Арктика оҕолоругар сөптөөх усулуобуйа тэрийэр аналлаахпыт

Государственнай Мунньах бэрэссэдээтэлин солбуйааччы Ольга Балабкина мунньаҕы арыйарыгар хотугу сир култууратын, үгэһин, айылҕатын аймаабат, алдьаппат курдук, харыстабыллаахтык сыһыаннаһан, саҥа программалары, сокуоннары үлэлэтиэхтээхпит диэн бэлиэтээбитэ. Маныаха кини “2014-2017 сс. Арктикатааҕы уонна хотугу улуустар социальнай-экономическай сайдыылара” диэн өрөспүүбүлүкэ кэлим программатын холобурдаабыта.
Үөрэх министрэ Феодосия Габышева Арктика улуустарыгар үөрэх сайдыытын хайысхаларын туһунан дакылаатыгар “Көс оскуола”, “Арктика учууталлара” уонна да атын хотугу сиргэ үөрэҕи өрө тардыыга сыһыаннаах программалар үтүө түмүктэрин туһунан кэпсээтэ. “ЮНЕСКО-ны кытта “Көс оскуола” бырайыагы олоххо киллэрэммит, көһө сылдьан үөрэниигэ ураты статус иҥэрдибит. Ол курдук, биһиги бырайыакпыт моделын тыйыс усулуобуйалаах дойдулар ылыннылар. Ямало-Ненецкэй, Ханты-Мансийскай автономнай уокуруктар, Красноярскай кыраай, Москва уонна Скандинавия, Хотугу Америка уонна Африка бу бырайыак уопутун туһаналларын туһунан биллэрбиттэрэ”, – диэн кэпсээтэ Феодосия Габышева.
“Көс оскуола” бырайыак үлэлээбитин түмүгэр, 11 маннык статустаах оскуола баар буолбут, төрүт тыллара симэлийбэт кэскиллэммит, ыстаадаҕа табаны иитиинэн дьарыктанар дьон ахсаана элбээбит, дистанционнай үөрэхтээһин сайдыбыт уонна аҕыйах ахсааннаах үөрэнээччилээх оскуола үлэтэ оннунан хаалбыт.
Маны таһынан, “Арктика учууталлара” проект чэрчитинэн 100-тэн тахса учуутал хотугу сиргэ үлэлии барбыт.
Феодосия Габышева иһитиннэриитин түмүгэр “Арктика оҕолоро” государственнай программаны ырытан оҥорууну өйүүллэригэр ыҥырда. «Тыйыс усулуобуйалаах хотугу сиргэ олорор оҕолор өй-санаа, эт-хаан өттүнэн толору сайдар, сынньалаҥнарын уонна доруобуйаларын чэбдигирдэр сөптөөх тэрээһиннэри оҥорор аналлаахпыт», – диэн эттэ.