Быраас сүбэтин — Интернетинэн

Дойду гражданнара Интернет нөҥүө судаарыстыба өҥөлөрүн ыларга номнуо үөрэнэн эрэллэр диэххэ сөп. Ону таһынан кинилэр табаардары, аһы-үөлү, эми, рестораннарга остуоллары итиэннэ сөмөлүөт, поезд, киинэ билиэтин сакаастыыллар. Аны билигин киһи дьиэтиттэн тахсыбакка олорон, быраас сүбэтин ылыан сөп.
Россияҕа телемедицина сайдыытыгар страховой хампаанньалар болҕомтону уураллар. Кинилэр чааһынай клиникалары кытта Интернет нөҥүө эмчиттэр консультацияларын ыытар буоллулар. Итинник өҥөнөн бэйэ баҕатынан медицинскэй страхование полиһын, ону сэргэ инвестиционнай уонна олоҕу страховкалыыр мунньуллар полистары атыыласпыт дьон туһанар кыахтанар. Маныаха бастакы сылга – босхо.
Ити өҥөнү оҥоруу технологията балайда судургу. Өҥөнү ылар туһугар бастаан анал сыһыарыыны компьютерга киллэрии эбэтэр сайтка регистрацияланыы ирдэнэр, ол кэнниттэн наадалаах исписэлиис араспаанньатын баттаан аһыллар. Дьуһуурунай быраас видеосибээскэ аҕыйах мүнүүтэ иһигэр тахсар.
Бу консультация сүбэлиир быһыылаах-майгылаах буоларын туһунан этэр тоҕоостоох. Чопчу диагноһы туруорар эбэтэр бигэргэттэрэр туһугар, ону сэргэ эми анатар инниттэн киһи син биир бырааска бэйэтинэн тиийэрэ наадалаах.
Билигин маннык сервистэр тарбахха баттаналлар. Ол эрээри, экспердэр билгэлииллэринэн, ити туһаайыы сайдар чинчилээх итиэннэ Россия дьоно сүбэ ылар туһугар виртуальнай быраас кабинеттарыгар киириилэрэ маасабай буолуон сөп.
“Үгүс дойдуларга Интернетинэн пациеннар уонна луохтуурдар алтыһыылара номнуо балайда үчүгэйдик сайдыбыт. Олох көрдөрбүтүнэн, маннык өҥөлөргө наадыйыы улахан. Мин санаабар, Россия эмиэ итинтэн туора турбата буолуо”, – диир Бүтүн Россиятааҕы страховщиктар сойуустарын иһинэн Страхование институтун Аналитическай киинин салайааччыта Павел Самиев.

Чопчу диагноз — тус көрсүүгэ

Биллэрин курдук, медицинскэй тэрилтэлэр нэ­һилиэнньэлээх пууннарга барыларыгар баар буолбатахтар, оттон баар да буоллахтарына, киһи наадыйар исписэлииһэ ардыгар суох. “ЭРГО Жизнь” СК страхование тустаах киһиэхэ ананар көрүҥэр бырабылыанньатын бэрэссэдээтэлин солбуйааччы Михаил Чехонин: “Онлайн-сервистэр медицинскэй өҥөлөр тииһимньилээх буолууларын боппуруоһун быһаарарга көмөлөһөллөр. Онон билигин кинилэргэ наадыйыы номнуо баар, оттон кэнэҕэс күннэтэ ирдэнэр суолталаах буолуохтара”, – диир.
Мегаполистар олохтоохторугар Интернет нөҥүө быраас сүбэтин-аматын ылыы – бу бириэмэни кэмчилээһин, диэн эбэн эттэ “Ренессанс страхование” бөлөх бэйэ баҕатынан старховкалааһыҥҥа (ДМС) салайар директора Наталья Харина.
Харина эппитинэн, ыарыы бастакы сибикилэрэ үөскүүр түгэнигэр эрдэ бырааска тииһинии суотугар киһи ыалдьыытын ахсаанын маннык сервис намтатар кыахтаах.
Страховой хампаанньаларга быраас видео-консультацията ороскуоттарын аҕыйатыы өттүгэр барыстаах буолуон сөп. “Биһиги статистикабыт этэринэн, ыалдьыы түгэнин 40%-гар балыыһаҕа кэлэр наадата суох, – диэн чопчулаата Наталья Харина. — Клиникаларга ити барыстаах, ол эбэтэр кинилэр клиеннэрин базата эбиллэр”.