Дойду баһылыга Владимир Путин этиилэрэ

— Ыытыллар реформа сүрүн соруга — биэнсийэ систиэмэтин финансовай туругун сааһылааһын уонна биэнсийэлээхтэр дохуоттарын үрдэтии. Аҕа дойду улуу сэриитин уонна 90-с сыллар содуллара демография туругар охсуутун түмүгэр биэнсийэ төлөбүрүгэр үп-харчы тиийбэт. Биэнсийэ сааһын үрдэтии туһунан кэпсэтии бүгүн эрэ турбут буолбатах, Сэбиэскэй былаас саҕаттан, 90-с сыллартан дьүүлгэ турбута. 90-с сылларга экономика атаҕар ситэ тура илик уонна үлэтэ суох буолуу таһыма үрдүк буолан реформа барара эрдэ диэн тохтоппут эбит буоллахпытына , билигин экономика арыый туруктаах, дьон олоҕун таһыма үрдээбит кэмигэр реформаны ыытарга тоҕоостоох кэм үүннэ. Салгыы итинник салҕанан барара хайдах да сатаммат. Биэнсийэ реформатын билигин ыытыы – экономическай да, социальнай да өттүнэн хайаан да барыахтаах.
Дьиҥинэн былаас туох да миэрэни ылбакка холкутук олоруон сөп этэ, оччотугар биэнсийэ кээмэйин кыччатарга күһэллиэх, оттон үп-харчы тиийбэтэ өссө дириҥээн иһиэн сөп. Биэнсийэ кээмэйэ онто да суох кыра, онон ити миэрэ барсыбат. Маннык кыһалҕаны эбии дириҥэтэн олорон хаалыы – эһиги иннигитигэр уонна кэлэр көлүөнэҕэ эппиэтинэһэ уонна чиэһинэйэ суох быһыы буолуо этэ. Подоходнай нолуогу үрдэтии, государство бас билиитин атыылааһын, эбии нолуогу киллэрии курдук миэрэлэр кылгас кэмҥэ эрэ балаһыанньаны быыһыахтарын сөп. 2019 сылтан биэнсийэ индексацията 7% үрдээн барыаҕа. Онон реформа киириитэ – олох бэйэтэ туруорбут ирдэбилэ буоларынан эһиги сөптөөхтүк өйдүөххүт диэн эрэнэбин.