Долгутуулаах кэм үүннэ

М.К.Аммосов аатынан Хотугулуу-Илиҥҥи федеральнай университет физико-техническэй институтун тутар хамыыһыйатын эппиэттээх сэкирэтээрин солбуйааччы Анна-Мария Вадимовна Тимофееваттан физико-техническэй институкка үөрэххэ туттарсыы бүгүҥҥү күҥҥэ хайдах бара турарын туһунан кылгастык кэпсииригэр көрдөстүм.

Анна-Мария Вадимовна Тимофеева, физико-техническэй институт тутар ха­мыы­һыйатын эппиэтинэстээх сэки­рэтээрин солбуйааччы:
— Быйыл физико-техническэй институт уопсайа аҕыс хайысхаҕа докумуону тутар: “Физика”, “Радиофизика”, “Радиотехника”, “Электроэнергетика уонна электротехника”, “Теплоэнергетика уонна теплотехника”, “Ядернай физика уонна технологиялар”, “Педагогическай үөрэхтээһин (физика уонна информатика)”, “Технология художественной обработки материалов”. Бу идэлэргэ барыта 165 бюджет миэстэтэ, ону таһынан уопсайа 41 төлөбүрдээх миэстэ баар. Үөрэх төлөбүрэ 150 тыһ. солк. cаҕалаан 205 тыһ. солк. тиийэр. Тутар хамыыһыйа от ыйын 24 күнүгэр диэри үлэлиир. От ыйын 22 күнүнээҕи туругунан, уопсайа 713 сайабылыанньа киирдэ. Быйыл оҕолор биир кэлим эксээмэннэрин бааллара үрдүктэр. Оттон физико-техническэй институкка туттарсарга кирбии – физика 40 баалтан үөһэ, математика – 40 баалтан үөһэ, нуучча тыла – 36 баалтан үөһэ буолуохтаах. “Педагогическай үөрэхтээһин (физика уонна информатика)” идэҕэ туттарсааччылар обществознаниеҕа (42 баалтан үөһэ), нуучча тылыгар (36 баалтан үөһэ) уонна математикаҕа (36 баалтан үөһэ) биир кэлим эксээмэни булгуччу туттарбыт буолуохтаахтар. Чэпчэтии тулаайах, төрөппүт көрүүтэ-истиитэ суох хаалбыт оҕолорго уонна инбэлиит оҕолорго көрүллэр. Таджикистантан биир оҕо кэлэн “Радиофизика” идэҕэ докумуонун туттарда. ХИФУ саайтыгар туох баар иһитиннэрии барыта тута тахса турар, докумуоннарын туттарбыт оҕолор дьиэлэригэр олорон испииһэккэ хаһыс туралларын билэр кыахтаахтар. Быйыл ордук “Электроэнергетика уонна электротехника” уонна “Физика” идэлэргэ элбэх сайабылыанньа киирэн, сүүмэрдээһин кэмигэр улахан куонкурус буолара күүтүллэр. “Физика” идэтэ бэйэтэ “Фундаментальнай физика”, “Медицинскай физика” уонна “Возобновляемая энергия” диэн хайысхаларга арахсар. Атын үөрэххэ киирбит оҕолор докумуоннарын төттөрү ылан эрэллэр, онон испииһэк күн аайы хамсыы турар. Үөрэххэ туттарсааччыларга ситиһиилэри баҕарабыт!

Мария ПАВЛОВА.