Депутат көмөтө уонна социальнай эппиэтинэс

Хаамар, сүүрэр суол

Олорор дьиэм иннигэр баар оҕо оонньуур площадкатыгар икки сыл аннараа өттүгэр биир ытык кырдьаҕас тахсан, мэлдьи хаамар этэ. «Үтүө дьыала, дьайыы батыһыннарыылаах буолар» диэн мээнэҕэ эппэттэр. Кинини батыһан, хас даҕаны аҕам саастаах дьон хаамар буоллулар. Сорохтор скандинавскай хаамыынан дьарыктаналлар.
Хаарга бэйэлэрэ ыллык суол тэлээхтииллэр. Биирдэ тахсан көрбүтүм, оллороот-боллороот, хаамарга олус эрэйдээҕэ.
Итини таба көрөн буолуо, биһиги уокурукпутуттан депутат Игорь Никитин бу сайын площадкаҕа хаамар, сүүрэр суол асфаллаан биэрдэ. Ытык кырдьаҕастар абыранар буоллулар диэммит, олохтоохтор үөрэбит эрэ.

Аны ити суолга оҕолор бэлисипиэттээн, самокаттаан абыраннылар. Тула сүүрэкэлииллэр, сырсаллар даҕаны. Ийэлэр кырачааннарын кэлээскэҕэ олордоннор, тула эмиэ хаамсаллар. Урут кумахха батылла сылдьаллара.
Онон олохтоохтор депутаппытыгар махталбыт муҥура суох. Игорь Никитин быыбарын хампаанньатын бэрт тэрээһиннээхтик ыыппытыттан, уокуругун быыбардааччылара тыыппалаах киһи буоларын сэрэйбиппит. Быыбардарга депутакка кандидаттар тугу-тугу эрэннэрбэттэрэ баарай? Сорох-сорохтор, этэргэ дылы, халлаантан сулуһу ылан биэриэх курдук буолаллара баар суол. Оттон быыбар бүппүтүн кэнниттэн ол эппиттэрин-тыыммыттарын таһы быһа умнан кэбиһээччилэр суох буолбатахтар, бааллар.

Аҥаардас биир сыл иһигэр

Кини быыбар иннинээҕи бырагырааматыгар оҕо аймаҕы, ыччаты өйүүр сыаллаах киин куоракка хас сыл ахсын биэстии оҕо оонньуур-спортивнай площадкатын туттарар гына пууннаах этэ. Игорь Никитин аҥаардас биир сыл иһигэр Дьокуускай куорат Богдан Чижик аатынан уулусса 18/1, Бестужево-Марлинскай 3/1, Хабаров 7/3, Чиряев 5/1, Ярославскай 8/1 нүөмэрдэригэр уонна Федор Попов аатынан уулуссаҕа улахан дүрбүөнэ-дарбаана суох оҕо площадкаларын туттаран дьэндэтэн кэбиспитэ.
Итини таһынан куорат Промышленнай уокуругун уонна Нам улууһун I Хомустааҕын олохтоохторун көрдөһүүлэринэн эмиэ площадкалар тутулланнар, үлэҕэ киирбиттэрэ. Оҕом үөрэммит Дьокуускай куорат 2 №-дээх оскуолатын таһынан ааһан иһэн, кырачааннар оонньуу-көрүлүү сылдьар Игорь Юрьевич туттарбыт площадкатын астына көрөбүн.
Ити оҕо площадкаларын тутуллууларыгар биир да кэп­пиэйкэ бюджет харчыта туттуллубатаҕын бэлиэтиибин.

Оҕо спордун сайыннарыыга

Игорь Никитин оҕо оонньуур-спортивнай площадкаларын туттарарын таһынан, оҕо спордун күүскэ өйүүр. Кини урукку өттүгэр баскетболга өрөспүүбүлүкэ сүү­мэрдэммит хамаандатын чилиэнэ этэ. Билигин баскетболга федерацияны салайар.
Өрөспүүбүлүкэҕэ ити спорт көрүҥэр сүүмэрдэммит хамаанданы бэлэмнээһиҥҥэ күүскэ үлэлэспитэ. Бастыҥ үлэлээх европейскай кулууптартан тренердэри ыҥыран аҕаланнар, бэйэбит тренердэрбитин кытта бииргэ үлэлээһин ньыматын олоххо киллэрбиттэрэ. Мантан икки куобаҕы өлөрөҕүн. Бастакынан, спортсмен оҕолор бэлэмнэрэ күүһүрэр, иккиһинэн, тренердэрбит үгүскэ үөрэнэн хаалаллар.
2012 уонна 2013 сылларга Литваттан Сабонис оскуолатыттан тренердэр кэлэн үлэлээбиттэр. Ити үлэ түмүгэ тута көстүбүтэ. Ол курдук, 2013 сыллаахха Уһук-Илиҥҥи федеральнай уокурукка биһиги баскетболист оҕолорбут чемпион буолбуттара. Урукку өттүгэр бу спорт көрүҥэр ситиһиллибэтэх ситиһии этэ.

2013 сыллаахха депутат 202-с микрооройуоҥҥа икки элбэх квартиралаах дьиэлэр икки ардыларыгар үгүс оборудованиелардаах «Воркаут» спортивнай площадка туттарбыта. Маннык спортивнай площадкалар оҕо барыта спордунан дьарыктаналларыгар кыаҕы үөскэппитэ. Оборудованиелары миэстэтигэр Жатайга сакаастаан оҥотторбуттара. Маннык гынан үбү-харчыны кэм­чилииллэр.

«Анаабыр алмаастара» уонна Черепановтар

«Социальнай эппиэтинэс», «социальнай сиэрдээх буолуу» диэн өйдөбүллэр тугу этэллэрий? Бастатан туран, хампаанньа нолуок төлүөхтээх, иккиһинэн, тулалыыр эйгэҕэ, айылҕаҕа харыстабыллаахтык сыһыаннаахтар, үсүһүнэн, үлэлии-хамсыы олорор сирин-уотун социальнай кыһалҕаларын быһаарсыыга кыттыһыахтаах.
Бу суруйуубар «Анаабыр алмаастара» хампаанньа социальнай эппиэтинэстээх буолуутун боппуруоһугар кылгастык тохтоон ааһыахпын баҕарабын. «Киэҥ иһит салааһыннаах» диэбиккэ дылы, биһиги олорор элбэх квартиралаах дьиэбит кыахтаах тэрилтэни кытта кэккэлэһэн, үгүстүк абыранабыт.
Ол курдук, тустаах тэрилтэ дьиэбит таһыгар Дьокуускайга биир бастакынан аныгылыы оборудованиелардаах, 1 мөл. 300 тыһ. суумалаах оҕо оонньуур площадкатын туттарбыта. Ол иннинэ итинник площадкалары Москваҕа эрэ көрөрбүт.
Биир кыһын хампаанньа оҕолорго анаан араас муус оҥоһуктары оҥотторбута. Ол дьыл кырачааннар муус сыырыынан сырылааннар, дуоһуйа оонньообуттара.
Быйыл сайын «Анаабыр алмаастара» дьиэбит иннинээҕи суолу асфаллаатылар. Ити иннинэ суол-иис эргэрэн, кыра, намыһах массыына кыайан сылдьыбат үлүгэрэ буолбута. Күүстээх ардах кэнниттэн бырыы бадараан буолара.

Дьиэ-уот, коммунальнай хаһаайыстыба эйгэтэ урут да, быйыл да биир саамай үгүс кыһалҕалардаах салаанан буолар. Оттон биһиэхэ, тыйыс тымныылаах Сахабыт сиригэр, сылаас, уот, этэргэ дылы, көй салгыммыт кэриэтэ тыын суолталаахтар. 2006 сылтан олорор дьиэбитин «Черепанов» ИП көрөр-истэр. Олохтоохтор икки тэрилтэттэн биирин талыахтаах этибит. Баһыйар үгүс куоласпытын «ЦАДС» диэн судаарыстыбаннай тэрилтэҕэ буолбакка, «Черепанов» ИП-га биэрбиппит уонна сыыстарбатахпыт.
Тустаах үлэлэригэр ис дууһаларыттан сыһыаннаһар дьон буолалларын кинилэр ыытар үлэлэриттэн-хам­настарыттан көрөҕүн. Били кырааска уонна өрөмүөн диэн тугун билбэтэхтэрэ ырааппыт подъезтары кыры-кылбаччы кырааскалаан, өрөмүөннээн кэбиспиттэрэ. Аны подъезтарбыт лаампалара субу-субу умайаннар хабыс-хараҥаҕа харбыалаһарбыт эмиэ баар буолара. Ону өр кэмҥэ умайбат лаампаҕа уларыттарбыттара. Киирэр ааммытын оҥотторбуттара. Подъезд аллараатын сылытар турбалар сип-синньигэс этилэр. Онон мэлдьи тоҥ-хаһаа буолара. Саас ахсын тэстэн, ууга барарбыт. Ол уу тоҥон муус устун сылдьааччыбыт. Ол турбалары уларыппыттара. Саас ууга баран эрэйдэммэт буоллубут. Подъезтарбытын нэдиэлэ ахсын муостатын, кэмиттэн-кэмигэр истиэнэлэри, кирилиэс перилаларын барытын аалан сууйаллар. Хас сайын ахсын ититэр ситими ыраастыыллар.
Итилэри таһынан хас Саҥа Дьыл бырааһынньыгын ахсын кинилэргэ сыһыарыылаах олорор дьиэлэр иннилэригэр араас өҥнөөх уоттарынан күлүмнүүр харыйалары туруораллар. Аны сайын ахсын дьиэлэрбит иннилэригэр сир симэхтэрин, сибэккилэри олордоллор. Быйыл хаһааҥҥытааҕар да элбэх дьэрэкээн сибэккилэри олордоннор, ааһар дьон хараҕын үөрдэллэр. Онон быйыл сайын олохтоохтор үөрүүбүт муҥура суох.