Инбэлииттэр көрдөһүүлэрэ болҕомтоҕо ылыллыбат

Киин куорат олохтоохторо ити үлэ түмүгүттэн сүрдээҕин үөрбүппүт. Уулусса оҥоһуллан, автобустар сырыылара өссө тупсуо дии санаабыт киһи элбэҕэ. Онтукайбыт баара төттөрү буолан таҕыста. Ярославскай аатынан уулусса оҥоһуллуон иннинэ, 5 уонна 15 №-дээх автобустар итинэн сылдьаллара. Билигин ити автобустар Ленин проспегынан сылдьар буоллулар. Киин уулуссанан, этэргэ дылы, аата-ахсаана суох элбэх автобус сылдьарын бары бэркэ диэн билэҕит. Оннооҕор тохтобулга да кыайан турар миэстэлэрэ суох буолааччы. Ярославскайынан сылдьалларын саҕана бэрт табыгастааҕа.
Аны 3 №-дээх автобуһу Яро­слав­скайынан эргийэр гына оҥордулар. Урукку Киин баанньык тохтобулугар кэлбэт буолла. Бу маршрут уларыйбытыттан дьон-сэргэ бөҕө эрэйдэннэ. Бастатан туран, бу тохтобулга өрөспүүбүлүкэ инбэлииттэрэ — бары көрдөрүнэр МСЭК-рэ баар. Тэрилтэ салалтата Дьокуускай куорат мэриятыгар сурук ыыппыта да, көстөрүн курдук, туох да уларыйыы суох. Ыарыһах, кыаммат-түгэммэт дьон улаханнык эрэйдэммиттэрин бэлиэтиибин.
Аны, баанньыкка үксүн ытык кырдьаҕастарбыт сылдьаллар. Суунан тахсыбыт киһи кыһыҥҥы тымныыга ыраах хаамара, биллэн турар, доруобуйатыгар охсуулаах. Үгүс киһи ааҕар «Кыым» хаһыакка суруйаннар туруорса сатаатылар да, туһа суох. Ити квартал олохтоохторо эмиэ туруорсаннар мэрияҕа суруйбуттар диэн эмиэ сурах баар. Күөх экранынан эмиэ бу туһунан хаста да көрдөрдүлэр.
Бара сатааммын, Дьокуускай куорат мэрин Айсен Николаев фейсбугар бу туһунан суруйан көрбүтүм. Эмиэ ылы-чып. Автобуһунан айаннаабат, массыынанан тиэллэр чунуобунньук саҥа маршруту толкуйдаабыта тута харахха быраҕыллар.
«Дьокуускай куорат Думатын депутаттара кыһаллыбат буоллахтарына, Ил Түмэн депутаттара бу итэҕэһи туоратарга көмөлөстүннэр», – диэн миэхэ үгүс киһи төлөпүөнүнэн эрийэ сырытта.

Людмила НОГОВИЦЫНА.