Чуоналыырга ыһыах араас омугу түмтэ

Ыһыах сүдү күүһэ – Алгыс. Ол быһыытынан, Мииринэй сиригэр-уотугар араас омук мустаммыт норуокка биллибит алгысчыт Саввинов Семен Семеновичтыын сир-дойду иччилэриттэн көрдөһөн, кымыһынан айах тутан, Үрдүк айыыларга сүгүрүйдүбүт.

Ол кэнниттэн бу иннинэ иһийэн турбут айылҕабытыгар оһуохай дуорайбыта, ырыа-тойук дьиэрэйбитэ.

Култуурунай тэрээһиннэр бырагыраамаларын олус сатабыллаахтык Таас-Үрэхтээҕи култуура дьиэтин директора Яковлева Любовь Егоровна, социальнай үлэһит Еремеева Татьяна Дормидонтовна, баянист Игнат  Степанович Саввинов тэрийдилэр. Ыһыаҕы Арыылаах сэлиэнньэтиттэн Альбина Даниловна Трифонова салайан ыытта. Кини диктордыы чуор куоластаах буолан, биһигини барыбытын түмэ тардан, бырааһынньык эйгэтэ  үөскээтэ. Онон дьиэбитигэр-уоппутугар сылдьар кэриэтэ холкутук сынньанныбыт.

Манна буолбут кэнсиэргэ Сүлдьүкээртэн «Бирикан» ансаамбыл (салайааччы Неустроев И. А.) кытынна. Бу ансаамбыл  чилиэнэ, «Алаас хотуна» олохтоох түмсүү салайааччыта Ксения Спиридоновна Саввинова, ыһыах ыһыллар сирин — Чуоналыыры төрүттэрбит бултуур-алтыыр сирдэрэ диэн киэн тутта ахтыбыта.

Итини сэргэ Арыылаахтан «Северянка», Чернышевскай бөһүөлэгиттэн  «Вилючанка» ансаамбыл (салайааччы Голомарева Надежда Самойловна), Мииринэйтэн «Встреча» уонна “Арчы” ансаамбыл (сал. Григорьева Розалия Ивановна) кэнсиэргэ биһирэбили ылбыттара. Ордук көрөөччүлэр 5 кылаас үөрэнээччитэ, Сүлдьүкээр бөһүөлэгиттэн сылдьар Алексеев Толя, Николаева Татьяна Владимировна, Чернышевскайтан Егорова Наталья Николаевна, Таас-Үрэхтэн Семенова Зинаида Филипповна, Данилов Андрей Матвеевич уонна 30 сыл устатыгар Таас-Үрэххэ инбэлииттэр обществоларын салайбыт Маргарита Ивановна Гаврильева толорбут нүөмэрдэрин биһирээтилэр. Ол да иһин кинилэр ырыаҕа бириистээх миэстэлэри ыллылар.

Аныгы уран тарбахтаах иистэнньэҥнэр илиилэринэн тикпит оһуордаах-мандардаах таҥастара-саптара көрүөххэ олус кэрэ этэ. Национальнай таҥаһы тигиигэ тэриллибит күрэххэ Гран-при хаһаайынынан Мирнэй куораттан Ивановтар дьиэ кэргэттэрэ буолбута.

Түһүлгэни өбүгэлэрбит оонньуулара киэргэппиттэрэ. Ханнык да  ыһыах күрэхтэһиитэ суох ааспат. Бу да сырыыга хабылык, хаамыска, онтон да араас өбүгэ саҕаттан кэлбит оонньуулар умнууга хаалбатахтара. Күрэхтэһиини Арыылаах бөһүөлэгиттэн Яковлева Альбина Алексеевна, Саввинов Михаил Дмитриевич иилээн-саҕалаан ыыппыттара.

Бу саха дьоно уутуйан үөскээбит улуустарыттан бэрт ыраах сиргэ эмиэ үгэһи тутуһан, ыһыахха эт сиэтибит, кымыс истибит, лэппиэскэ, алаадьы, сыалаах убаһа этэ остуол хотойорунан тардыллыбыттара. Ити барыта 200-тэн тахса киһиэхэ босхо. Оттон маны дьоҥҥо күндүлээбит киһинэн Мииринэй оройуонугар өр сылларга инбэлииттэр обществоларын бэрэссэдээтэлинэн үлэлиир Ирина Борисовна Хлебодарова буолар. Бииртэн-биир саамай минньигэс аһы-үөлү официаннар киллэрэ турдулар. Оттон саамай бастыҥ, бочуоттаах миэстэни остуолга бырааһынньык туорда ылла. Итини Таас-Үрэхтэн социальнай үлэһит Т.Д.Еремеева астаабыт. Татьяна Дормидонтовна этэринэн, Таас-Үрэххэ 39 инбэлиит учуокка турар. Кинилэр ортолоруттан ДЦП ыарыылаах 1 группа инбэлиит Данилов Женя кэлэн ыһыаҕы көрөн астынна. Биир дойдулаахпыт “Живые алмазы Якутии” Айылҕа пааркатын директора, бэйэтин эйгэтигэр туйгун бэлиэлээх Симонов Сергей Семенович инбэлииттэргэ пааркатын босхо көрдөрөрүгэр махтанабыт.

Оройуоҥҥа ыытыллар бары тэрээһиннэргэ көҕүлээччинэн биһиги бары таптыыр уонна ытыктыыр киһибит Ирина Борисовна Хлебодарова буолар. Ирина Борисовна – аһаҕас, амарах, дьоҥҥо үтүө сыһыаннаах киһи, саталлаах салайааччы уонна тэрийээччи. Бэйэтин холобурунан биһигини айарга-тутарга, бэйэ доруобуйатын харыстанарга үөрэтэр. Кини ыһыах саҕаланыаҕыттан түмүктэниэр диэри дьон ортотугар түбүгүрэ сырытта.

Дьэ, ити курдук, самаан сайын сүрүн бырааһынньыга – Ыһыах Чуоналыырга сэргэхтик ааста. Дьон бары күүс-уох ылан, аныгыс сайыҥҥа диэри бөҕөх санаалаах, кэскиллээх былааннардаах, саҥа соруктары туруоран тарҕастылар.

Светлана Егорова,

 Мииринэй к.