Депутат, сынньалаҥҥын хайдах атаараҕын?

Күөх быйаҥы сомустум

Дмитрий Саввин, парламент аграрнай по­литикаҕа уонна тыа сиригэр сис кэмитиэтин бэрэссэдээтэлэ:

— Дойдубар Томпо улууһун Кириэс-Халдьаайытыгар уоппускабын атаара сылдьабын. Оттоон бүттүбүт. Кураан дьыл буолан, күөх быйаҥ намыһах сирдэргэ үүммүт, үрдүк сирдэргэ суох. Кыайан техника киирбэт, уу-хаар турбут кута сирдэрин илиинэн оҕустубут. Былырыын сэттэ оту ылбыт буоллахпытына, быйыл алта оту ыллым. Онон куһаҕана суох.

Үгүстүк айылҕаҕа сылдьабын

Марфа Филиппова, Ил Тү­­мэн мандаакка уонна рег­ламеҥҥа ха­мыы­­һыйатын бэрэс­сэдээ­тэлэ:

— Төрөөбүт-үөскээбит дойдубар Үөһээ Бүлүүгэ кэлэммин астына-дуоһуйа сынньана сылдьабын. Икки сиэммин көрөбүн. Күн ахсын арыыга киирэммит сөтүөлүүбүт. Үгүстүк айылҕаҕа сырыттым, көй салгынынан тыынным. Өбүгэлэрбит тимири уһаараары болгуо ылар Сата хайатыгар сылдьаммын астынным.
Быйыл оскуоланы бүтэрбиппит 35 сыла туолан, кылааһынан Өлүөнэ очуостарыгар сынньанныбыт. Улахан сиэмминээн Анапаҕа бараары сылдьабыт.
Маны таһынан аны күһүн буолаары турар муниципальнай таһымнаах быыбарга бэйэм уокурукпар Үөһээ Бүлүү уонна Горнай улуустарыгар «Сиэрдээх Россия» партияттан кандидаттары туруорууга үлэлэстим. Таарыйа быыбардааччыларбын кытта көрүстүм.

Сынньалаҥы үлэни кытта дьүөрэлээн

Александр Сусоев, Ил Түмэн депутата:

— Соторутааҕыта уоппускам кэмигэр Камчаткаҕа устудьуоннар тутар этэрээттэрэ хайдах усулуобуйаҕа үлэлии-хамсыы сылдьалларын, олороллорун көрө-истэ бара сылдьыбытым. Билигин онно Саха сириттэн 120 ыччат үлэлиир. Быйыл итиннэ бэһис сылларын үлэлии сылдьаллар. Сменанан үлэлиир буоланнар, үлэлэрэ чэпчэкитэ суох. Астара-үөллэрэ, олорор усулуобуйалара үчүгэй. Дьарыктаналларыгар анаан спортивнай площадка тутан биэрбиттэр. Оҕолор настарыанньалара үчүгэй. Камчаткаҕа тиийбит күүстээх аҥаар балыктаабатаҕына, этэргэ дылы, аньыыта бэрт буолуо. Онон өрөбүлгэ түбэһиннэрэн, дуоһуйа балыктаатыбыт.
Сынньалаҥмар эт-хаан өттүнэн сайдыыбар, доруобуйабар болҕомтобун уурабын. Нэдиэлэҕэ иккитэ-үстэ Дьокуускай куорат пааркатыгар кэлэммин сүүрэбин. Тохсунньуттан дьарыкпын саҕалаабытым.

«Өлөөммөр тиийээри үөрэ сылдьабын»

Елена Голомарева, Ил Түмэн хотугу төрүт олохтоох аҕыйах ахсааннаах норуоттар боппуруостарыгар уонна Арктика дьыалаларыгар сис кэмитиэтин бэрэссэдээтэлэ:

— Сайыҥҥы кэмҥэ үлэ-хамнас тохтоон, харан хаалбатын курдук, Россия Президенин Владимир Путин общественнай приемнайын үлэлэтэбин. Бу нэдиэлэҕэ Мэҥэ-Хаҥалас улууһугар Хорообукка уонна Аллараа Бэстээххэ тиийэ сырыттыбыт.
Аллараа Бэстээх олохтоохторо сэлиэнньэ генбылаанын уларытарга, сынньалаҥ пааркатын, даача сирдэрин киллэрэн биэрэргэ туруорсаллар. Өрүс биэрэгэ сууллуутуттан алта олорор дьиэ эмсэҕэлээбит эбит. Бу дьиэлэр ханнык да бырагыраамаҕа киирбэккэ тураллар. Федеральнай суол бөһүөлэк иһинэн ааһарын нэһилиэнньэ сөбүлээбэтин биллэрдэ. Суол быһылааннара таһаарыллаллар эбит. Итилэри таһынан электроэнергия кыамтата мөлтөҕөр, сир боппуруоһугар болҕомтобутун уурарбытыгар олохтоохтор эттилэр.
Кэргэммин кытта Кытайга Бэйдэйхэҕэ сынньанан кэлбиппит. «Якутия» авиахампаанньа чартернай рейс арыйан, манна Саха сириттэн үгүс киһи тиийэн эмтэнэр, сынньанар эбит. Араҕас муораҕа дуоһуйа сөтүөлээтим.
Билигин төрөөбүт-үөскээбит Өлөөммөр бараары үөрэ-көтө, астына аҕай сылдьабын. Хомойуох иһин, дойдубар сыл ахсын тиийэрим кыаллыбат.

«Тиэргэммин тупсарабын, уһанабын»

Юрий Баишев, Ил Түмэн дьиэ кэргэн, оҕо аймах, ыччат дьыалаларыгар, чэгиэн-чэбдик олоххо уонна спорка сис кэмитиэтин бэрэссэдээтэлэ:

— Сайыҥҥы сынньалаҥмын Дьокуускайбар атаара сылдьабын. Дьиэбэр-уоппар кыралаан уһанабын. Тиэргэммин тупсарабын, ситэрэбин. Уоппускабар хаһан даҕаны атын сирдэргэ, соҕуруу куораттарга, тас дойдуларга барааччым суох. Өлүөхүмэҕэ тиийэммин астына-дуоһуйа балыктаатым. Айылҕаҕа сынньанным, күүс-уох ыллым.