Дальнай Востоктан саҥа сайаапкалар киирдилэр

Алта региоҥҥа – Амур уобалаһыгар, Приморьеҕа, Камчаткаҕа, Халымаҕа, Саха Өрөспүүбүлүкэтигэр уонна Чукоткаҕа олоххо киллэриигэ бэлэм 7 ТОР көрүлүннэ. Ити сайаапкалар муус устар бүтүүтүгэр бүтэһиктээх бигэргэтиигэ анаан хамыыһыйа мунньаҕар көрүллүөхтэрэ.

Амур эргин икки урутаан сайдыы сирин тэрийии сабаҕаланар – «Белогорск» агропромышленнай комплекс уонна Благовещенскайтан Хэйхэҕэ туоруур муостаны тутуу оройуонугар «Предмостовая» промышленнай-логистическай паарка.

«Белогорск» агропромышленнай урутаан сайдыы сиригэр инвестициялар 1,45 млрд солк. тэҥнэһиэхтэрэ, онтон 95% – чааһынай инвестиция. Үс оҥорон таһаарыы былааннанар – комбикорм собуота, сояны астааһын собуота уонна килиэп-буулка оҥоһуута.

«Предмостовая» икки площадкалаах – «Ровное» уонна «Березовка». Онуоха инвестициялар 140,9 млрд солк. сыаналаналлар, бюджет инвестицията ирдэммэт. Ити площадкаларга Россия уонна Кытай резиденнэрэ интэриэстээхтэрэ көһүннэ.

Приморскай кыраайга сибиинньэ иитэр комплекстаах, бурдугу мэлийэр собуоттаах «Михайловская» ТОР тэриллэригэр 43,7 млрд солк. инвестиция ирдэнэр, федеральнай үбүлээһинэ 10% кэриҥэ буолуоҕа.

Камчатка кыраайыгар 8 площадкалаах 13 инвестордаах «Камчатка» урутаан сайдыы сирэ былааннанар. Инвестициялар 34,6 млрд солк. тэҥнэһиэхтэрэ, ол иһигэр 6,5 млрд солк. – бюджет харчыта. Манна тыа хаһаайыстыбатын, порт-промышленность, туристическай-рекреационнай уонна авиа-тырааныспар тэрилтэлэрэ баар буолуохтара.

Магадан уобалаһыгар «Омсукчанскай» урутаан сайдыы сирэ сырьеҕа туһаайыллар.
Ити көрдөрүллүбүт бырайыактартан саамай сиппитинэн, Александр Осипов санаатынан, «Беринговскай» буолар (Чукотка автономнай уокуругар). Бастакы кэмҥэ 8 млрд солк. инвестиция ыытыллыаҕа. Беринговтааҕы таас чохтоох бассейн Чукотка биир саамай кэскиллээх сирэ буолар. Австралия «Tigers Realm Coal Limited» хампаанньата таас чох үөскүүр сиригэр сыллата 2 мөл. т итэҕэһэ суоҕу хостуурга былааннанар. Бу Берингов муоратын кытылыгар баар сиргэ тырааныспар уонна энергетика инфраструктуратын үөскэтии – АТР дойдуларыгар чоҕу тиэйиигэ анаан дириҥ уулаах муора пордун, ону сэргэ сир баайдаах учаастактан портка диэри массыына сылдьар уонна тимир суолу тутуу ирдэнэр.

Бырабыыталыстыба хамыыһыйатын көрүүтүгэр Саха сириттэн «Кангалассы» урутаан сайдыы сирин-уотун билиһиннэрэргэ былаанныыллар. Бюджеттан манна 200 мөл. солк. уонна 1 млрд солк. кэриҥэ чааһынай инвестиция ыытыллыаҕа. 2018 сылга олохтоох сырье төрүтүгэр тутуу матырыйаалларын оҥорууга 13 тэрилтэлээх индустриальнай паарка үөскүөхтээх.

Бастакы түөрт собуот номнуо быйыл баар буолуохтарын сөп. Александр Осипов бырайыак бэлэмин, ол эрээри инфраструктураны саҥардыллыахтааҕын эттэ.

Кини этэринэн, барыллааһын дьүүллэһиигэ билиһиннэриллибит бырайыактар бары олохтоох администрациялар өйөбүллэрин ылбыттар.

minvostokrazvitia.ru сайтыттан.