932
07 мая 2015 в 10:48
Бүлүүгэ түөрт тыыл ветераныгар – саҥа квартира
Улуу Кыайыы 70 сыллаах үбүлүөйүн көрсө, улуустааҕы Ветеран сылын былаанынан, АЛРОСА хампаанньаттан Бүлүү улууһугар тиксэр дивидентэн үбүлэнэн, Бүлүү куорат ССРС народнай учуутала Михаил Андреевич Алексеев аатынан уулуссатыгар турар түөрт квартиралаах уопсай дьиэ тыыл ветераннарыгар ананан, бу күннэргэ үлэҕэ киириэхтээх. Квартиралар толору хааччыллыылаахтар: гаһынан ититии ситимэ холбоммут, туалет, ванна баар. Иэннэрэ 42-лии кв. миэтэрэ.
Бу квартиралар кимҥэ тиксэллэрин быһаарар 8 киһилээх хамыыһыйа улуус баһылыгын олунньу 6 күнүнээҕи 68 №-дээх дьаһалынан тэриллибитэ. Онно Үлэ уонна социальнай сайдыы министерствотын Бүлүүтээҕи управлениетыттан, улуус баайы-дуолу бэрийэр структуратыттан, Росреестртэн, административнай комиссиятыттан, ветераннар сүбэлэриттэн бэрэстэбиитэллэр киирбиттэрэ. Хамыыһыйа баһылыгы социальнай политикаҕа солбуйааччы салайыытынан үлэлээтэ.
Уопсайа 18 нэһилиэктэн 90 тыыл ветераныттан дьиэнэн хааччыйар туһунан көрдөһүүлээх сайабылыанньа киирбитэ. Маны хас биирдиилэрин үөрэтэн көрөр сыаллаах сэттэ мунньах ыытылынна. Бигэргэтиллибит балаһыанньанан квартиранан хааччыйыы сүрүн критерийдэрэ: олорор дьиэлэрэ суох уонна көрөр-истэр оҕото суох дьон. Онон, докумуоннары көрүү-үөрэтии, сүүмэрдээһин кэнниттэн, хамыыһыйа дьиэҕэ-уокка ордук наадыйар ветераннар олорор усулуобуйаларын билсэр сыаллаах нэһилиэктэринэн сырытта. Ол курдук, Орто Бүлүүгэ, Мастаахха, Күүлэккэ, Сыдыбылга уонна Бүлүү куорат иһигэр үлэлээтибит.
Түмүк быһаарыы муус устар 28 күнүгэр таҕыста. Түөрт тыыл ветераныгар квартира биэрэр туһунан хамыыһыйа боротокуолун улуус баһылыга С.Н.Винокуров анал дьаһалынан бигэргэттэ.
Кыайыы күнүн бэлиэтиир дьаһаллар чэрчилэринэн, ыам ыйын 6 күнүгэр күнүс 11 чаастан квартира күлүүстэрин улууска биллэр, ытыктанар ветераннарбыт үөрүүлээх быһыыга-майгыга тутуохтара: Александрова Пелагея Федоровна, Хампа нэһилиэгин олохтооҕо, Наумова Матрена Васильевна, Бүлүү куоратыттан, Николаева Анисия Павловна, II Күүлэт 105 саастаах кырдьаҕаһа, Степанов Аким Алексеевич, Тыымпы нэһилиэгиттэн.
Кэлэр сылларга улуус салалтата тыыл ветераннарын квартиранан хааччыйыы үлэтин өссө да салгыыр, кэҥэтэр былааннаах. Онон быйыл олохтоммут дьиэҕэ наадыйар ветераннар испииһэктэрэ инникитин тутуһуллуо. Бүлүү улууһун саҕалааһына Саха Республикатын Правительствотын Председателэ Г.И.Данчикова сэҥээриитин ылла. Кини бу бачыымы республика бары улуустарыгар тарҕатар наадатын бэлиэтээбитэ.
В.Ф. Тихонова,
улуус баһылыгын социальнай политикаҕа солбуйааччы.
