«Бытантайга» саха сүөһүтэ саҥа хотоннонно

Саҥа тутууну Үлэ геройа, «Гражданскай килбиэн» бэлиэ хаһаайката, 43 сыл устата эҥкилэ суох ыанньыксытынан үлэлээбит, Эбээн-Бытантай, Түгэһиир нэһилиэгин бочуоттаах гражданина Ульяна Николаевна Никитина алгыс тылынан, аал уоту аһатан, алҕаан арыйда. «Үпэндьэл» эбээлэр эбээннии, «Аянеса» оҕо холобурга сылдьар ансаамбыллара тэрээһини киэргэттилэр.
Сүрүн бэдэрээтчит – «СГ Строй» хааччахтаммыт эппиэтинэстээх тэрилтэ (ген. дириэктэр Алексей Трофимов) бу тутууну иилээн-саҕалаан ыытта. Хотон сырдык, сылаас, киэҥ-куоҥ, үүт аһы астыыр тэриллээх анал хостоох, аактабай саалалаах, ыанньыксыттар, үлэһиттэр сынньанар сирдэрэ барыта тус-туһунан, онон үлэлииргэ бары усулуобуйа тэрилиннэ диир тоҕоостоох. Бу тутуу түргэн кэмҥэ, баара-суоҕа үс кыһыҥҥы ый иһигэр тутулунна. Олохтоохтор да, үөрүүлээх тэрээһиҥҥэ мустубут ыалдьыттар да саҥа тутууну бэркэ сөҕө-махтайа, астына сэҥээрдилэр.
Саха норуотун аччык, сут дьылларга өлөр өлүүттэн өрүһүйбүт саха сүөһүтэ буолар. Былыр-былыргыттан саха сүөһүтэ киһи өттүттэн улахан кыттыгаһа суох айылҕаттан ыраас, аһыгар хаппырыыһа суох, аччыктааһыны тулуйумтуо, ыарыыга бэриммэт, томороон тымныыга кыһаммат. Саха ынаҕын курдук айылҕа айбыт сүөһүтэ аан дойдуга түөрт эрэ сүөһү көрүҥэ хаалан турар. Исландияҕа криохранилище баар, онно аан дойдуттан туох баар үүнээйи сиэмэтин тоҥорон, кэлэр көлүөнэҕэ диэн ууран тураллар. Ол курдук, биһиги эмиэ кэлэр көлүөнэбитигэр, кэнчээри ыччаппытыгар саха сүөһүтэ хайаатар даҕаны хаалыахтаах. Маныаха саҥа хотон тутуллан үлэҕэ киирбитэ сүдү кылаат буолар. Ыччат дьоммут тыа хаһаайыстыбатын салааларын баһылаан, билиилэрин-көрүүлэрин саха ынаҕын иитиитигэр туһанан саҥа хотоҥҥо үлэ-хамнас күөстүү оргуйуоҕа, сайдыы суола тэлэллиэҕэ, улуус социальнай-экэнэмиичэскэй балаһыанньата биллэ тупсуоҕа диэн бигэтик эрэнэбит.
Үөрүүлээх тэрээһиҥҥэ Саха Өрөспүүбүл­үкэтин тыатын хаһаайыстыбатын уонна аска-үөлгэ политикатын миниистирэ Петр Алексеев уонна СӨ министиэристибэлэрин, биэдэмистибэлэрин бэрэстэбиитэллэрэ, улуус салалтата, тэрилтэлэр салайааччылара кыттыыны ыллылар, эҕэрдэ тылларын эттилэр.

Яна Рожина.