Аммаҕа чааһынай бассейн

Иннокентий идэтинэн уус. Кини оҥорбут спортивнай была­һааккалара, беседкалара, тутуулара Аммаҕа, атын да улуустарга элбэх ыал, тэрилтэ тэлгэһэлэрин киэргэтэллэр.
Иннокентий Иннокентьевич бассейнын туһунан биһиги хаһыакка сиһилии кэпсээтэ.
«Бассейн тутар идеяны иитиэхтии сылдьыбытым ыраатта. Сайыммыт кылгаһа бэрт – оҕо аймах сөтүөлээн хаалар кэмэ кэмчи. Оҕолорум үөрүүлэрин үксэтээри бу бассейны оҥордум.
Бэйэм уһанар баазалаахпын. Ол таһыгар 8х6 иэннээх тутуубут каркааһын түһэрбиппит. Сиртэн тымныы тыына ууга охсубатын диэн анныгар пенофол уонна хаптаһын тэлгээтим. Онтон каркааһын баайыытын саҕалаабыппыт. Муостатын саайан баран, кырыыһатын поликарбонатынан оҥордум. Сайынын куйааска күҥкүйэн хаалбатын диэн, сөрүүкэтэр сыаллаах, биир истиэнэтигэр чараас хаптаһынынан түннүктээн биэрдим. Бассейн иһигэр уонна таһыттан сылытар оһохтоох», — диэн уус үлэ хаамыытын кэпсиир.
Бассейн иһэ бөҕө-таҕа гына пластигы бүтэйдии иһэрдэн оҥоһуллубут. Аннынан уутун сүөкүүр гына кырааны иһэрдэн олордуллубут. Иннокентий этэринэн, маннык матырыйаал үйэлээх буолар: «Ууну массыынанан бастаран куттарабын, уопсайа 20 куб. уу ороскуоттанар. Бассейн уута түргэнник буорту буолар. Онон уутун сотору-сотору уларытар, ыраастыыр ирдэнэр. Биһиги күүстээх носуоһунан хачайдаан, анал фильтр нөҥүө ыраастыыбыт уонна бассейн уутугар аналлаах хлордаах эми туттабыт. Оччоҕо ып-ыраас турар. Итиэннэ бу фильтр ууну эмиэ сылытар».
Бассейн ааптара тутуутун салгыы сайыннаран, сауналаах гына оҥорор былааннаах. Мантан сиэттэрэн дьон дьарыктаах буолуутун тэрийэргэ олук буоларын курдук туспа санааны эттэ: «Мин биир сүрүн идеям — өрөспүүбүлүкэ уустарын мунньан, маастар-кылаастары, уопут атастаһыытын ыытар баҕалаахпын. Онно анаан ити баазабын дьон-сэргэ кута-сүрэ тохтуур, сэргэхсийэр гына табыгастаахтык, сиэдэрэйдик оҥостор былааннаахпын. Бэйэм ювелир идэтигэр үөрэммитим. Онтон уһаныы бары көрүҥүн боруобалаан, салгыы дьоҕурбун сайыннара сатыыбын. Бу идеябар үп-харчы өттүнэн туһааннаах өйөбүл баара буоллар, олоххо түргэнник киллэриэм этэ», — диэн Иннокентий Слепцов сэһэргиир.
Уус өрүс талаҕынан ону-маны өрөр, дьон, тэрилтэ үлэҕинэн араас мааны тутуулары оҥорор эбит. Бэйэтэ туспа буочардаах, чахчы да ис-иһиттэн талааннаах, олоххо дьыалатын булбут киһи туттунуута тута харахха быраҕыллар.
Өрөспүүбүлүкэҕэ дьарыктаах буолуу сыла биллэриллэн турар. Маннык сэргэх санаалаах, ураты дьоҕурдаах дьон Сахабыт сиригэр элбэхтэр. Саҥа саҕалааһыҥҥа эмиэ саҥалыы сыһыан ирдэнэр. Сыыска-буорга түһэрбэккэ, таба көрөн, маннык биир дойдулаахтарбыт сатабылларын киэҥ эйгэҕэ, дьоҥҥо-сэргэҕэ тиэрдэр сүрүн сорук буолар.