандр Заверюха көҕүлээһини өйүүргэ бэлэмин эттэ. Кини 6 №-дээх уопсай үөрэх оскуолатыгар тирэҕирэн, урут оробуочай идэлэргэ бэлэмнииллэрин санатта. Билигин бу 200 миэстэлээх таас оскуолаҕа 160 оҕо үөрэнэр эбит.
Һөрэх уонна наука миниистирин бастакы солбуйааччыта Михаил Присяжнай боппуруос икки суолунан быһаарыллыахтааҕар тохтоото: бастакытынан, Алданнааҕы политехническай техникум элбэх функциялаах киинин базатыгар салааны эбэтэр Егор Жирков этиитинэн, Ресурса киинин саҥа филиалын үөскэтии, иккиһинэн – оробуочай идэлэргэ бэлэмниир чопчу сыаллаах-соруктаах икки киини үөскэтии. «Бу быһаарыыны ылынарга бары усулуобуйалар учуоттаныахтаахтар, ол иһигэр атын оройуоннартан олохтоохтору тардар кыах, улахан дьону, үрдүкү кылаас оҕолорун үөрэтии уонна хаттаан үөрэтии», – диэн бэлиэтээтэ Михаил Присяжнай.
Ольга Балабкина Алдан оро­йуонугар профессиональнай клас­теры тэрийэр кыаҕы көрөр туһунан этиилээх.
Ресурса киинин директора Михаил Сивцев: «Билигин тэрил­тэбит түөрт идэҕэ бэлэмниир: мас ууһа, бетонщик, каменщик, формовщик. «Кимберлит» уонна «Саха-Сталь» хампаанньалары кытта үлэлиибит, эмиэ маннык ньыманан Томмот куоракка олохтоох сырьену туһанан тутуу матырыйаалларын оҥорон таһаарыыны кытта бииргэ үлэлээһини олохтуохха сөп», – диэн филиалы аһар тоҕоостооҕун бэлиэтээтэ.
Бары интэриэстээх өрүттэри тардан, бырамыысыланнаска үлэ­һиттэри бэлэмнээһин боп­пуруоһун дьүүллэһиигэ Томмот куоракка көһө сылдьар мунньаҕы ыытарга быһаарыы ылылынна.