Дмитрий Саввин Томпоҕо отчуоттуур

Кинилэр үс бөлөххө арахсан муниципальнай тэриллиилэргэ үлэлииллэр. Дмитрий Саввин баар бөлөҕө Мэҥэ-Алдан, Томпо национальнай (эбээн), Ыҥаа, Байаҕантай, Теплай Ключ, Охотскай Перевоз, Саһыл нэһилиэктэригэр, Хаандыгаҕа уонна Дьабарыкы-Хайаҕа социальнай объектарга сылдьыаҕа уонна нэһилиэнньэни кытта көрсүөҕэ. Оройуон 135,8 тыһ. кв. килэмиэтир киэҥ иэннээх сиригэр барыта 9 нэһилиэнньэлээх пуун баар, онно 13 500-тэн тахса киһи олорор.
Томпо оройуона өрөспүүбүлүкэ түргэн тэтимнээхтик сайдар уонна улахан кэскиллээх оройуоннарыттан биирдэстэрэ буолар. Ол кэккэ сыаналаах, судаарыстыбаҕа экономическай өттүнэн барыстаах сир баайдааҕын уонна оройуон киинэ – Хаандыга Саха сиригэр тырааныспар бөдөҥ сүһүөҕүнэн буоларын кытта сибээстээх. Томпо оройуонун администрацията таас чоҕу уонна кыһыл көмүһү хостуур промышленность оҥорон таһаарыытыгар ураты суолтаны уурар.
Тыа хаһаайыстыбата оройуон экономикатын биир тутаах салаатынан буолар. Кэнники сылларга Томпо оройуонугар тыа хаһаайыстыбатын сайдыытыгар кэккэ суолталаах миэрэлэр ылыллыбыттара. Бу кэмҥэ бородууксуйаны оҥорон таһаарыы улааппыта, тыа хаһаайыстыбатын тэрилтэлэрин туруга арыый тупсубута. Итини сэргэ оройуон агропромышленнай комплексын бигэ туруктаахтык сайдыытыгар проблемалар бааллар.
Ил Түмэн тыа сиригэр уонна аграрнай политикаҕа сис кэмитиэтин бэрэссэдээтэлэ Дмитрий Саввин нэһилиэнньэ ыйытыыларыгар хоруйдуоҕа, «2012-2018 сылларга Саха Өрөспүүбүлүкэтигэр Томпо оройуонун социальнай-экономическай сайдыыта» муниципальнай программаны олоххо киллэриигэ баар проблемалары дьүүллэһиэҕэ. Ону таһынан, өрөспүүбүлүкэ народнай депутата улуус олохтоохторун кытта «Саха Өрөспүүбүлүкэтигэр тыа хаһаайыстыбатын сайдыытын туһунан» сокуон барылын дьүүллэһиэҕэ.