“Хармааҥҥа охсуулаах буолууһук”

От ыйын 1 күнүттэн куорат иһинээҕи уонна таһынааҕы нэһилиэнньэлээх пууннарга айан билиэтин сыаната 6% үрдээтэ, бырайыас 20 солк. буолла. Бу, биллэн турар, күн аайы автобус өҥөтүнэн туһанар дьон хармааныгар охсуулаах буолар. Бу туһунан дьон-сэргэ санаатын ыйыталастым.

Елизавета Бадмажапова, эдэр ийэ:

— Төһө да бэйэм массыыналаах буолларбын, биирдэ эмэ автобус өҥөтүнэн туһанабын. Биллэн турар, автобуһунан куорат иһигэр дьону таһыы сыаната үрдээбитэ үгүс киһи хармааныгар охсуулаах буолуоҕа дии саныыбын. Билигин экономическай кириисис кэмигэр туох барыта үрдээтэ. Бородуукта, эмп-томп сыаната күн-түүн үрдүүр, аны автобус билиэтэ…

Туйаара Михеева, эдэр ыал ийэтэ:

— Сайыҥҥы өттүгэр даачаҕа олорор буоламмыт, куорат киинигэр “пересадкалаан” кэлэбит. Билиҥҥитэ бэйэбит массыынабыт суох буолан, автобус өҥөтүнэн туһанарга эрэ тиийэбит. Автобуһунан айанныыр 20 солк. буолбута, төһө да 2 эрэ солкуобайынан үрдээтэр, эдэр ыал бүддьүөтүгэр биллэр охсууну аҕалыыһык… Ааҕан-суоттаан көрбүппүтүнэн, күн аайы куоракка киирэр наадалаах, үлэлээх буоламмыт, күҥҥэ кырата 200-300 солк. барар эбит.

Варвара Егорова, ХИФУ үлэһитэ:

— Бырайыас кээмэйэ үрдээбитэ бензин да сыаната улаатарыттан тутулуктаах буолуон сөп. Сыана үрдээһинин кытта тэҥҥэ хамнаспыт улатан иһэрэ үчүгэй буолуох этэ. Кыра хамнастаах, элбэх оҕолоох ыалга олус эрэйдээх буолара буолуо. Сайыҥҥы сынньалаҥ кэмигэр, холобур, оҕоттон бырайыаһы толору кээмэйинэн төлөтөллөр дии.

Лена Алексеева, Хаҥаластан киирэ сылдьар:

— Мин Хаҥалас улууһугар олоробун. Дьокуускай куоракка тус наадаларбынан сотору-сотору киирэбин. Бэйэм массыыналаахпын эрээри, автобус өҥөтүнэн биирдэ эмэ туһанабын. Автобуска туран эрэ айанныырбытыгар 20 солк. төлүүр буолбуппутун, биллэн турар, үгүс киһи сөбүлээбэтэ. Сайыҥҥы кэмҥэ автобустар гараж куортамын эҥин төлөөбөттөр дии уонна эмискэ баҕайы тоҕо үрдэттилэр? Билигин Индрайвер эҥин диэн удамыр сыанаҕа такси өҥөтө баар дии… Холобур, мин куоракка наадаҕа киирэр киһи сылдьар сирим элбэх буоллаҕына, автобуска кырата 150-200 солкуобайы барыыр буолабын. Ол оннугар таксины чааһынан сакаастаан сылдьыаҕым.

Оттон дьон форумнарга да кэпсэтэллэрин көрдөххө, үгүстэр сыана үрдээһинин сөбүлээбэттэр, автобустар суоппардара дьону кытта кэпсэтэр култууралара суох, автобустарын ыраастаабаттар, дьон итинник сыанаҕа кирдээх автобуска айанныырга күһэллэр, ону таһынан сорох суоппардар бэйэлэрин баҕаларынан олус бытааннык, эбэтэр харса суох түргэнник айанныылларын этэллэр. Ардыгар аан сабыллыбытын кэннэ хойутаабыт дьон тоҥсуйдахтарына, аспаттар, көрдөрбүтүнэн баран хаалаллар. Уопсайынан, бэйэлэрин хармааннарын хаҥатар эрэ туһугар үлэлииллэр диэх курдук. Ити туһунан этиллибитэ ыраатта эрээри, хамсааһын суох. Арай төлөбүр эрэ үрдүүр…

Дьокуускай куорат дьаһалтатын экономикаҕа департаменын сыананы оҥорууга отдела иһитиннэрбитинэн, Дьокуускай куоракка уонна таһынааҕы нэһилиэнньэлээх пууннарга дьону таһыы өҥөтүн сыаната икки сыл буола- буола былаан быһыытынан үрдэтиллэр.

Мария Павлова.