Дьокуускайга бөдөҥ эргиэн, култуура кииннэрин бэрэбиэркэлиэхтэрэ

Киин куорат мэрин кэтиир уонна толорор уорганнар салайааччыларын, уокуруктар баһылыктарын кытта нэдиэлэтээҕи мунньаҕа мүнүүтэ устата саҥата суох турууттан саҕаланна. Мунньахха кэлбиттэр Кемерово куоракка “Зимняя вишня” эргиэн киинигэр баһаарга өлбүттэри кэриэстээтилэр.

Айсен Николаев, бастатан туран, кэтиир уорганнар салайааччыларыгар туһаайан, дьон элбэхтик мустар миэстэлэригэр, ону сэргэ оҕо уонна куорат социальнай тэрилтэлэригэр баһаары утары куттал суох буолуутун дьаһалларын тутуһууну бэрэбиэркэлииргэ көрдөстө.

Россия ЫБММ Дьокуускай куораттааҕы управлениетын кэтиир үлэҕэ отделын начальнигын эбээһинэстэрин быстах кэмҥэ толорооччу Ким Верховцев мунньах буолбут күнүн сарсыҥҥытыттан үлэни саҕалыыр былааннаахтарын эттэ. «Бастакынан киинэ театрдара уонна сынньалаҥ зоналара баар кииннэри, ол кэнниттэн дьон үгүстүк мустар эбийиэктэрин бэрэбиэркэлиэхпит», — диэтэ кини.

Маны сэргэ ыам ыйын 1 күнүттэн киин куоракка баһаартан куттал суох буолуутугар үй ыйдаах тэрээһин биллэриллэр. Бу тэрээһин олоҕу-дьаһаҕы хааччыйар, элбэх киһи түмсэр социальнай эбийиэктэри сааскы-сайыҥҥы баһаар куттала үөскүүр кэмигэр бэлэмниир уонна Дьокуускай куорат уокуругар административнай, олорор дьиэлэргэ гражданнарга куттала суох усулуобуйалары үөскэтэр сыалтан сыллата ыытыллар.

Гражданскай оборонаҕа, нэһилиэнньэни, сири-уоту айылҕаттан уонна техногеннай төрүөттээх ыксаллаах быһыыттан-майгыттан харыстааһыҥҥа, Дьокуускай куоракка баһаартан куттал суох буолуутун хааччыйыыга Управление салайааччыта Виталий Бобинов быһаарбытынан, үс ыйдаах үлэ чэрчитинэн Дьокуускай куорат уокуругун нэһилиэнньэлээх пууннарыгар элбэх дьон сылдьар эбийиэктэригэр дьону көһөрүүгэ эрчиллиилэр, баһаарынай-тактическай үөрэх уонна дьону быыһыырга итиэннэ баһаары умуруорууга дьарыктар, нэһилиэнньэ ортотугар иһитиннэрии, дьиэлэр тастарын баһаары үөскэтэр бөхтөн-сыыстан ыраастааһыҥҥа тэрээһиннэр уо.д.а. ыытыллыахтара.