1391
21 мая 2015 в 14:05
Дмитрий Семенов ДСК үлэтэ туруктааҕын бэлиэтээтэ
Норуот депутата Дмитрий Семенов ыам ыйын 19 к. «Дьиэ тутар кэмбинээт» ААО салалтатын кытта оробуочай көрсүһүүнү ыытта уонна тэрилтэ оҥорон таһаарар кыамталарын көрдө. Бу көрсүһүү кини Аппа уҥуордааҕы быыбардыыр уокурукка үлэтин чэрчитинэн ыытылынна. Оробуочай көрсүһүүгэ «ДСК» ААО генеральнай Игорь Гаврилкин, кэмбинээт кылаабынай инженерэ Алексей Лисенев уонна «ДСК» ААО директордарын сэбиэтин бэрэссэдээтэлин солбуйааччы Анатолий Божедонов кытыннылар.
Өрүттэр тэрилтэ материальнай-техническэй базатыттан саҕалаан үлэҕэ кэлэр миграннарга, тутуу политикатыттан олохтоох уонна тиэллэн кэлэр сырье хаачыстыбатыгар тиийэ боппуруостары дьүүллэстилэр.
Кэмбинээт генеральнай Игорь Гаврилкин иһитиннэрбитинэн, бүгүҥҥү күҥҥэ манна араас идэлээх, квалификациялаах 800 киһи үлэлиир. Биир суолталаах чахчынан кэмбинээккэ үлэлээччилэр сүнньүнэн олохтоох кадрдар буолаллара бэлиэтэннэ. Игорь Альбертович «ДСК» ААО олохтоох сырьену ордорорун эттэ. Ол курдук, арматура, базальт, цемент, кумах уо.д.а. олохтоох сырье көрүҥнэрэ туһаныллаллар.
Уопуттаах уонна өр сылларга кэмбинээккэ үлэлээбит Анатолий Божедонов тэрилтэ историятын уонна тутуу салаатын уопсай туругун туһунан кэпсээтэ.
Бу Саха сирин тутууга салаатын бөдөҥ оҥорон таһаарар тэрилтэтэ 1988 сылтан үлэлиир. Кэмбинээт тутуу конструкцияларын оҥорон таһаарар, дьиэни тутар уонна ырыынак сыанатынан батарар. Маныаха Дьокуускайга олорор дьиэ 1 кв. миэтэрэтигэр саамай намыһах сыаналартан биирдэстэринэн атыылыыр.
Производственнай базаны көрүү кэмигэр Дмитрий Александровичка 7 сыах үлэтин, ол иһигэр арматураны оҥорор, формалыыр уонна бетону мэһийэр сыахтары көрдөрдүлэр. Дьокуускай куоракка 30-ча объегы тутууну генеральнай бэдэрээттэһэр үлэ сулууспата ыытар. Ону сэргэ элбэх ахсааннаах араас көмө сыахтар уонна сулууспалар бааллар, ол иһигэр тепловой сыах чугастааҕы микрооройуоннары сылааһынан уонна итии уунан хааччыйар эбит.
«Кэмбинээт дьиэ 15 араас көрүҥүн тутар кыахтаах, – диэтэ депутакка туһаайан Игорь Альбертович, – ол эрээри, хомойуох иһин, элбэх этээстээх олорор дьиэлэри тутууга анаан сир учаастактарын анатыы уонна докумуонун оҥоруу дьиэ тутардааҕар ордук элбэх бириэмэни ылар».
Норуот депутата, парламент тутууга уонна ДьУоКХ сис кэмитиэтин чилиэнэ, «Саха сирин тутааччыларын сойууһа» НКО управлениетын коллегиальнай сэбиэтин чилиэнэ Дмитрий Семенов кэмбинээт базата бөҕөтүн, тутуу конструкцияларын таһаарыыга туруктаах үлэтин, Дьокуускайга бөдөҥ панеллартан дьиэни тутууга үлэтин кээмэйэ улаханын уонна атыттарга тэҥнээтэххэ, 1 кв. м сыаната чахчы намыһаҕын бэлиэтээтэ. Дмитрий Александрович блоктартан тутууну кытта тэҥнээн көрдөххө, кэмбинээт таһаарар панеллара биһиги хотугу усулуобуйабытыгар ордук табыгастаахтарын, энергияны кэмчилээһин ирдэбиллэригэр эппиэттииллэрин уонна түргэнник тутуллалларын бэлиэтээтэ.
