“Амарах сүрэх” акция саҕаланна

Ол курдук, балаҕан ыйын 5 күнүттэн Саха сиригэр 3443 диэн смс-нүөмэр үлэлээтэ. Бу нүөмэринэн ким баҕарар көмө харчы ыытыан сөп буолла. Акцияны сүрүн хаһыаттар, “Саха” көрдөрөр-иһитиннэрэр хампаанньа, улуустааҕы редакциялар, информационнай порталлар өйөөтүлэр.
Үбү хомуйар операторынан 2011 сылтан инбэлиит оҕолору кытары үлэлэһэр “Харысхал” аһымал фондата талыллыбыт. Оччотугар төһө үп хомуллубута, ханна ыытыллыбыта дьэҥкэтик көстөр буолуоҕа диэн санаалаахтар министиэристибэҕэ.
“Кылгас смс-нүөмэр нөҥүө эмтэниигэ наадыйар оҕолорго үп судургутук хомуллуоҕа”, — диэн сибээс миниистирэ Александр Борисов быһаарда.
Балаҕан ыйын 5 күнүгэр Аһымал аан дойдутааҕы күнүгэр “Саха” көрдөрөр-иһитиннэрэр хампаанньа “Саҥа күн” биэриитигэр “Амарах сүрэх” аһымал акция саҕаламмытын биллэрдилэр. Акция туһунан иһитиннэрии, хас биирдии киһи билэн кыттыһарын курдук, хаһыаттарга, сайтарга тахсыаҕа.
Оҕолорго тус көмө “Харысхал” фондатын нөҥүө оҥоһуллуоҕа. Онон ханнык баҕарар киһи Якутия диэн тыллаах уонна харчытын сууматын ыйан туран 3443 нүөмэргэ смс-сообщение ыытыан сөп. Бу нүөмэр мэлдьи үлэлиэҕэ.

Кимиэхэ көмө оҥоһул­ларый?

Балаҕан ыйын 5 күнүттэн 2004 сыллаах төрүөх Оконешников Иваҥҥа үп хомуйуу саҕаланар. Киниэхэ тыҥатын тыыннарар аппарат (ИВЛ) наада. Ваня элбэх оҕолоох дьиэ кэргэн мурун бүөтэ оҕото, кини ДЦП диагностаах төрөөбүт. Ааспыт сыл бүтэһигэр Ваня ийэтэ бу күн сириттэн күрэммит. Оттон быйыл Ваня плевропневмониянан ыалдьан баран, тыҥатын тыыннарар аппаракка холбоммут. Билигин Ваня Майа балыыһатын реанимациятыгар сытар. Дьиэтигэр тыҥатын тыыннарар аппараттаах эрэ буоллаҕына төннөр кыахтаах. Маннык аппарат сыаната мөл. солкуобай курдук, бу сууманы элбэх оҕолоох аҕа сатаан бэйэтэ булар кыаҕа суох. Аймахтара, доҕотторо көмөлөһөннөр 200 тыһ. солк. курдук хомуллубут. Онон амарах сүрэхтээх Саха сирин олохтоохторугар уонна спонсордарга эрэ эрэнэллэригэр тиийэллэр.
“Тыҥаны тыыннарар аппарат балыыһа реанимациятын иһинэн эрэ кыаллымтыа. Арай оҕо барахсан дьиэтигэр маннык аппарааттааҕа буоллар, тапталлаах чугас дьоннорун кытта сылдьыа этэ. Атыылаһыахтаах аппараат фонд балансыгар баар буолуоҕа. Өскөтүн Ваня үтүөрэн тыынар буоллаҕына, атын оҕолор туттуохтарын сөп”, — диэн “Харысхал” аһымал фондатын директора Вера Душкевич этэр.