Ил Түмэн сокуонун барыла сааскы сессияҕа көрүллүөҕэ

Өрөспүүбүлүкэ народнай депутаттара бу барылга Саха сиригэр мировой судьуйалар ахсааннарын уонна суут учаастактарын 59-тан 65-кэ диэри элбэтэргэ, онуоха Бүлүү, Нам уонна Сунтаар улуустарыгар биирдии, ону сэргэ Дьокуускай куоракка үс мировой судьуйаны эбэргэ этэллэр. «Российскай Федерация субъектарыгар мировой судьуйалар уопсай ахсааннарын уонна суут учаастактарын ахсаанын туһунан» Федеральнай сокуонунан бүгүҥҥү күҥҥэ Саха сиригэр мировой судьуйа 59 дуоһунаһа уонна эмиэ оччо суут учаастага баар буолуохтааҕа быһаарыллыбыта. Ол эрээри өрөспүүбүлүкэ кэккэ административнай-территориальнай тэриллиилэригэр биир суут учаастагар олорор нэһилиэнньэ ахсаана суут учаастагын тэрийиигэ наадалаах нэһилиэнньэ ахсаанын үөһээҥҥи таһымыттан үрдүк. Холобур, Дьокуускай куоракка суут учаастагар нэһилиэнньэ ахсаана 28,3 тыһ. киһиэхэ тэҥ, Бүлүү улууһугар – 24,5 тыһ. киһи, Сунтаар улууһугар – 24,1 тыһ. киһи, Нам улууһугар – 23,5 тыһ. киһи.

Бу иннинэ сокуон барыла РФ Бырабыыталыстыбатыгар сөбүлэҥи ылбыта, ол эрээри Бырабыыталыстыба мировой судьуйалар ахсааннарын 65-кэ буолбакка, 63-кэ диэри тиэрдэргэ этиилээх. Онуоха төрүөтүнэн Алдан оройуонугар (13,9 тыһ. киһи) уонна Ленскэй оройуонугар (12,8 тыһ. киһи) биир суут учаастагар тиксэр нэһилиэнньэ ахсаана Федеральнай сокуон 4 ыстатыйатын 4 пуунунан быһаарыллар нуорматтан намыһаҕа буолар.

Госдума Сэбиэтэ ыйыллыбыт сокуон барылын Госдума сааскы сессиятын кэмигэр, бэс ыйыгар сокуону оҥорор үлэ барыллааһын программатыгар киллэрэргэ быһаарда. Эппиэтинэстээҕинэн конституционнай сокуоннары оҥорууга уонна судаарыстыбаннай тутууга Кэмитиэт ананна.

Госдума үлэтин регламенын быһыытынан, сокуон барыла Госдума кэмитиэттэригэр, хамыыһыйаларыгар, фракцияларга, РФ Президенигэр, Федерация Сэбиэтигэр, РФ Бырабыыталыстыбатыгар, РФ Ааҕар-суоттуур палаататыгар, Россия Общественнай палаататыгар, РФ Үрдүкү суутугар этиилэри, бэлиэтээһиннэри, ону сэргэ Госдума Аппараатын правовой управлениетыгар түмүктээһиннэри оҥорорго анаан ыытыллыаҕа. Этиилэри уонна бэлиэтээһиннэри Госдума туһааннаах кэмитиэтигэр 2015 с. ыам ыйын 23 күнүгэр диэри ыытыахха сөп.