Дьон дьадаҥы эрээри, доруобай буолалларын ордороллор

Тэрээһиҥҥэ араас норуоттар бэрэстэбиитэллэрэ кытыннылар. Бастаан буолбут кэнсиэргэ көннөрү ырыаһыттары сэргэ ааттаах-суоллаах опера солистара, эстрада ырыаһыттара Лэгэнтэй, Аскалон Павлов кыттан, бэйэлэрин санааларын эттилэр.

Миитини саха алгысчыта саҕалаата. Уус-Майа улууһуттан эбэҥки кырдьаҕаһа Иван Атласов, юкагирдар общиналарын баһылыга Вячеслав Шадринов, буряттар «Лотос» общиналарыттан Саян-лама өрүһү көмүскэһээччилэри өйүүллэрин биллэрдилэр.

Миитиҥҥэ былаас бэрэстэбиитэллэрэ эмиэ кытыннылар: Ил Түмэн депутата, вице-спикер Виктор Губарев, норуот депутаттара Владимир Прокопьев, Александр Романов, Юрий Баишев, Иван Шамаев. Владимир Прокопьев, ааспыт өттүгэр Ньурба улууһун баһылыгынан үлэлээбит киһи, экологическай өттүнэн ордук эмсэҕэлээбит улуус бэрэстэбиитэлэ буоларын эттэ. «Бу сир аннынааҕы ядернай дэлби тэптэриилэр, алмааһы хостооһунтан Бүлүү киртийиитэ, ракеталар сүһүөхтэриттэн гептил түһүүтэ. Биһиги кэмитиэппит собуот бырайыагын туһунан биирдэ эрэ ыйыталаспатаҕа. Ол эрээри баччааҥҥа диэри киирэ илик. Бырайыагы ыллахпытына, парламент истиилэрин тэрийэргэ эрэннэрэбин. Ол чахчы буортулаах буоллаҕына, биһиги аһарыахпыт суоҕа – утары куоластыахпыт», — диэн мустубут дьоҥҥо эттэ.

Александр Романов Мэҥэ-Хаҥалас улууһун алта депутатын аатыттан тыл этэрин бэлиэтээтэ. Кини бу тэрээһини политическай хабааннаах оҥоро сатыыр күүстэр баалларын эттэ. Депутат сессия иннинэ, ыам ыйын 26 күнүгэр фракциялар уонна депутаттар бөлөхтөрүн салайааччылара өрөспүүбүлүкэ баһылыгын кытта көрсүһүүлэригэр Егор Борисовка ыйытыы биэрбитигэр Ил Дархан Өлүөнэ өрүһү киртитэри хаһан да таһаартарыам суоҕа диэбитин иһитиннэрдэ. Салгыы депутат Иркутскай уобалас Усть-Кутугар целлюлоза-кумааҕы комбинатын тутаары былаанныылларын эттэ. Юрий Баишев эмиэ өрүһү харыстыыр санааны тутуһар.

Иван Шамаев атын да бырайыактарга экологическай хамсааһыны сөргүтэр наадалааҕын бэлиэтээтэ.

Суруйааччы Венера Петрова, «Ыраас уу» тэрилтэни бас билэр Е.Макаров, биэс оҕолоох ийэ, «Якутск вечерний» хаһыат кылаабынай редакторын солбуйааччы Виталий Обедин, суруналыыс Виктория Габышева тутууну утарар санааларын иһитиннэрдилэр.

Биллэр эколог Иван Бурцев урукку өттүгэр экологтар ситиспит кыайыыларын бэлиэтээтэ уонна туга-ханныга биллибэт бырайыактары сорунуулаахтык утарарга эттэ.
Толорор былаас бэрэстэбиитэлинэн миитиҥҥэ айылҕа харыстабылын миниистирэ Сахамин Афанасьев буолла. Кини федеральнай сокуон өрүстэри көмүскүүрүн, онно буортулаах оҥорон таһаарыылар өрүстэр сүнньүлэригэр баар буолуо суохтаахтара суруллубутун, тутааччылар общественнай истиилэри ыытар эбээһинэстээхтэрин эттэ. Түмүгэр собуот официальнай бырайыага суоҕун бэлиэтээтэ.

Миитиҥҥэ Россия президенэ Владимир Путиҥҥа ыҥырыы ылылынна, волонтердар дьон илии баттааһынын хомуйдулар.