790
17 января 2015 в 15:05
Бэдэрээтчити кытта хантараак көтүрүллүөн сөп
"Томмот - Күөрдэм — Аллараа Бэстээх" тимир суолу тутуу генеральнай бэдэрээтчитин уларытар туһунан боппуруос өрөспүүбүлүкэҕэ бүгүн сытыытык турар. Салалта этэринэн, бу миэрэ олоххо киирдэҕинэ, тимир суол учаастага тиһигин быспакка, тигинэччи үлэлиэҕэ.
«Генеральнай бэдэрээтчити кытта хантараагы көтүрэри туруорсабыт. Тоҕо диэтэххэ, эбийиэги тутуу болдьоҕо иккис сылын көһөрүллэр», – диэн суруналыыстарга тырааныспар уонна суол хаһаайыстыбатын миниистирэ Семен Винокуров эттэ.
Федеральнай киин таһымыгар тустаах быһаарыы ылылыннаҕына, «Российские железные дороги» уонна «Железные дороги Якутии» компаниялар күүстэринэн тимир суол эриэ-дэхси үлэлиэҕэ.
“Томмот – Күөрдэм — Аллараа Бэстээх” бырайыак генеральнай бэдэрээтчитэ — Россия бөдөҥ холдина «Трансстрой». Бүгүҥҥү туругунан бу тимир суол учаастагар таһаҕас быстах кэмҥэ тиэйиллэр.
Томмот – Дьокуускай (Аллараа Бэстээх) 439 км уһуннаах суол 2013 сыл бүтүүтэ түмүктэниэхтээх этэ. Үбүлээһинтэн, о.д.а. баар кыһалҕалартан төрүөттэнэн тимир суолу үлэҕэ киллэрии болдьоҕо уһатыллыбыт.
Аркадий Васильев, СИА.
