Бүтүн Россиятааҕы научнай-практическай семинар

Семинары Федерация Сэбиэтин Аппараатын правовой управлениета көҕүлээн ыытта. Онлайн режимҥэ ыытыллыбыт видеоконференцияҕа Саха сирин парламенын спикерин солбуйааччы Ольга Балабкина, судаарыстыбаннай тутууга уонна сокуону оҥорууга сис кэмитиэт бэрэссэдээтэлэ Алексей Еремеев кытыннылар.

Семинар үлэтигэр Федерация Сэбиэтин оборонаҕа уонна куттал суох буолуутугар Кэмитиэтин бэрэссэдээтэлэ Виктор Озеров, РФ Ис дьыалаҕа министерствотын, Генеральнай прокуратура, ФСБ, научнай тэрилтэлэр бэрэстэбиитэллэрэ, Федерация Сэбиэтин Аппараатын Правовой управлениетын үлэһиттэрэ кыттыыны ыллылар.
Тэрээһин модераторынан юридическай наука доктора Владимир Алешин буолла.
Кэккэ дакылааттар истилиннилэр. Экстремизмы утары иһитиннэрии көмөтүнэн охсуһуу туһунан дакылааты РФ ИДьМ Москва куораттааҕы экстремизмы утары охсуһууга Киинин үлэһитэ Александр Бахирев оҥордо.

Кини 2014 с. сэтинньигэ РФ Президенэ экстремизмы утары охсуһуу Стратегиятын бигэргэппитин, быйыл кулун тутар 31 к. национальностар дьыалаларыгар Федеральнай агентство тэриллибитин иһитиннэрдэ. Агентство үлэтинэн национальностар уонна конфессиялар икки ардыларыгар сыһыаннаһыылар эйгэлэригэр судаарыстыбаннай мониторины оҥоруу, расовай, национальнай, итэҕэл бэлиэлэринэн дискриминация ханнык баҕарар көстүүлэрин сэрэтии буолар.

ИДьМ министрин салалтатынан РФ-ҕа экстремизмы утары охсуһууга Биэдэмистибэлэр икки ардыларынааҕы хамыыһыйа сүрүннүүр оруоллаах. Бу хамыыһыйа иһинэн оробуочай бөлөх сонуну тиэрдэр ситимнэргэ уонна Интернет нөҥүө экстремизм идеологиятын тарҕатыыны утары үлэлиир.

«Бүгүҥҥү күҥҥэ радикальнай ислам, неонацизм идеологияларын тарҕатар, судаарыстыбаннай тутулу күүс өттүнэн уларытыыга ыҥырар сүүһүнэн интернет-сайтар дьайаллар. Бэлиэтээн эттэххэ, ити сайтар омук дойдуларын хостиннарыттан үлэлииллэр. Манан сибээстээн Интернет эйгэтин бэрээдэктээһиҥҥэ, үүнэр көлүөнэ бобуулаах контеҥҥа уонна буортулаах ресурсаларга тииһиниитин хааччахтааһыҥҥа үлэ суолталаах туһаайыытынан сүрүннэммит тэрээһиннэр буолаллар», – диэн бэлиэтээтэ Александр Бахирев.

Бу туһаайыыга миэрэлэр ылыллаллар. Экстремизмы тарҕатар интернет-сайтары суут иннинэ сабар кыаҕы биэрэр Федеральнай сокуон номнуо күүһүгэр киирдэ. Ону таһынан экстремистии матырыйааллар дааннайдарын базата үөскэтиллэр.

Александр Бахирев билигин үлэлиир сокуоҥҥа, чуолаан «Иһитиннэрии, информационнай технологиялар тустарынан уонна информацияны көмүскээһин туһунан» Федеральнай сокуон 10 ыст. 6 чааһыгар уларытыы киллэрэргэ этии оҥордо. Ити ыстатыйа сэриини пропагандалааһыҥҥа, национальнай, расовай эбэтэр итэҕэл өттүнэн өстөһүүнү күөдьүтүүгэ туһаайыллар иһитиннэриини тарҕатыыны бобор ис хоһоонноох.